ಬೆಲ್ಡೆನ್ (ಮಿಸ್ಸಿಸ್ಸಿಪ್ಪಿ): ನಾಯಿ, ಬೆಕ್ಕು ಮೃದು ಸ್ವಭಾವದ್ದೇ ಆದರೂ ಮಾಲೀಕರ ತೊಂದರೆ ಉಂಟಾದಾಗ ಅವುಗಳ ವರ್ತನೆಯೇ ಬದಲಾಗುತ್ತದೆ. ಅವು ತಮ್ಮ ಪ್ರಾಣವನ್ನು ಒತ್ತೆ ಇಟ್ಟು ನಮ್ಮನ್ನು ರಕ್ಷಣೆ ಮಾಡುತ್ತವೆ. ಅಮೆರಿಕದ ಮಿಸ್ಸಿಸ್ಸಿಪ್ಪಿಯಲ್ಲಿ ಮನೆಯೊಂದರಲ್ಲಿ ನಡೆಯಬಹುದಾದ ದರೋಡೆಯನ್ನು ಬೆಕ್ಕೊಂದು ತಪ್ಪಿಸಿದೆ. ಈ ಬಗ್ಗೆ ಅದರ ಮಾಲೀಕರೇ ಮಾಹಿತಿ ನೀಡಿದ್ದಾರೆ.
ಏನಾಯ್ತು?: ಇಬ್ಬರು ದರೋಡೆಕೋರರು ರಾತ್ರಿ 2 ಗಂಟೆಯ ವೇಳೆ ಮನೆಗೆ ಕನ್ನ ಹಾಕಲು ಯತ್ನಿಸಿದ್ದಾರೆ. ಈ ವೇಳೆ, ಇದನ್ನರಿತ ಬ್ಯಾಂಡಿಟ್ ಎಂಬ ಹೆಸರಿನ ಬೆಕ್ಕು ಮನೆಯಲ್ಲಿ ಕಿರುಚಲು ಶುರು ಮಾಡಿದೆ. ಅಲ್ಲದೇ ಅಡುಗೆ ಮನೆಯಲ್ಲಿ ನೆಗೆದಾಡಿ, ಬಳಿಕ ಶಯನಗೃಹದಲ್ಲೆಲ್ಲ ಓಡಾಡಿದೆ. ಬಳಿಕ ಅದು ದರೋಡೆಕೋರರ ಮೇಲೆ ದಾಳಿ ಮಾಡಿ ತನ್ನ ಉಗುರಿನಿಂದ ಪರಿಚಿದೆ.
ಬೆಕ್ಕಿನ ಚೀರಾಟದಿಂದ ಎಚ್ಚರಗೊಂಡ ಮಾಲೀಕ ಎವರೆಟ್, ಬೆಕ್ಕು ಈ ರೀತಿ ಏಕೆ ವರ್ತಿಸುತ್ತಿದೆ ಎಂಬುದನ್ನು ತಿಳಿಯಲು ಎದ್ದು ಬಂದು ಪರಿಶೀಲಿಸಿದ್ದಾರೆ. ದರೋಡೆಕೋರರು ಹಿತ್ತಲ ಬಾಗಿಲನ್ನು ಮುರಿಯುತ್ತಿರುವುದನ್ನು ನೋಡಿದ್ದಾರೆ. ಇದರಲ್ಲಿ ಓರ್ವ ಕೈಯಲ್ಲಿ ಗನ್ ಹಿಡಿದಿದ್ದ. ಇದರಿಂದ ತಕ್ಷಣ ಎಚ್ಚೆತ್ತ ಎವರೆಟ್ ತನ್ನಲ್ಲಿದ್ದ ಗನ್ ಅನ್ನು ತಂದು ಬೆದರಿಸಿದ್ದಾನೆ. ದರೋಡೆಕೋರರು ಅಲ್ಲಿಂದ ಕಾಲ್ಕಿತ್ತಿದ್ದಾರೆ.
ಸೂಕ್ಷ್ಮಮತಿಯ ಬೆಕ್ಕು ಆಗಬಹುದಾದ ಅನಾಹುತವನ್ನು ಗುರುತಿಸಿ ತಪ್ಪಿಸಿದ್ದನ್ನು ಮಾಲೀಕರು ವಿಡಿಯೋ ಮಾಡಿ ಹರಿಬಿಟ್ಟಿದ್ದಾರೆ.
