ತೆಗುಸಿಗಲ್ಪಾ, ಹೊಂಡುರಾಸ್: ಮಧ್ಯ ಅಮೆರಿಕದ ಹೊಂಡುರಾಸ್ ಮಹಿಳಾ ಜೈಲಿನಲ್ಲಿ ದುರಂತ ಘಟನೆಯೊಂದು ನಡೆದಿದೆ. ಮಹಿಳಾ ಜೈಲಿನೊಳಗೆ ನಡೆದ ಗ್ಯಾಂಗ್ವಾರ್ನಲ್ಲಿ ಅನೇಕ ಕೈದಿಗಳು ತಮ್ಮ ಪ್ರಾಣ ಕಳೆದುಕೊಂಡಿರುವುದಾಗಿ ವರದಿಯಾಗಿದೆ. ಇದನ್ನು ತಿಳಿದ ಕೈದಿಗಳ ಸಂಬಂಧಿಕರು ಜೈಲಿನ ಹೊರಗೆ ಜಮಾಯಿಸಿ ಪ್ರತಿಭಟನೆ ಕೈಗೊಂಡಿದ್ದಾರೆ.
ಹೌದು, ಹೊಂಡುರಾಸ್ನ ಮಹಿಳಾ ಕಾರಾಗೃಹದಲ್ಲಿ ಮಂಗಳವಾರ ಗಲಭೆ ನಡೆದಿದೆ. ಜೈಲಿನಲ್ಲಿ ನಡೆದ ಹಿಂಸಾಚಾರದಲ್ಲಿ ಕನಿಷ್ಠ 41 ಮಹಿಳೆಯರು ಸಾವನ್ನಪ್ಪಿದ್ದಾರೆ (Women Prisoners Died). ಜೈಲಿನೊಳಗೆ ಗ್ಯಾಂಗ್ವೊಂದರಿಂದ ಹಿಂಸಾಚಾರ ನಡೆದಿದೆ ಎಂದು ಇಲ್ಲಿನ ಅಧ್ಯಕ್ಷ ಕ್ಸೊಮಾರಾ ಕ್ಯಾಸ್ಟ್ರೋ ಖಚಿತಪಡಿಸಿದ್ದಾರೆ. ಗಲಭೆಯಲ್ಲಿ ಕನಿಷ್ಠ 26 ಮಹಿಳೆಯರು ಸುಟ್ಟು ಕರಕಲಾಗಿದ್ದು, ಇನ್ನುಳಿದ ಕೈದಿಗಳು ಗುಂಡೇಟು ಮತ್ತು ಚಾಕು ಇರಿತದಿಂದ ಮೃತಪಟ್ಟಿದ್ದಾರೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
ಮಂಗಳವಾರ ಬೆಳಗ್ಗೆ ಜೈಲಿನಲ್ಲಿ ಎರಡು ಗುಂಪುಗಳ ನಡುವೆ ಮಾರಾಮಾರಿ ನಡೆದಿದೆ ಎಂದು ಕೈದಿಗಳ ಕುಟುಂಬಗಳ ಒಕ್ಕೂಟದ ಅಧ್ಯಕ್ಷ ಡೆಲ್ಮಾ ಆರ್ಡೊನೆಜ್ ತಿಳಿಸಿದ್ದಾರೆ. ಸ್ಥಳೀಯ ಮಾಧ್ಯಮಗಳ ಪ್ರಕಾರ, ಹೊಂಡುರಾಸ್ ರಾಜಧಾನಿ ತೆಗುಸಿಗಲ್ಪಾದಿಂದ ಸುಮಾರು 50 ಕಿಲೋಮೀಟರ್ ದೂರದಲ್ಲಿರುವ ತಮಾರಾದ ಜೈಲಿನಲ್ಲಿ ಗಲಭೆಯಾಗಿದೆ. ಗಲಭೆಯ ನಂತರ, ವಿಧಿವಿಜ್ಞಾನ ತಂಡ ಆಗಮಿಸಿ 41 ಮಹಿಳಾ ಕೈದಿಗಳು ಸಾವನ್ನಪ್ಪಿದ್ದಾರೆ ಎಂದು ಖಚಿತಪಡಿಸಿದ್ದಾರೆ. ಇದೇ ವೇಳೆ, ಆಸ್ಪತ್ರೆಯಲ್ಲಿ ಏಳು ಮಂದಿಗೆ ಚಿಕಿತ್ಸೆ ನೀಡಲಾಗುತ್ತಿದ್ದು, ಅವರ ಸ್ಥಿತಿಯೂ ಚಿಂತಾಜನಕವಾಗಿದೆ. ನಂತರ ಸರ್ಕಾರವು ಜೈಲಿನೊಳಗಿಂದ ವಶಪಡಿಸಿಕೊಂಡ ಶಸ್ತ್ರಾಸ್ತ್ರಗಳನ್ನು ಬಹಿರಂಗ ಪಡಿಸಿದೆ.
ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಕ್ಯಾಸ್ಟ್ರೋ ಸಾಮಾಜಿಕ ಜಾಲತಾಣದ ಮೂಲಕ ತಿಳಿಸಿದ್ದಾರೆ. ’ಬ್ಯಾರಿಯೊ 18‘ ಗ್ಯಾಂಗ್ ಮಹಿಳೆಯರ ಸೆಲ್‌ಗೆ ನುಗ್ಗಿ ಕೈದಿಗಳನ್ನು ಕೊಲ್ಲಲು ಪ್ರಾರಂಭಿಸಿತು. ಅದರ ನಂತರ ಬೆಂಕಿ ಹಚ್ಚಿತು. ಬ್ಯಾರಿಯೋ 18 ಗ್ಯಾಂಗ್ ಭಯದಿಂದ ಬದುಕುತ್ತಿದ್ದೇವೆ ಎಂದು ಕೈದಿಗಳು ಈ ಹಿಂದೆ ಹೇಳಿದ್ದರು. ಇನ್ನು ಈ ಜೈಲಿನ ಕೈದಿಗಳ ಸಾಮರ್ಥ್ಯ 400 ಇದೆ ಅಂತೆ. ಆದರೆ ಇಲ್ಲಿ 800ಕ್ಕೂ ಹೆಚ್ಚು ಕೈದಿಗಳಿದ್ದರು ಎನ್ನಲಾಗ್ತಿದೆ.
ಈ ಗಲಭೆಯ ನಂತರ ಕೈದಿಗಳ ಸಂಬಂಧಿಕರು ಜೈಲಿನ ಹೊರಗೆ ಜಮಾಯಿಸಿದ್ದು, ಪ್ರತಿಭಟನೆ ನಡೆಸುತ್ತಿದ್ದಾರೆ. ಹತ್ಯೆಗೀಡಾದ ಕೈದಿಗಳ ಸಂಬಂಧಿಕರು ಗಲಾಟೆ ಸೃಷ್ಟಿಸುತ್ತಿದ್ದಾರೆ. ನನ್ನ ಮಗಳ ಬಗ್ಗೆ ನನಗೆ ಯಾವುದೇ ಮಾಹಿತಿ ಇಲ್ಲ ಎಂದು ಕೈದಿಯ ತಾಯಿ ಹೇಳಿದ್ದಾರೆ. ನಾವು ನೋವಿನಿಂದ ಸಾಯುತ್ತಿದ್ದೇವೆ. ಆದರೆ, ಆಡಳಿತಾಧಿಕಾರಿ ಯಾವುದೇ ಮಾಹಿತಿ ನೀಡುತ್ತಿಲ್ಲ. ಜೈಲಿನೊಳಗೆ 41 ಜನರು ಸಾವನ್ನಪ್ಪಿದ್ದಾರೆ ಎಂದು ಮತ್ತೊಬ್ಬರು ಹೇಳಿದ್ದಾರೆ. ನಮ್ಮ ಸಂಬಂಧಿಕರು ಬದುಕಿದ್ದಾರೋ ಇಲ್ಲವೋ ಗೊತ್ತಿಲ್ಲ ಎಂದು ತಾಯಿ ಕಣ್ಣೀರಿಟ್ಟಿದ್ದಾರೆ.
ಇನ್ನು ಜೈಲಿನ ಹೊರಗಡೆ ಪ್ರಕ್ಷುಬ್ಧ ವಾತಾವರಣ ನಿರ್ಮಾಣವಾಗಿದೆ. ಉದ್ರಿಕ್ತರನ್ನು ತಡೆಯಲು ಮತ್ತು ಸ್ಥಳದಲ್ಲಿ ಬಿಗುವಿನ ವಾತಾವರಣ ನಿರ್ಮಾಣವಾಗಿದ್ದು ಪೊಲೀಸ್ ಪಡೆ ನಿಯೋಜಿಸಲಾಗಿದೆ. ಈ ಘಟನೆ ಬಗ್ಗೆ ಇನ್ನಷ್ಟು ಮಾಹಿತಿ ತಿಳಿದು ಬರಬೇಕಾಗಿದೆ.
