ಢಾಕಾ: ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿ (ಬಿಎನ್ಪಿ) ಕರೆ ನೀಡಿರುವ 48 ಗಂಟೆಗಳ ರಾಷ್ಟ್ರವ್ಯಾಪಿ ಬಂದ್ ಆರಂಭವಾಗುವುದಕ್ಕೂ ಮುಂಚೆ ಢಾಕಾ ಮತ್ತು ದೇಶದ ಇತರ ಭಾಗಗಳಲ್ಲಿ 10ಕ್ಕೂ ಹೆಚ್ಚು ಬಸ್ಗಳಿಗೆ ಬೆಂಕಿ ಹಚ್ಚಲಾಗಿದೆ. ಅಲ್ಲದೆ ಢಾಕಾದಲ್ಲಿ ನಡೆದ ವಿಧ್ವಂಸಕ ಕೃತ್ಯ, ಹಿಂಸಾಚಾರ ಮತ್ತು ಪೊಲೀಸರ ಹತ್ಯೆ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಬಾಂಗ್ಲಾದೇಶದ ಮಾಜಿ ಗೃಹ ಸಚಿವ ಮತ್ತು ಪ್ರಸ್ತುತ ಬಿಎನ್ಪಿ ಉಪಾಧ್ಯಕ್ಷ, ಏರ್ ವೈಸ್ ಮಾರ್ಷಲ್ (ನಿವೃತ್ತ) ಅಲ್ತಾಫ್ ಹುಸೇನ್ ಚೌಧರಿ ಅವರನ್ನು ಬಂಧಿಸಲಾಗಿದೆ.
ಪೊಲೀಸ್ ಕಾನ್ಸ್ಟೆಬಲ್ ಅಮಿರುಲ್ ಇಸ್ಲಾಂ ಪರ್ವೇಜ್ ಹತ್ಯೆ ಪ್ರಕರಣದಲ್ಲಿ ಬಿಎನ್ಪಿ ಸ್ಥಾಯಿ ಸಮಿತಿ ಸದಸ್ಯ ಮತ್ತು ಮಾಜಿ ವಾಣಿಜ್ಯ ಸಚಿವ ಅಮೀರ್ ಖೋಸ್ರು ಮಹಮೂದ್ ಚೌಧರಿ ಮತ್ತು ಬಿಎನ್ಪಿ ಮಾಧ್ಯಮ ಘಟಕದ ಸಂಚಾಲಕ ಜಹೀರ್ ಉದ್ದೀನ್ ಸ್ವಪನ್ ಅವರನ್ನು ಢಾಕಾ ನ್ಯಾಯಾಲಯ ಆರು ದಿನಗಳ ಪೊಲೀಸ್ ಕಸ್ಟಡಿಗೆ ನೀಡಿದೆ. ಇದಕ್ಕೂ ಮುನ್ನ ಶನಿವಾರ ಸಂಜೆ 7:30 ರಿಂದ 8 ಗಂಟೆಯ ನಡುವೆ ಎಲಿಫೆಂಟ್ ರಸ್ತೆ, ನ್ಯೂಮಾರ್ಕೆಟ್ ಮತ್ತು ಸೈದಾಬಾದ್ ಪ್ರದೇಶಗಳಲ್ಲಿ ಮೂರು ಬಸ್ಸುಗಳಿಗೆ ಬೆಂಕಿ ಹಚ್ಚಲಾಗಿದೆ.
ಗಲಭೆಕೋರರು ನ್ಯೂಮಾರ್ಕೆಟ್ ಪ್ರದೇಶದ ಗೌಚಿಯಾ ಮಾರುಕಟ್ಟೆಯ ಬಳಿ ಮಿರ್ಪುರ್ ಲಿಂಕ್ ಬಸ್ ಗೆ ಬೆಂಕಿ ಹಚ್ಚಿದ್ದಾರೆ ಎಂದು ತಿಳಿದುಬಂದಿದೆ. ಮಾಹಿತಿ ಪಡೆದ ನಂತರ, ಅಗ್ನಿಶಾಮಕ ಸೇವೆಯ ಎರಡು ಘಟಕಗಳು ಸ್ಥಳಕ್ಕೆ ಧಾವಿಸಿ ಬೆಂಕಿಯನ್ನು ನಿಯಂತ್ರಣಕ್ಕೆ ತಂದವು. ಇದಾಗಿ ಐದು ನಿಮಿಷಗಳ ನಂತರ, ಎಲಿಫೆಂಟ್ ರಸ್ತೆಯ ಮಲ್ಟಿಪ್ಲಾನ್ ಸಿಟಿ ಸೆಂಟರ್ ಮುಂದೆ ಗ್ರೀನ್ ಯೂನಿವರ್ಸಿಟಿ ಬಸ್ ಗೆ ಬೆಂಕಿ ಹಚ್ಚಲಾಯಿತು. ನಂತರ ಸೈದಾಬಾದ್ ಟೌನ್ಶಿಪ್ ಜಂಕ್ಷನ್ನ ಫ್ಲೈಓವರ್ ಕೆಳಗೆ ಮತ್ತೊಂದು ಬಸ್ಗೆ ಬೆಂಕಿ ಹಚ್ಚಲಾಗಿದೆ.
