ಉಕ್ರೇನ್ ಮೇಲೆ ರಷ್ಯಾ ಯುದ್ಧ ಸಾರಿ ಇನ್ನೇನು ಒಂದು ವರ್ಷವಾಗಲಿದೆ. ನ್ಯಾಟೋ ಪಡೆಗೆ ಸೇರುವುದರ ವಿರುದ್ಧ ರಷ್ಯಾದ ಈ ದಾಳಿ ಉಕ್ರೇನ್ ಅನ್ನು ಹಣ್ಣುಗಾಯಿ ನೀರುಗಾಯಿ ಮಾಡಿದೆ. "ಯುದ್ಧ ಆರಂಭಕ್ಕೂ ಮೊದಲು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ತನ್ನ ಮೇಲೆ ಕ್ಷಿಪಣಿ ದಾಳಿ ಮಾಡುವುದಾಗಿ ಬೆದರಿಕೆ ಹಾಕಿದ್ದರು" ಎಂದು ಇಂಗ್ಲೆಂಡ್ ಮಾಜಿ ಪ್ರಧಾನಿ ಬೋರಿಸ್ ಜಾನ್ಸನ್ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ.
ಬಿಬಿಸಿಯ ಸಾಕ್ಷ್ಯಚಿತ್ರವೊಂದರಲ್ಲಿ ಆಘಾತಕಾರಿ ವಿಷಯ ಬಹಿರಂಗಪಡಿಸಿರುವ ಜಾನ್ಸನ್, 2022 ರ ಫೆಬ್ರವರಿಯಲ್ಲಿ ನಡೆದ ಫೋನ್ ಸಂಭಾಷಣೆಯ ವೇಳೆ ಪುಟಿನ್ ತನ್ನ ಮೇಲೆ ಕ್ಷಿಪಣಿ ದಾಳಿ ಮಾಡುವುದಾಗಿ ಹೇಳಿದ್ದ. "ಉಕ್ರೇನ್- ರಷ್ಯಾ ಮಧ್ಯೆ ಯುದ್ಧ ಪರಿಸ್ಥಿತಿ ಉಂಟಾದರೆ, ಅದು ಭೀಕರ ದುರಂತಗಳಿಗೆ ಕಾರಣವಾಗುತ್ತದೆ ಎಂದು ಪುಟಿನ್ಗೆ ತಿಳಿಸಿದಾಗ, ನಾನು ನಿಮ್ಮನ್ನು ನೋಯಿಸಲು ಬಯಸುವುದಿಲ್ಲ. ಒಂದೇ ಬಾರಿಗೆ ಕ್ಷಿಪಣಿಯಿಂದ ಉಡಾಯಿಸುವೆ ಅಥವಾ ಅಂತದ್ದೇ ಇನ್ನೇನಾದರೂ ಮಾಡುವೆ ಎಂದರು. ಇದು ನನ್ನಲ್ಲಿ ಗೊಂದಲ ಉಂಟು ಮಾಡಿತು" ಎಂದು ಹೇಳಿದ್ದಾರೆ.
ಬಿಬಿಸಿ ಚಿತ್ರಿಸಿರುವ ಡಾಕ್ಯುಮೆಂಟರಿಯು ಪ್ರಸಾರಕ್ಕೂ ಮೊದಲು ಇಂತಹ "ಬಾಂಬ್" ಹಾಕಿದೆ. "ನಾನು ಯುದ್ಧದಿಂದಾಗುವ ಪರಿಣಾಮಗಳ ಬಗ್ಗೆ ವಿವರಿಸುತ್ತಿದ್ದರೆ, ಪುಟಿನ್ ನನ್ನ ಮಾತುಗಳನ್ನು ತೇಲಿಸುತ್ತಿದ್ದರು. ಶಾಂತವಾಗಿಯೇ ಉತ್ತರಿಸುತ್ತಿದ್ದ ಅವರು, ನನ್ನ ಪ್ರಯತ್ನಗಳಿಗೆ ಕಿವಿಗೊಡಲಿಲ್ಲ" ಎಂಬುದು ಹೇಳಿಕೆಯಲ್ಲಿದೆ.
"ಉಕ್ರೇನ್ ಮೇಲೆ ಆಕ್ರಮಣ ಮಾಡುವುದರಿಂದ ಪಾಶ್ಚಿಮಾತ್ಯ ನಿರ್ಬಂಧಗಳಿಗೆ ಮತ್ತು ರಷ್ಯಾದ ಗಡಿಯಲ್ಲಿ ಹೆಚ್ಚಿನ ನ್ಯಾಟೋ ಪಡೆಗಳು ಠಿಕಾಣಿ ಹೂಡಲು ಕಾರಣರಾಗುತ್ತೀರಿ ಎಂದು ಪುಟಿನ್ ಅವರಿಗೆ ಎಚ್ಚರಿಕೆ ನೀಡಿದೆ. ಭವಿಷ್ಯದಲ್ಲಿ ಉಕ್ರೇನ್ ನ್ಯಾಟೋಗೆ ಸೇರುವುದಿಲ್ಲ ಎಂದು ಭರವಸೆ ನೀಡಿದ್ದೆ ಎಂದು ಪುಟಿನ್ಗೆ ಹೇಳುವ ಮೂಲಕ ರಷ್ಯಾದ ನಡೆಸಲಿರುವ ಮಿಲಿಟರಿ ಕ್ರಮವನ್ನು ತಡೆಯಲು ಪ್ರಯತ್ನಿಸಿದೆ. ಆದರೆ, ಈ ವೇಳೆ ಪುಟಿನ್ ಅತ್ಯಂತ ನಿರಾಸಕ್ತ ಮನೋಭಾವದಲ್ಲಿದ್ದರು" ಎಂದು ಬಿಬಿಸಿ ಸಾಕ್ಷ್ಯಚಿತ್ರ ಹೇಳಿದೆ.
