ಇಸ್ಲಾಮಾಬಾದ್ (ಪಾಕಿಸ್ತಾನ) : ನೂರಾರು ಜನರನ್ನು ಬಲಿ ಪಡೆದ ಗ್ರೀಸ್ ಕರಾವಳಿಯಲ್ಲಿ ಸಂಭವಿಸಿದ ದೋಣಿ ದುರಂತಕ್ಕೆ ಗ್ರೀಕ್ ಕರಾವಳಿ ರಕ್ಷಕರೇ ಕಾರಣ ಎಂದು ದುರಂತದಲ್ಲಿ ಬದುಕುಳಿದ ಪಾಕಿಸ್ತಾನಿ ನಾಗರಿಕರು ಆರೋಪಿಸಿದ್ದಾರೆ. ನೂರಾರು ಜನರನ್ನು ಹೊತ್ತ ಹಡಗನ್ನು ಉದ್ದೇಶಪೂರ್ವಕವಾಗಿ ಮುಳುಗಲು ಬಿಡಲಯಾಯಿತು ಮತ್ತು ಯಾವುದೇ ರಕ್ಷಣಾ ಕಾರ್ಯಾಚರಣೆ ಮಾಡಲಿಲ್ಲ ಎಂದು ಅವರು ಗಂಭೀರ ಆರೋಪ ಮಾಡಿದ್ದಾರೆ.
ದುರಂತದ ಸಮಯದಲ್ಲಿ ಗ್ರೀಕ್ ಅಧಿಕಾರಿಗಳು ಅಮಾನವೀಯವಾಗಿ ವರ್ತಿಸಿದ್ದಾರೆ ಎಂದು ಸಂತ್ರಸ್ತರು ವೀಡಿಯೊ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ದೋಣಿ ಮುಳುಗಿದಾಗ ಅದರಲ್ಲಿ ಎಷ್ಟು ಜನ ಇದ್ದರು ಎಂಬುದರ ಬಗ್ಗೆ ಯುರೋಪ್‌ನ ಅಧಿಕಾರಿಗಳಿಗೆ ಇನ್ನೂ ಸ್ಪಷ್ಟ ಕಲ್ಪನೆ ಇಲ್ಲ. ಹಡಗಿನಲ್ಲಿ ಅಂದಾಜು 400 ರಿಂದ 700 ಕ್ಕಿಂತ ಹೆಚ್ಚು ಜನರಿದ್ದರು ಎಂದು ಅಂದಾಜಿಸಲಾಗಿದೆ. ಅದರಲ್ಲಿ ಪಾಕಿಸ್ತಾನದ ನೂರಾರು ಜನ ಇರುವ ಬಗ್ಗೆ ಅಂದಾಜಿಸಲಾಗಿದೆ. ದುರಂತ ಘಟನೆಯ ನಂತರ ಇಬ್ಬರು ಪಾಕಿಸ್ತಾನಿ ಬದುಕುಳಿದವರ ಹೇಳಿಕೆ ಬಹಿರಂಗವಾಗಿದೆ.
ಅವರು ಇದನ್ನು ಉದ್ದೇಶಪೂರ್ವಕವಾಗಿ ಮಾಡಿದ್ದಾರೆ. ಅವರೇ ಅದನ್ನು ಮುಳುಗಿಸಿದ್ದಾರೆ ಎಂದು ದುರಂತದಲ್ಲಿ ಬದುಕುಳಿದವರ ಪೈಕಿ ಓರ್ವ ಹೇಳಿದ್ದಾರೆ. ಐದು ಹಗಲು ಮತ್ತು ಆರು ರಾತ್ರಿಗಳ ಕಾಲ ಮುಳುಗದ ಹಡಗು ಅದೇ ಸಮಯದಲ್ಲಿ ಯಾಕೆ ಮುಳುಗಿತು ಎಂದು ಒಬ್ಬರು ಪ್ರಶ್ನಿಸಿದ್ದಾರೆ.