ಬಿಎನ್ಪಿ ಮತ್ತು ಜಮಾತ್-ಎ-ಇಸ್ಲಾಮಿ ಕರೆ ನೀಡಿದ ಮೂರು ದಿನಗಳ ಬಂದ್ ಸಮಯದಲ್ಲಿ ದೇಶಾದ್ಯಂತ 34 ಅಗ್ನಿಸ್ಪರ್ಶದ ಘಟನೆಗಳು ವರದಿಯಾಗಿವೆ ಎಂದು ಅಗ್ನಿಶಾಮಕ ಸೇವೆಯ ಮಾಧ್ಯಮ ಸೆಲ್ ಶುಕ್ರವಾರ (ನವೆಂಬರ್ 3) ವರದಿ ಮಾಡಿದೆ. ಫೆನಿಯಲ್ಲಿ ಸಕ್ಕರೆ ಸಾಗಿಸುತ್ತಿದ್ದ ಟ್ರಕ್ಗೆ ಬೆಂಕಿ ಹಚ್ಚಿದ ಆರೋಪದ ಮೇಲೆ ಬಿಎನ್ ಪಿ ಯುವ ಘಟಕ ಜೂಡೋ ದಳದ ಮುಖಂಡ ಮೊಹಮ್ಮದ್ ರುಬೆಲ್ (30) ಅವರನ್ನು ಶನಿವಾರ ಬಂಧಿಸಲಾಗಿದೆ.
ಮುಂದಿನ ವರ್ಷದ ಜನವರಿಯಲ್ಲಿ ದೇಶದಲ್ಲಿ ಸಾರ್ವತ್ರಿಕ ಚುನಾವಣೆಗಳು ನಡೆಯಲಿದ್ದು, ಅದಕ್ಕೂ ಮುನ್ನ ರಾಜಕೀಯ ಪ್ರೇರಿತ ಗಲಭೆಗಳು ಹಾಗೂ ಹಿಂಸಾಚಾರದಿಂದ ಬಾಂಗ್ಲಾದೇಶ ತತ್ತರಿಸಿದೆ. ಪ್ರಧಾನಿ ಶೇಖ್ ಹಸೀನಾ ರಾಜೀನಾಮೆಗೆ ಆಗ್ರಹಿಸಿ ಪ್ರಮುಖ ವಿರೋಧ ಪಕ್ಷ ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿ (ಬಿಎನ್ಪಿ) ಪ್ರತಿಭಟನೆ ತೀವ್ರಗೊಳಿಸಿದೆ. ಬಿಎನ್ಪಿ ಮತ್ತು ಅದರ ಮಿತ್ರಪಕ್ಷಗಳು ಸಾರ್ವತ್ರಿಕ ಚುನಾವಣೆಗೆ ಮುಂಚಿತವಾಗಿ ದೇಶದಲ್ಲಿ ತಟಸ್ಥ ಮಧ್ಯಂತರ ಸರ್ಕಾರವನ್ನು ಬಯಸುತ್ತಿವೆ. ಶ್ರೀಮತಿ ಹಸೀನಾ ಅವರ ಅಡಿಯಲ್ಲಿ ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆಗಳು ಸಾಧ್ಯವಿಲ್ಲ ಎಂಬುದು ಅವುಗಳ ವಾದವಾಗಿದೆ. ಆದರೆ ಹಸೀನಾ ಅವರ ಅವಾಮಿ ಲೀಗ್ ನೇತೃತ್ವದ ಸರ್ಕಾರ ಈ ಬೇಡಿಕೆಯನ್ನು ತಿರಸ್ಕರಿಸಿದೆ.
ಇದನ್ನೂ ಓದಿ: ಅಫ್ಘನ್ ನಿರಾಶ್ರಿತರನ್ನು ಹೊರಹಾಕಲಾರಂಭಿಸಿದ ಪಾಕಿಸ್ತಾನ; ಟೋರ್ಖಾಮ್ ಗಡಿಯಲ್ಲಿ ಭಾರಿ ಜನದಟ್ಟಣೆ
