ಮಾಸ್ಕೋ : ಸಾಂವಿಧಾನಿಕ ತಿದ್ದುಪಡಿ ಅಂಗೀಕಾರವಾದರೆ ಮತ್ತೊಂದು ಅಧ್ಯಕ್ಷೀಯ ಅವಧಿಗೆ ಸ್ಪರ್ಧಿಸುವ ಸಾಧ್ಯತೆಯನ್ನು ತಳ್ಳಿಹಾಕುವುದಿಲ್ಲ ಎಂದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹೇಳಿದ್ದಾರೆ.
ನಾನು ಇನ್ನೂ ಏನನ್ನೂ ನಿರ್ಧರಿಸಿಲ್ಲ. ಇನ್ನೊಂದು ಅವಧಿಗೆ ಸ್ಪರ್ಧಿಸುವ ಸಾಧ್ಯತೆ ಇಲ್ಲ ಎನ್ನುವುದಿಲ್ಲ . ಸಂವಿಧಾನ ಅವಕಾಶ ನೀಡಿದರೆ ನಾವು ನೋಡುತ್ತೇವೆ ಎಂದು ಪುಟಿನ್ ಭಾನುವಾರ ಪ್ರಸಾರ ಮಾಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ. ಅಲ್ಲದೇ, ಕೆಲಸ ಮಾಡುವುದು ಅವಶ್ಯಕ, ಉತ್ತರಾಧಿಕಾರಿಗಳನ್ನು ಹುಡುಕಬಾರದು ಎಂದಿದ್ದಾರೆ.
ಜುಲೈ 1 ರಂದು ರಷ್ಯಾವು ಸಾಂವಿಧಾನಿಕ ತಿದ್ದುಪಡಿಗಳ ಬಗ್ಗೆ ಜನಾಭಿಪ್ರಾಯ ಸಂಗ್ರಹಿಸಲಿದೆ. ಜನಾಭಿಪ್ರಾಯದಲ್ಲಿ ಮಸೂದೆ ಅಂಗೀಕಾರವಾದರೆ, ಪುಟಿನ್ 2024 ರ ಅಧ್ಯಕ್ಷೀಯ ಸ್ಪರ್ಧೆಯಲ್ಲಿ ಭಾಗವಹಿಸಲು ಸಾಧ್ಯವಾಗುತ್ತದೆ. ಈಗಿನ ನಿಯಮದಂತೆ ಎರಡು ಬಾರಿ ಮಾತ್ರ ಸತತವಾಗಿ ಒಬ್ಬ ವ್ಯಕ್ತಿ ಚುನಾವಣೆಗೆ ಸ್ಪರ್ಧಿಸಬಹುದಾಗಿದೆ. 1999 ರಿಂದ ಅಧಿಕಾರದಲ್ಲಿರುವ ಪುಟಿನ್ ಎರಡು ಬಾರಿ ಅಧ್ಯಕ್ಷರಾದ ಬಳಿಕ, ಮೂರನೇ ಅವಧಿಗೆ ಸ್ಪರ್ಧಿಸಿರಲಿಲ್ಲ. ಆಗ ತಮ್ಮ ಬಂಟ ಮೆಡ್ವೆಡೇವ್ ಅವರನ್ನ ಅಧ್ಯಕರನ್ನಾಗಿ ಮಾಡಿ ತಾವು ಪ್ರಧಾನಿಗಳಾಗಿದ್ದರು.
ಅದಾದ ಬಳಿಕ ಈಗ ಮತ್ತೆ ಎರಡು ಬಾರಿ ಅಧ್ಯಕ್ಷರಾಗಿ ಆಯ್ಕೆ ಆಗಿದ್ದಾರೆ. ರಷ್ಯಾದ ಸಂವಿಧಾನದ ಪ್ರಕಾರ ಮತ್ತೆ ಅಧ್ಯಕ್ಷೀಯ ಚುನಾವಣೆಗೆ ನಿಲ್ಲಲು ಸಾಧ್ಯವಿಲ್ಲ. ಪರಿಣಾಮ ಪುಟಿನ್ ಸಂವಿಧಾನದ ಬದಲಾವಣೆಗೆ ಕೈ ಹಾಕಿದ್ದಾರೆ.
