ನವದೆಹಲಿ : ತನ್ನ ದೇಶದ ಪಶ್ಚಿಮ ಕರಾವಳಿಯಲ್ಲಿ ಕಡಲು ಸಂಶೋಧನೆ ನಡೆಸಲು ಚೀನಾದ ಹಡಗಿಗೆ 48 ಗಂಟೆಗಳ ಕಾಲಾವಕಾಶ ನೀಡಲಾಗಿದೆ ಎಂದು ಶ್ರೀಲಂಕಾದ ವಿದೇಶಾಂಗ ಸಚಿವಾಲಯ ಭಾನುವಾರ ತಿಳಿಸಿದೆ. ಬುಧವಾರದಿಂದ ಕೊಲಂಬೊ ಬಂದರಿನಲ್ಲಿರುವ ಚೀನಾದ ಸಂಶೋಧನಾ ಹಡಗು ಶಿ ಯಾನ್ 6 ಗೆ ಸೋಮವಾರದಿಂದ ಎರಡು ದಿನಗಳ ಕಾಲ ಸಂಶೋಧನಾ ಕಾರ್ಯಾಚರಣೆ ನಡೆಸಲು ಅವಕಾಶ ನೀಡಲಾಗುವುದು ಎಂದು ಸಚಿವಾಲಯದ ವಕ್ತಾರ ಕಪಿಲಾ ಫೊನ್ಸೆಕಾ ಹೇಳಿದ್ದಾರೆ. ಶ್ರೀಲಂಕಾ ಬಂದರಿನಲ್ಲಿ ಚೀನಾ ಹಡಗುಗಳು ಲಂಗರು ಹಾಕುವುದಕ್ಕೆ ಭಾರತದ ತೀವ್ರ ಆಕ್ಷೇಪದ ನಡುವೆಯೂ ಶ್ರೀಲಂಕಾ ಇಂಥ ಕ್ರಮಕ್ಕೆ ಮುಂದಾಗಿದೆ.
ಪ್ರಸ್ತುತ ಲಂಗರು ಹಾಕಿರುವ ಚೀನಾ ಹಡಗು ಶ್ರೀಲಂಕಾದ ಪಶ್ಚಿಮ ಸಮುದ್ರ ತೀರದಲ್ಲಿ ಎರಡು ದಿನಗಳ ಸಂಶೋಧನಾ ಚಟುವಟಿಕೆ ನಡೆಸಲಿದ್ದು, ಇದರಲ್ಲಿ ಸ್ಥಳೀಯ ವಿಜ್ಞಾನಿಗಳು ಕೂಡ ಶಿ ಯಾನ್ 6 ನಲ್ಲಿ ಇರಲಿದ್ದಾರೆ ಎಂದು ಫೊನ್ಸೆಕಾ ಹೇಳಿದ್ದಾರೆ.
ಈ ಹಿಂದೆಯೂ ಚೀನಾ ಹಡಗು ಕೊಲಂಬೊ ಬಂದರಿಗೆ ಆಗಮಿಸಲು ಶ್ರೀಲಂಕಾ ಅನುಮತಿ ನೀಡಿತ್ತು. ಈ ಹಡಗು ತನ್ನ ವಿರುದ್ಧ ಗೂಢಚಾರಿಕೆ ನಡೆಸುವ ಸಾಧ್ಯತೆಗಳಿವೆ ಎಂದು ಭಾರತ ಆತಂಕ ವ್ಯಕ್ತಪಡಿಸಿತ್ತು. ಹಿಂದೂ ಮಹಾಸಾಗರದಲ್ಲಿ ಚೀನಾದ ಹೆಚ್ಚುತ್ತಿರುವ ಉಪಸ್ಥಿತಿ ಮತ್ತು ಶ್ರೀಲಂಕಾದಲ್ಲಿ ಅದರ ಪ್ರಭಾವದ ಬಗ್ಗೆ ನವದೆಹಲಿ ತೀವ್ರ ಕಳವಳ ವ್ಯಕ್ತಪಡಿಸಿದೆ.