ಹಡಗಿನ ಇಂಜಿನ್ ಕೆಟ್ಟುಹೋಗಿತ್ತು ಹಾಗೂ ಅದರ ಮಧ್ಯೆ ಹಡಗು ಇನ್ನೂ ಒಂದು ವಾರ ಪ್ರಯಾಣಿಸಬೇಕಿತ್ತು ಎಂದು ಬದುಕುಳಿದ ಕೆಲವರು ಹೇಳಿದ್ದಾರೆ. "ನಮ್ಮ ಎಂಜಿನ್ ಸಂಪೂರ್ಣವಾಗಿ ಸ್ಥಗಿತಗೊಂಡಿದ್ದರೂ ಹಡಗು ಮುಳುಗಲಿಲ್ಲ. ಆರನೇ ರಾತ್ರಿ ನಾನು ಸಮಯವನ್ನು ಪರಿಶೀಲಿಸಿದೆ, ಆಗ 2:15 ಗಂಟೆಯಾಗಿತ್ತು. ಸುಮಾರು 10 ನಿಮಿಷಗಳ ನಂತರ ಅಂದರೆ ಸುಮಾರು 2:30 ಗಂಟೆಗೆ ಈ ಘಟನೆ ಸಂಭವಿಸಿದೆ ಎಂದು ಅವರು ಹೇಳಿದರು.
ಸ್ಥಳದಲ್ಲಿ ಎರಡು ಸ್ಪೀಡ್ ಬೋಟ್‌ಗಳು, ಒಂದು ಕಾರ್ಗೋ ಬೋಟ್ ಮತ್ತು ಒಂದು ರಿಸೀವ್ ಹಡಗು ಇದ್ದರೂ ಕೋಸ್ಟ್‌ಗಾರ್ಡ್‌ಗಳು ಸಹಾಯ ಮಾಡಲಿಲ್ಲ ಎಂದು ಅವರು ಆರೋಪಿಸಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಈ ಪ್ರದೇಶದಲ್ಲಿನ ಇತರ ಹಡಗುಗಳ ಚಲನೆಯ ವಿಶ್ಲೇಷಣೆಯು ಮುಳುಗುವ ಮೊದಲು ದೋಣಿ ಕನಿಷ್ಠ ಏಳು ಗಂಟೆಗಳ ಕಾಲ ಸ್ಥಿರವಾಗಿತ್ತು ಎಂದು ಕಂಡು ಬಂದಿದೆ.
ಕಳೆದ ವಾರ ಗ್ರೀಸ್‌ನ ಸಮುದ್ರದಲ್ಲಿ ಹಡಗು ಮುಳುಗಿ ಘಟಿಸಿದ ದುರಂತದಲ್ಲಿ 500 ಕ್ಕೂ ಹೆಚ್ಚು ಜನ ಸಾವಿಗೀಡಾಗಿದ್ದಾರೆ ಎಂದು ಹೇಳಲಾಗಿದೆ. ಓವರ್‌ಲೋಡ್ ಆಗಿದ್ದ ಹಡಗು ಮುಳುಗಿದ್ದರಿಂದ ನೂರಾರು ಪಾಕಿಸ್ತಾನಿಯರು ಸಾವನ್ನಪ್ಪಿದ್ದಾರೆ. ಪಾಕಿಸ್ತಾನಿ ವಲಸಿಗರ ಕಳ್ಳಸಾಗಣೆ ಆರೋಪಕ್ಕೆ ಸಂಬಂಧಿಸಿದಂತೆ ಪಾಕಿಸ್ತಾನದ ಅಧಿಕಾರಿಗಳು 14 ಜನರನ್ನು ಬಂಧಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಮಾನವ ಕಳ್ಳಸಾಗಣೆ ಜಾಲದ ಬಗ್ಗೆ ತನಿಖೆ ನಡೆಸಲು ಪಾಕಿಸ್ತಾನ ಸರ್ಕಾರ ಉನ್ನತ ಮಟ್ಟದ ತನಿಖೆಗೆ ಆದೇಶಿಸಿದೆ ಎಂದು ಪ್ರಧಾನಿ ಶೆಹಬಾಜ್ ಷರೀಫ್ ಅವರ ಕಚೇರಿ ಹೇಳಿಕೆ ತಿಳಿಸಿದೆ.
ಇದನ್ನೂ ಓದಿ : 2 ತಿಂಗಳಲ್ಲಿ 2,200 ಕಳೆದುಹೋದ ಮೊಬೈಲ್ ಫೋನ್ ಪತ್ತೆ ಮಾಡಿದ ತೆಲಂಗಾಣ ಪೊಲೀಸರು
