ಸೆಟಿಂಜೆ (ಮಾಂಟೆನೆಗ್ರೊ): ಪಶ್ಚಿಮ ಮಾಂಟೆನೆಗ್ರೊ ನಗರದಲ್ಲಿ ವ್ಯಕ್ತಿಯೊಬ್ಬ ಪ್ರಾಣಿಗಳ ಬೇಟೆಯಾಡುವ ಬಂದೂಕಿನಿಂದ ಇಬ್ಬರು ಮಕ್ಕಳು ಸೇರಿದಂತೆ 10 ಮಂದಿ ಅಮಾಯಕರ ಮೇಲೆ ಗುಂಡಿನ ದಾಳಿ ನಡೆಸಿ ಹತ್ಯೆ ಮಾಡಿದ ಆಘಾತಕಾರಿ (Montenegro shootout) ಘಟನೆ ನಡೆದಿದೆ. ದಾಳಿಯನ್ನು ತಡೆಯಲು ದಾರಿಹೋಕನೊಬ್ಬ ಹಂತಕನ ಮೇಲೆ ಫೈರಿಂಗ್ ಮಾಡಿ ಕೊಂದಿದ್ದಾನೆ. ಜೊತೆಗೆ ಶೂಟೌಟ್ನಲ್ಲಿ ಪೊಲೀಸ್ ಸೇರಿ ಮೂವರು ಗಾಯಗೊಂಡಿದ್ದಾರೆ.
ಮಾಂಟೆನೆಗ್ರೋದಲ್ಲಿ ಶೂಟೌಟ್: ದಾಳಿಕೋರ 34 ವರ್ಷದ ವ್ಯಕ್ತಿ ಎಂದು ಗುರುತಿಸಲಾಗಿದೆ. ಶೂಟೌಟ್ ಮಾಡಲು ಕಾರಣ ಏನೆಂಬುದು ತಿಳಿದುಬಂದಿಲ್ಲ. ಸೆಟಿಂಜೆಯ ಮೆಡೋವಿನಾ ಪ್ರದೇಶದಲ್ಲಿ ದಾಳಿಕೋರ ವಾಸವಾಗಿದ್ದ. ದಾಳಿಕೋರ ಮೊದಲು ತನ್ನ ಮನೆಯಲ್ಲಿ ಬಾಡಿಗೆಗೆ ಇದ್ದ ಕುಟುಂಬದ 8 ಮತ್ತು 11 ವರ್ಷದ ಮಕ್ಕಳು ಮತ್ತು ತಾಯಿಯ ಮೇಲೆ ಗುಂಡು ಹಾರಿಸಿ ಹತ್ಯೆ ಮಾಡಿದ್ದಾನೆ.
ಬಳಿಕ ಅದೇ ರೈಫಲ್ ತೆಗೆದುಕೊಂಡು ರಸ್ತೆಗೆ ಬಂದ ಹಂತಕ ದಾರಿಯಲ್ಲಿ ಹೋಗುತ್ತಿದ್ದ ಜನರ ಮೇಲೆ ಮನಸೋಇಚ್ಚೆ ಫೈರಿಂಗ್ ಮಾಡಿದ್ದಾನೆ. ಇದರಿಂದ ಸ್ಥಳದಲ್ಲೇ 7 ಮಂದಿ ಗುಂಡೇಟಿಗೆ ಬಲಿಯಾಗಿದ್ದಾರೆ. ದಾಳಿಯಲ್ಲಿ ಪೊಲೀಸ್ ಅಧಿಕಾರಿ ಸೇರಿದಂತೆ ಮೂವರು ಗಾಯಗೊಂಡಿದ್ದಾರೆ.
ಇನ್ನು ಇದೇ ದಾರಿಯಲ್ಲಿ ಹೋಗುತ್ತಿದ್ದ ವ್ಯಕ್ತಿಯೊಬ್ಬ ದಾಳಿಕೋರನ ಮೇಲೆ ಪ್ರತಿದಾಳಿ ನಡೆಸಿ ಹತ್ಯೆ ಮಾಡಿದ್ದಾನೆ. ಇದರಿಂದ ಮುಂದಾಗುತ್ತಿದ್ದ ಅನಾಹುತವನ್ನು ತಡೆದಿದ್ದಾನೆ. ಬಾಡಿಗೆದಾರರು ಮತ್ತು ಜನರ ಮೇಲೆ ದಾಳಿಕೋರ ಫೈರಿಂಗ್ ಮಾಡಿದ ಕಾರಣದ ಬಗ್ಗೆ ತಿಳಿದುಬಂದಿಲ್ಲ. ಈ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಇನ್ನು ಭೀಕರ ಘಟನೆಯ ಬಗ್ಗೆ ಪ್ರಧಾನಿ ಡ್ರಿಟನ್ ಅಬಾಜೋವಿಕ್ ಆಘಾತ ವ್ಯಕ್ತಪಡಿಸಿದ್ದಾರೆ. ಇದೊಂದು ಅನಿರೀಕ್ಷಿತ ದುರಂತ ಎಂದು ಹೇಳಿದ್ದಾರೆ. ಅಮಾಯಕರ ಮೇಲೆ ಗುಂಡಿನ ದಾಳಿ ನಡೆಸಿರುವುದು ಕುಕೃತ್ಯ ಎಂದು ಟೀಕಿಸಿದ್ದಾರೆ. ಅಧ್ಯಕ್ಷ ಮಿಲೋ ಜುಕಾನೋವಿಕ್ ಅವರು ಕೂಡ ಟ್ವೀಟ್ ಮಾಡಿ ಆಘಾತದೊಂದಿಗೆ ಸಂತಾಪ ಸೂಚಿಸಿದ್ದಾರೆ.