ಆಕ್ರಮಣ ಮಾಡಲ್ಲ ಎಂದಿದ್ದ ರಷ್ಯಾ: ಇನ್ನು, ಯುದ್ಧದ ಬಗ್ಗೆಯೂ ಸಾಕ್ಷ್ಯಚಿತ್ರದಲ್ಲಿ ಪ್ರಸ್ತಾಪವಾಗಿದ್ದು, ಇಂಗ್ಲೆಂಡ್ ರಕ್ಷಣಾ ಕಾರ್ಯದರ್ಶಿ ಬೆನ್ ವ್ಯಾಲೇಸ್ ಅವರು ಫೆಬ್ರವರಿ 11, 2022 ರಂದು ಮಾಸ್ಕೋಗೆ ತೆರಳಿ ರಷ್ಯಾದ ಸೆರ್ಗೆಯ್ ಶೋಯಿಗು ಅವರನ್ನು ಭೇಟಿಯಾಗಿದ್ದರು. ಈ ವೇಳೆ, ನಡೆದ ಮಾತುಕತೆಯಲ್ಲಿ ರಷ್ಯಾ, ಉಕ್ರೇನ್ ಮೇಲೆ ಆಕ್ರಮಣ ಮಾಡುವುದಿಲ್ಲ ಎಂಬ ಭರವಸೆಯನ್ನು ನೀಡಿತ್ತು. ಆದರೆ, ಅದು ಸುಳ್ಳು ಎಂಬುದು ಇಬ್ಬರೂ ನಾಯಕರಿಗೆ ತಿಳಿದಿತ್ತು. ರಷ್ಯಾ ಈ ವಿಚಾರದಲ್ಲಿ ಸುಳ್ಳು ಹೇಳಿತ್ತು ಎಂದು ಸಾಕ್ಷ್ಯಚಿತ್ರದಲ್ಲಿದೆ.
2022 ರ ಫೆಬ್ರವರಿ 24 ರಂದು ಉಕ್ರೇನ್ ಗಡಿಯಲ್ಲಿ ಬಾಂಬ್ಗಳು ಸದ್ದು ಮಾಡಿದವು. ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಮಧ್ಯರಾತ್ರಿಯಲ್ಲಿ ಬೋರಿಸ್ ಜಾನ್ಸನ್ ಕರೆ ಮಾಡಿ ಮಾಹಿತಿ ನೀಡಿದರು. ರಷ್ಯಾ ತನ್ನ ದೇಶದ ಮೇಲೆ ಯುದ್ಧ ಸಾರಿದೆ. ಎಲ್ಲೆಡೆ ದಾಳಿ ಶುರುವಾಗಿದೆ ಎಂದು ತಿಳಿಸಿದರು. ಸುರಕ್ಷಿತ ಸ್ಥಳಾಂತರಕ್ಕೆ ಜಾನ್ಸನ್ ಸಹಾಯ ಮಾಡಲು ಪ್ರಸ್ತಾಪಿಸಿದರು. ಆದರೆ, ನಾನು ಇಲ್ಲಿಯೇ ಇದ್ದು, ಎದುರಿಸುವೆ ಎಂದು ಝೆಲೆನ್ಸ್ಕಿ ಹೇಳಿದರು ಎಂದು ಬಿಬಿಸಿ ಹೇಳಿದೆ.
ಮತ್ತೊಬ್ಬ ನಾಯಕನ ಬಗ್ಗೆ ಬಿಬಿಸಿ ಸಾಕ್ಷ್ಯಚಿತ್ರ: ಇದಕ್ಕೂ ಮೊದಲು ಪ್ರಧಾನಿ ನರೇಂದ್ರ ಮೋದಿ ಅವರ ಬಗ್ಗೆ ಬಿಬಿಸಿ ಗೋಧ್ರೋತ್ತರ ಗಲಭೆಯ ಕುರಿತು ಸಾಕ್ಷ್ಯಚಿತ್ರ ಪ್ರಸಾರ ಮಾಡಿದೆ. ಇದೀಗ ರಷ್ಯಾ ಅಧ್ಯಕ್ಷ ಪುಟಿನ್ ಬಗ್ಗೆ ಡಾಕ್ಯುಮೆಂಟರಿ ಮಾಡಿದೆ. ಇಂದು (ಜನವರಿ 30) ಅದು ಪ್ರಸಾರವಾಗಲಿದೆ. ಇದರಲ್ಲಿ ಇಂಗ್ಲೆಂಡ್ ಮಾಜಿ ಪ್ರಧಾನಿ ಬೋರಿಸ್ ಜಾನ್ಸನ್ಗೆ ಪುಟಿನ್ ಬೆದರಿಕೆ ಹಾಕಿದ ಬಗ್ಗೆ ಚಿತ್ರಿತವಾಗಿದೆ. ಈ ಸಂಭಾಷಣೆಯ 15 ದಿನಗಳ ಬಳಿಕ ರಷ್ಯಾ, ಉಕ್ರೇನ್ ಮೇಲೆ ದಾಳಿ ಮಾಡಿತು ಎಂದು ಸಾಕ್ಷ್ಯಚಿತ್ರ ಹೇಳಿದೆ.
ಓದಿ: ಬಿಬಿಸಿ ಸಾಕ್ಷ್ಯಚಿತ್ರ ನಿಷೇಧ ಪ್ರಶ್ನಿಸಿ ಪಿಐಎಲ್: ಫೆ.6 ರಂದು ಸುಪ್ರೀಂಕೋರ್ಟ್ ವಿಚಾರಣೆ
