ಕೀವ್(ಉಕ್ರೇನ್): ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಹತ್ಯೆಗೆ ರಷ್ಯಾ ಭಾರಿ ಸ್ಕೆಚ್ ಹಾಕಿದೆ. ಇದಕ್ಕಾಗಿ ನುರಿತ ಶಶ್ತ್ರಸಜ್ಜಿತ ಪಡೆಯನ್ನು ಕೀವ್ಗೆ ರವಾನಿಸಿದೆ. ಕೀವ್ನ ರಾಷ್ಟ್ರೀಯ ಭದ್ರತೆ ಮತ್ತು ರಕ್ಷಣಾ ಮಂಡಳಿಯ ಕಾರ್ಯದರ್ಶಿ ಒಲೆಕ್ಸಿ ಡ್ಯಾನಿಲೋವ್ ಈ ಬಗ್ಗೆ ಮಾಹಿತಿ ನೀಡಿದ್ದು, ರಷ್ಯಾದ ಈ ಕಾರ್ಯಾಚರಣೆಯನ್ನು ಉಕ್ರೇನ್ ತೀವ್ರವಾಗಿ ತೆಗೆದುಕೊಂಡಿದ್ದು, ಎಲ್ಲ ಆಯಾಮಗಳಿಂದಲೂ ಕಣ್ಣಿಟ್ಟಿದ್ಧೇವೆ ಎಂದು ಹೇಳಿದ್ದಾರೆ.
ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಕೊಲ್ಲಲು ಉಕ್ರೇನ್‌ಗೆ ಕಳುಹಿಸಲಾದ ಚೆಚೆನ್ ಹೋರಾಟ ಘಟಕವನ್ನು ಉಕ್ರೇನ್ ವ್ಯವಸ್ಥಿತವಾಗಿ ತಟಸ್ಥಗೊಳಿಸಿದೆ ಎಂದು ವರದಿಗಳು ದೃಢಪಡಿಸಿವೆ. ಒಲೆಕ್ಸಿ ಡ್ಯಾನಿಲೋವ್ ದೂರದರ್ಶನದಲ್ಲಿ ಮಾಡಿದ ಭಾಷಣದ ವೇಳೆ ಈ ವಿಷಯ ಪ್ರಸ್ತಾಪಿಸಿದ್ದು, ರಷ್ಯಾದ ನುರಿತ ಪಡೆಯನ್ನು ನಾವು ಸಮರ್ಥವಾಗಿ ತಡೆದು ಹಿಮ್ಮೆಟ್ಟಿಸಿದ್ದು, ಅದರ ಯೋಜನೆಗಳನ್ನು ವಿಫಲಗೊಳಿಸಿದ್ದೇವೆ ಎಂದು ಹೇಳಿಕೊಂಡಿದ್ದಾರೆ.
ಉಕ್ರೇನ್ ಟಿವಿ ಚಾನೆಲ್‌ವೊಂದರಲ್ಲಿ ಮಾತನಾಡಿದ ಉಕ್ರೇನ್ ರಕ್ಷಣಾ ಕಾರ್ಯದರ್ಶಿ ಡ್ಯಾನಿಲೋವ್, ಕದಿರೋವ್ ಪಡೆಗಳು ನಡೆಸಲಿರುವ ವಿಶೇಷ ಕಾರ್ಯಾಚರಣೆಯ ಬಗ್ಗೆ ನಮಗೆ ಅರಿವಿದ್ದು, ಅದನ್ನು ಹಿಮ್ಮೆಟ್ಟಿಸಲು ಬೇಕಾಗಿರುವ ಎಲ್ಲ ಕ್ರಮಗಳನ್ನು ತೆಗೆದುಕೊಂಡಿದ್ದೇವೆ ಎಂದು ಹೇಳಿದ್ದಾರೆ. ನಾವು ನಮ್ಮ ಅಧ್ಯಕ್ಷರ ಜೀವ ಬಲಿಕೊಡಲು ಇಷ್ಟ ಪಡಲ್ಲ, ಉಕ್ರೇನ್ನ ಇಂಚು ಜಾಗವನ್ನು ಯಾರಿಗೂ ಬಿಟ್ಟುಕೊಡಲ್ಲ, ನೀವು ಇಲ್ಲಿಂದ ಹೊರಡಿ ಎಂದು ರಷ್ಯಾಕ್ಕೆ ಡ್ಯಾನಿಲೋವ್ ನೇರ ಎಚ್ಚರಿಕೆ ನೀಡಿದ್ದಾರೆ.
ಉಕ್ರೇನ್ ಅಧ್ಯಕ್ಷರೇ ರಷ್ಯಾದ ನಂಬರ್ ಒನ್ ಗುರಿಯಾಗಿದ್ದು, ಅಧ್ಯಕ್ಷರ ಕುಟುಂಬಕ್ಕೆ ಜೀವ ಭಯವಿದೆ. ಅಷ್ಟೇ ಅಲ್ಲ ರಷ್ಯಾ ಕೀವ್ ವಶಪಡಿಸಿಕೊಂಡು ಉಕ್ರೇನ್ ಮೇಲೆ ಹಿಡಿತ ಸಾಧಿಸುವ ಗುರಿ ಹೊಂದಿದೆ.
ಇದನ್ನು ಓದಿ:ರಷ್ಯಾ-ಉಕ್ರೇನ್ ಸಂಘರ್ಷ: ನಾಳೆ ಮತ್ತೊಂದು ಸುತ್ತಿನ ಮಹತ್ವದ ಕದನ ವಿರಾಮ ಮಾತುಕತೆ
