ಅಮೆರಿಕದಲ್ಲಿ ಏರ್​ ಶೋ ವೇಳೆ ವಿಮಾನ ಪತನ: ಪ್ಯಾರಾಚೂಟ್​ ಬಳಸಿ ಪ್ರಾಣ ಉಳಿಸಿಕೊಂಡ ಪೈಲಟ್​ಗಳು!

ಅಮೆರಿಕದ ಮಿಚಗನ್​ನಲ್ಲಿ ಏರ್​ ಶೋ ವೇಳೆ ವಿಮಾನ ಪತನಕ್ಕೀಡಾಗಿದೆ. ಪ್ಯಾರಾಚೂಟ್​ ಬಳಸಿ ಇಬ್ಬರು ಪೈಲಟ್​ಗಳು ಜೀವ ಉಳಿಸಿಕೊಂಡಿದ್ದಾರೆ.

ವಾಷಿಂಗ್ಟನ್ ಡಿಸಿ (ಅಮೆರಿಕ) : ಅಮೆರಿಕದ ಮಿಚಿಗನ್ ರಾಜ್ಯದಲ್ಲಿ ಏರ್ ಶೋ ವೇಳೆ ವಿಮಾನವೊಂದು ಪತನಗೊಂಡಿದೆ. ಇಬ್ಬರು ಪೈಲಟ್​​ಗಳು ಪ್ಯಾರಾಚೂಟ್​ ಬಳಸಿ ವಿಮಾನದಿಂದ ಹಾರಿ ಪ್ರಾಣ ಉಳಿಸಿಕೊಂಡಿದ್ದಾರೆ. ವಿಮಾನ ಅಪಾರ್ಟ್​ಮೆಂಟ್​ವೊಂದರ ಪಾರ್ಕಿಂಗ್​ ಸ್ಥಳದಲ್ಲಿ ಬಿದ್ದು ನಾಶವಾಗಿದೆ.

ಮಿಚಗನ್​ನಲ್ಲಿ ಭಾನುವಾರ ಸಂಜೆ 4 ಗಂಟೆ ಸುಮಾರಿನಲ್ಲಿ ವಿಮಾನ ಹಾರಾಟ ಪ್ರದರ್ಶನ ಹಮ್ಮಿಕೊಳ್ಳಲಾಗಿತ್ತು. ಹಲವು ಜೆಟ್​ಗಳು ಆಕಾಶದಲ್ಲಿ ಸಾಹಸ ಪ್ರದರ್ಶನ ಮಾಡುತ್ತಿದ್ದವು. ಈ ವೇಳೆ ಮಿಗ್​-23 ಜೆಟ್​ ಹಾರಾಟ ನಡೆಸುತ್ತಿದ್ದಾಗ ಅಚಾನಕ್ಕಾಗಿ ತಾಂತ್ರಿಕ ಸಮಸ್ಯೆಗೆ ಸಿಲುಕಿದೆ. ಪೈಲಟ್​ಗಳು ಜೆಟ್​ ಅನ್ನು ಲ್ಯಾಂಡಿಂಗ್​ ಮಾಡಲು ಯತ್ನಿಸಿದರೂ, ಅದು ಹಿಡಿತಕ್ಕೆ ಸಿಕ್ಕಿಲ್ಲ. ಪತನದ ಸುಳಿವು ಸಿಕ್ಕಾಗ ಅವರು ವಿಮಾನದಿಂದ ಹಾರಿದ್ದಾರೆ.

ಜೀವ ಉಳಿಸಿದ ಪ್ಯಾರಾಚೂಟ್​: ವಿಮಾನ ಹೊಯ್ದಾಡುತ್ತಾ ಭೂಮಿ ಕಡೆ ರಭಸವಾಗಿ ಬರುತ್ತಿದ್ದಾಗ ಪೈಲಟ್​ಗಳು ಪ್ಯಾರಾಚೂಟ್​ ಬಳಸಿ ವಿಮಾನದಿಂದ ಎಜೆಕ್ಟ್​ ಆಗಿದ್ದಾರೆ. ನಗರದ ಸಮೀಪದ ಬೆಲ್ಲೆವಿಲ್ಲೆ ಸರೋವರದಲ್ಲಿ ಅವರು ಲ್ಯಾಂಡ್​ ಆಗಿದ್ದಾರೆ ಎಂದು ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (ಎಫ್‌ಎಎ) ತಿಳಿಸಿದೆ. ಇಬ್ಬರು ಪೈಲಟ್​ಗಳನ್ನು ರಕ್ಷಿಸಲಾಗಿದೆ. ಅವರು ಯಾವುದೇ ಗಂಭೀರ ಗಾಯಗೊಂಡಿಲ್ಲವಾದರೂ, ಮುನ್ನೆಚ್ಚರಿಕೆ ಕ್ರಮವಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ವೇಯ್ನ್ ಕೌಂಟಿ ವಿಮಾನ ನಿಲ್ದಾಣ ಪ್ರಾಧಿಕಾರ ತಿಳಿಸಿದೆ.

