ಟೋಕಿಯೋ(ಜಪಾನ್): ಜಪಾನ್ ಪ್ರಧಾನಿಯಾಗಿದ್ದ ಯೋಶಿಹಿದ್ ಸುಗಾ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದ ಕಾರಣ ಇದೀಗ ಹೊಸ ಪ್ರಧಾನಿ ಆಯ್ಕೆ ಮಾಡಲಾಗಿದ್ದು, ಅಲ್ಲಿನ ಮಾಜಿ ವಿದೇಶಾಂಗ ಸಚಿವರಿಗೆ ಮಣೆ ಹಾಕಲಾಗಿದೆ. ಇಂದು ಬೆಳಗ್ಗೆ ಸಂಸತ್ನಲ್ಲಿ ಆಡಳಿತರೂಢ ಲಿಬರಲ್ ಡೆಮಾಕ್ರಟಿಕ್ ಪಾರ್ಟಿ, ಮಾಜಿ ವಿದೇಶಾಂಗ ಸಚಿವರಾಗಿದ್ದ ಫುಮಿಯೋ ಕಿಶಿದಾ ಅವರನ್ನ ಆಯ್ಕೆ ಮಾಡಿದೆ.
ಜಪಾನ್ ಸಂಸತ್ನಲ್ಲಿ ಇಂದು ಬೆಳಗ್ಗೆ ನಡೆದ ಸಭೆಯಲ್ಲಿ ಆಡಳಿತಾರೂಢ ಲಿಬರಲ್ ಡೆಮಾಕ್ರಟಿಕ್ ಪಾರ್ಟಿ ಸದಸ್ಯರು ಒಮ್ಮತದಿಂದ ಇವರ ಹೆಸರು ಅಂತಿಮಗೊಳಿಸಿದ್ದಾರೆ. ಈ ಹಿಂದೆ ಜಪಾನ್ ಪ್ರಧಾನಿಯಾಗಿದ್ದ ಯೋಶಿಹಿದ್ ಸುಗಾ ಅವರು ಜಪಾನ್ನಲ್ಲಿ ಕೊರೊನಾ ನಿಯಂತ್ರಣ ಹಾಗೂ ಒಲಿಂಪಿಕ್ಸ್ ಆಯೋಜನೆಗೆ ತೀವ್ರ ವಿರೋಧ ವ್ಯಕ್ತವಾಗಿತ್ತು. ಹೀಗಾಗಿ ಕೇವಲ ಒಂದೇ ವರ್ಷದಲ್ಲಿ ಅವರು ಪದತ್ಯಾಗ ಮಾಡಿದ್ದಾರೆ.
ಹೊಸ ಪ್ರಧಾನಿಗೆ ಸವಾಲುಗಳ ಮೇಲೆ ಸವಾಲು
ಇದೀಗ ನೂತನ ಪ್ರಧಾನಿಯಾಗಿ ಆಯ್ಕೆಯಾಗಿರುವ ಕಿಶಿದಾ ಅವರಿಗೆ ಕೋವಿಡ್ನಿಂದ ಜರ್ಜರಿತವಾದ ಆರ್ಥಿಕತೆ, ಚೀನಾ ಮತ್ತು ಉತ್ತರ ಕೊರಿಯಾದಿಂದ ಇರುವ ಭದ್ರತೆ ಬೆದರಿಕೆ ಸೇರಿದಂತೆ ಅನೇಕ ಸಮಸ್ಯೆ ಎದುರಿಸಬೇಕಾದ ಅನಿವಾರ್ಯತೆ ಇದೆ. ರಾಜಮನೆತನದಲ್ಲಿ ನಡೆದ ಸಮಾರಂಭದಲ್ಲಿ ಕಿಶಿದಾ ಅವರು ಪ್ರಮಾಣ ವಚನ ಸ್ವೀಕಾರ ಮಾಡಿದ್ದು, ಬರುವ ಶುಕ್ರವಾರ ಸಂಸತ್ನಲ್ಲಿ ಭಾಷಣ ಮಾಡುವ ಸಾಧ್ಯತೆ ಇದೆ.
ಇದನ್ನೂ ಓದಿರಿ: ಡೆಲ್ಲಿ ಏರ್ಪೋರ್ಟ್ನ ಬ್ರಿಡ್ಜ್ ಕೆಳಗೆ ಸಿಕ್ಕಿಕೊಂಡ ಏರ್ ಇಂಡಿಯಾ ವಿಮಾನ.. ವಿಡಿಯೋ ನೋಡಿ
ಕಿಶಿದಾ ಸಂಪುಟದಲ್ಲಿ ಹೊಸ ಮುಖಗಳಿಗೆ ಅವಕಾಶ ನೀಡಲು ನಿರ್ಧರಿಸಲಾಗಿದ್ದು, ಕೇವಲ ಇಬ್ಬರು ಕ್ಯಾಬಿನೆಟ್ ಸದಸ್ಯರನ್ನ ಹೊರತುಪಡಿಸಿ, 13 ಮಂದಿಗೆ ಹೊಸದಾಗಿ ಅವಕಾಶ ನೀಡಲಾಗಿದೆ ಎಂದು ಕ್ಯಾಬಿನೆಟ್ ಕಾರ್ಯದರ್ಶಿ ಹಿರೊಕಾಜು ತಿಳಿಸಿದ್ದಾರೆ.