ಪೂರ್ವ-ಪಶ್ಚಿಮ ಅಂತರರಾಷ್ಟ್ರೀಯ ಹಡಗು ಮಾರ್ಗಗಳಲ್ಲಿ ಶ್ರೀಲಂಕಾ ಆಯಕಟ್ಟಿನ ಸ್ಥಾನದಲ್ಲಿರುವುದು ಗಮನಾರ್ಹ. ಕಳೆದ ವರ್ಷ ಬಾಹ್ಯಾಕಾಶ ನೌಕೆಯನ್ನು ಟ್ರ್ಯಾಕಿಂಗ್ ಮಾಡುವ ಚೀನಾದ ಹಡಗು ಶ್ರೀಲಂಕಾಗೆ ಆಗಮಿಸಿದ್ದಕ್ಕೆ ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ನಂತರ ಶ್ರೀಲಂಕಾ ಆ ಹಡಗು ತನ್ನ ಜಲಪ್ರದೇಶದಲ್ಲಿದ್ದಾಗ ಯಾವುದೇ ಸಂಶೋಧನಾ ಚಟುವಟಿಕೆಗಳನ್ನು ಕೈಗೊಳ್ಳುವುದನ್ನು ನಿಷೇಧಿಸಿತ್ತು.
ಸದ್ಯ 90 ಮೀಟರ್ (300 ಅಡಿ) ಉದ್ದದ ಚೀನಾ ಹಡಗು ಕೊಲಂಬೊ ಬಂದರಿನಲ್ಲಿ ಲಂಗರು ಹಾಕಿದೆ. ಅಲ್ಲಿ ಚೀನಾದ ಸರ್ಕಾರಿ ಸ್ವಾಮ್ಯದ ಕಂಪನಿಯು ಆಳ ಸಮುದ್ರ ಟರ್ಮಿನಲ್ ಅನ್ನು ನಿರ್ವಹಿಸುತ್ತಿದೆ. 2014ರಲ್ಲಿ ಚೀನಾದ ಜಲಾಂತರ್ಗಾಮಿ ನೌಕೆಯೊಂದು ಅಲ್ಲಿಗೆ ಬಂದಿಳಿದಿತ್ತು. 2014 ರಿಂದಲೂ ಚೀನಾದ ಎರಡು ಸಬ್ ಮರಿನ್ಗಳು ಶ್ರೀಲಂಕಾ ಬಂದರಿನಲ್ಲಿ ಲಂಗರು ಹಾಕಿರುವುದು ಕೂಡ ಭಾರತದ ಕಳವಳಕ್ಕೆ ಕಾರಣವಾಗಿದೆ.
ಶ್ರೀಲಂಕಾ ವಿದೇಶಗಳಿಂದ ಪಡೆದ ಒಟ್ಟು ಸಾಲದ ಪ್ರಮಾಣದಲ್ಲಿ ಶೇ 52ರಷ್ಟನ್ನು ಚೀನಾ ನೀಡಿದೆ. ಹೀಗಾಗಿ ಕೊಲಂಬೊ ತನ್ನ ಬಾಕಿ ಸಾಲಗಳನ್ನು ಪುನರ್ ರಚಿಸುವ ಯಾವುದೇ ಪ್ರಯತ್ನಗಳಿಗೆ ಬೀಜಿಂಗ್ನ ಅನುಮೋದನೆ ನಿರ್ಣಾಯಕವಾಗಿದೆ.
ಇದನ್ನೂ ಓದಿ : ಗಾಜಾ ವಿಷಯಕ್ಕೆ ಬಂದರೆ ಹುಷಾರ್; ಎಲೋನ್ ಮಸ್ಕ್ಗೆ ಇಸ್ರೇಲ್ ಎಚ್ಚರಿಕೆ ನೀಡಿದ್ಯಾಕೆ?