ಅಪಾರ್ಟ್​ಮೆಂಟ್​ನಲ್ಲಿ ವಿಮಾನ ಪತನ: ಇನ್ನು ತಾಂತ್ರಿಕ ಸಮಸ್ಯೆಯಿಂದ ವಿಮಾನ ನಗರದ ಅಪಾರ್ಟ್​ಮೆಂಟ್​ವೊಂದರ ಬಳಿಕ ಪತನವಾಗಿದೆ. ಪಾರ್ಕಿಂಗ್​ ಸ್ಥಳದಲ್ಲಿ ಅದು ಬಿದ್ದ ಕಾರಣ ಹಲವು ವಾಹನಗಳು ಹಾನಿಗೀಡಾಗಿವೆ. ಅಲ್ಲದೇ ಸ್ಥಳದಲ್ಲಿದ್ದ ಕಾವಲು ಸಿಬ್ಬಂದಿಯೊಬ್ಬರು ಕೂಡ ಗಾಯಗೊಂಡಿದ್ದಾರೆ. ಅವರನ್ನೂ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಏರ್​ ಶೋ ಸ್ಥಗಿತ: ವಿಮಾನ ಪತನದಿಂದ ಆತಂಕದ ವಾತಾವರಣ ಸೃಷ್ಟಿಯಾದ ಹಿನ್ನೆಲೆಯಲ್ಲಿ ಏರ್​ ಶೋವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಈ ಬಗ್ಗೆ ಸಂಘಟಕರು ಹೆಚ್ಚಿನ ಮಾಹಿತಿ ಹಂಚಿಕೊಂಡಿಲ್ಲ. ಯಾವುದೇ ದೊಡ್ಡ ಅವಘಢ ಸಂಭವಿಸಿಲ್ಲವಾದರೂ, ಪ್ರದರ್ಶನವನ್ನು ನಿಲ್ಲಿಸಲಾಗಿದೆ. ಜನರು ಇದಕ್ಕೆ ಸ್ಪಂದಿಸಬೇಕು ಎಂದು ಕೋರಿದ್ದಾರೆ. ಇನ್ನು ವಿಮಾನ ಪತನದ ಕಾರಣದ ಬಗ್ಗೆ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ ಮತ್ತು ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (ಎನ್​ಟಿಬಿಸಿ) ತನಿಖೆ ನಡೆಸುತ್ತಿವೆ.

ಕಾಡ್ಗಿಚ್ಚು ನಂದಿಸುವಾಗ ವಿಮಾನ ಪತನ: ಗ್ರೀಸ್​ ದೇಶದಲ್ಲಿ ಕಾಡ್ಗಿಚ್ಚು ನಂದಿಸುವಾಗ ವಿಮಾನ ಪತನವಾಗಿ ಗ್ರೀಕ್ ವಾಯುಪಡೆಯ ಇಬ್ಬರು ಪೈಲಟ್‌ಗಳು ​ದಾರುಣ ಅಂತ್ಯ ಕಂಡಿದ್ದರು. ಬೆಂಕಿಗೆ ನೀರು ಹಾಯಿಸುತ್ತಿರುವಾಗ ವಿಮಾನವು ಮರಕ್ಕೆ ಡಿಕ್ಕಿ ಹೊಡೆದು ಸ್ವಲ್ಪ ದೂರ ತೆರಳಿ ಪತನವಾಗಿತ್ತು.

ಅಗ್ನಿ ಶಮನ ಕಾರ್ಯಾಚರಣೆಯ ಸಂದರ್ಭದಲ್ಲಿ ವಾಟರ್ ಬಾಂಬಿಂಗ್​ ವಿಮಾನವಾದ ಕೆನಡೈರ್ ಸಿಎಲ್ -215 ಪತನಗೊಂಡಿತ್ತು. ಘಟನಾ ಸ್ಥಳದಲ್ಲಿ ಶೋಧ ಕಾರ್ಯಾಚರಣೆ ನಡೆಸಿದಾಗ ಪೈಲಟ್​ಗಳಿಬ್ಬರ ಸುಟ್ಟು ಕರಕಲಾದ ಶವ ದೊರಕಿತ್ತು.

ಇದನ್ನೂ ಓದಿ: ಹಿಮಾಚಲದ ಸೋಲನ್‌ನಲ್ಲಿ ಮೇಘಸ್ಫೋಟ: ಒಂದೇ ಕುಟುಂಬದ 7 ಮಂದಿ ಬಲಿ, ಮೂವರು ನಾಪತ್ತೆ!