ಪ್ಯಾರಿಸ್ (ಫ್ರಾನ್ಸ್): ರೂಪಾಂತರಗೊಂಡ ಕೊರೊನಾ ವೈರಸ್ನಿಂದ ರಕ್ಷಿಸಿಕೊಳ್ಳಲು ಯೂರೋಪಿನ ಹಲವು ರಾಷ್ಟ್ರಗಳು ತಮ್ಮದೇ ಆದ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳುತ್ತಿವೆ. ಇದರಿಂದಾಗಿ ಇಂಗ್ಲೆಂಡಿನೊಂದಿಗೆ ಕೆಲವು ವ್ಯಾಪಾರ ಸಂಬಂಧಗಳನ್ನು ಕೂಡಾ ಹಲವು ರಾಷ್ಟ್ರಗಳು ಕಡಿದು ಕೊಂಡಿವೆ.
ಭಾನುವಾರ ಮಧ್ಯರಾತ್ರಿಯಿಂದ ಜಾರಿಗೆ ಬರುವಂತೆ ಫ್ರಾನ್ಸ್ ಎಲ್ಲ ರೀತಿಯ ಸಾರಿಗೆ ಮಾರ್ಗಗಳನ್ನು ಇಂಗ್ಲೆಂಡ್ನೊಂದಿಗೆ ಸ್ಥಗಿತಗೊಳಿಸಿದೆ. ಇದರಲ್ಲಿ ಡೋವರ್ ಇಂಗ್ಲೆಂಡ್ ದಕ್ಷಿಣ ಕರಾವಳಿಯಿಂದ ಇಂಗ್ಲಿಷ್ ಕಾಲುವೆಯ ಸುರಂಗದ ಮೂಲಕ ಫ್ರಾನ್ಸ್ಗೆ ಸಾಗಾಟವಗುತ್ತಿದ್ದ ಟ್ರಕ್ಗಳೂ ಕೂಡಾ ಸೇರಿವೆ. ಸುಮಾರು 48 ಗಂಟೆಗಳ ಕಾಲ ಇವುಗಳಿಗೆ ನಿಷೇಧ ಹೇರಲಾಗುತ್ತದೆ.
ಸಾರಿಗೆಯನ್ನು ನಿರ್ಬಂಧಿಸಿರುವ ಈ ವೇಳೆ ರೂಪಾಂತರಗೊಂಡ ಕೊರೊನಾ ವೈರಸ್ ಅನ್ನು ತಡೆಯುವುದು ಹೇಗೆ ಎಂಬುದರ ಬಗ್ಗೆ ಚರ್ಚೆ ಮಾಡಲಾಗುತ್ತದೆ. ಇದು ಸಾಮಾನ್ಯ ನಿಯಮ ಎಂದು ಫ್ರೆಂಚ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಆದರೆ, ಈಗಾಗಲೇ ಸಾಗಾಟವಾಗುತ್ತಿರುವ ಸರಕುಗಳನ್ನು ಹೊಂದಿರುವ ಟ್ರಕ್ಗಳ ಚಾಲಕರಿಗೆ ಈ ನಿರ್ಧಾರದಿಂದ ಗೊಂದಲವಾಗಿದೆ.
ಇದನ್ನೂ ಓದಿ: ರೂಪಾಂತರವಾದ ಕೊರೊನಾ ವೈರಸ್: ಡಿ. 31ರವರೆಗೆ ಭಾರತ-ಬ್ರಿಟನ್ ವಿಮಾನ ಸೇವೆ ರದ್ದು
ಈ ಬಗ್ಗೆ ಪೋರ್ಟ್ ಆಫ್ ಡೋವರ್ ಟ್ವೀಟ್ ಮಾಡಿದ್ದು, ಫ್ರಾನ್ಸ್ನಲ್ಲಿ ಗಡಿ ನಿರ್ಬಂಧದಿಂದಾಗಿ ಮುಂದಿನ ಸೂಚನೆ ಬರುವವರೆಗೆ ಎಲ್ಲ ರೀತಿಯ ಸಂಚಾರವನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಸ್ಪಷ್ಟನೆ ನೀಡಿದೆ.
ಹಾಂಕಾಂಗ್ ಕೂಡಾ ಬ್ರಿಟನ್ನಿಂದ ಬರುವ ವಿಮಾನಗಳಿಗೆ ತಡೆಯೊಡ್ಡಿದೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಅಲ್ಲಿನ ಆರೋಗ್ಯ ಮಂತ್ರಿ ಸೋಫಿಯಾ ಚಾನ್ ಹೊಸ ರೂಪಾಂತರಗೊಂಡ ವೈರಸ್ ಅನ್ನು ತಡೆಯಲು ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ಇತ್ತೀಚೆಗೆ ಇಂಗ್ಲೆಂಡ್ನಿಂದ ಬಂದ ವಿಮಾನಗಳಲ್ಲಿನ ಪ್ರಯಾಣಿಕರಿಗೆ 21 ದಿನಗಳ ಕಾಲ ಕ್ವಾರಂಟೈನ್ ವಿಧಿಸಲಾಗುತ್ತದೆ ಎಂದು ಸ್ಪಷ್ಟನೆ ನೀಡಿದ್ದಾರೆ. ಹಾಂಕಾಂಗ್ ಮಾತ್ರವಲ್ಲದೇ ಜರ್ಮನಿ, ಬೆಲ್ಜಿಯಂ, ಇಟಲಿ, ಐರ್ಲೆಂಡ್, ಕೆನಡಾ, ನೆದರ್ಲ್ಯಾಂಡ್ ಕೂಡಾ ಇಂಗ್ಲೆಂಡ್ನೊಂದಿಗೆ ಸಂಪರ್ಕ ಕಡಿದುಕೊಂಡಿವೆ.
