ಲಾಹೋರ್: ಉಗ್ರ ಸಂಘಟನೆಗಳ ವಿರುದ್ಧ ಕ್ರಮ ಕೈಗೊಳ್ಳಲೇಬೇಕೆಂಬ ಜಾಗತಿಕ ಒತ್ತಡಕ್ಕೆ ಮಣಿದ ಪಾಕಿಸ್ತಾನ, ಉಗ್ರ ಹಫೀಸ್ ಸೈಯದ್ ವಿರುದ್ಧ ಭಯೋತ್ಪಾದನೆಗೆ ಆರ್ಥಿಕ ಸಹಾಯ ಸಂಬಂಧ 23 ಪ್ರಕರಣಗಳನ್ನು ದಾಖಲಿಸಿದೆ.
26/11 ಮುಂಬೈ ದಾಳಿಯ ಮಾಸ್ಟರ್ಮೈಂಡ್ ಹಫೀಸ್ ಸೇರಿ ಆತನ 12 ಸಹಚರರ ವಿರುದ್ಧ 23 ಪ್ರಕರಣಗಳನ್ನು ದಾಖಲಿಸಿದೆ. ಜಮಾತ್ ಉದ್ ದವಾ (ಜೆಯುಡಿ) ಸಂಘಟನೆಯ ಮುಖ್ಯಸ್ಥ ಐದು ಟ್ರಸ್ಟ್ಗಳ ಮೂಲಕ ಭಯೋತ್ಪಾದನೆಗೆ ಹಣಕಾಸು ನೆರವು ನೀಡಿದ್ದಾಗಿ ಪಾಕಿಸ್ತಾನದ ಕೌಂಟರ್ ಟೆರರಿಸಂ ಡಿಪಾರ್ಟ್ಮೆಂಟ್ ಹೇಳಿದೆ.
ಲಾಹೋರ್, ಗುಜ್ರಂವಾಲಾ ಹಾಗೂ ಮುಲ್ತಾನಗಳಲ್ಲಿ ಹಫೀಸ್ ವಿರುದ್ಧ ದೂರು ದಾಖಲಾಗಿದೆ. ಅಲ್ ಅನ್ಫಾಲ, ದವಾತ್ ಉಲ್ ಇರ್ಷಾದ್ ಹಾಗೂ ಮೌಜ್ ಬಿನ್ ಜಬಲ್ ಟ್ರಸ್ಟ್ಗಳ ಮೂಲಕ ಭಯೋತ್ಪಾದನೆಗೆ ಹಣ ಒದಗಿಸಿದ್ದಾಗಿ ಆರೋಪಿಸಲಾಗಿದೆ.
ಜೆಯುಡಿ, ಎಲ್ಇಟಿ ಹಾಗೂ ಎಫ್ಐಎಫ್ ಸಂಘಟನೆಗಳ ವಿರುದ್ಧ ತನಿಖೆ ನಡೆಸಲಾಗ್ತಿದೆ. ಟ್ರಸ್ಟ್ ಹೆಸರಿನಲ್ಲಿ ಆಸ್ತಿಗಳನ್ನು ಮಾಡಿ, ಆ ಮೂಲಕ ಉಗ್ರವಾದಕ್ಕೆ ಹಣ ನೀಡಿರುವ ಪ್ರಕರಣದಲ್ಲಿ ಇವರೆಲ್ಲ ಆ್ಯಂಟಿ ಟೆರರಿಸಂ ಕೋರ್ಟ್ವಿಚಾರಣೆ ಎದುರಿಸಬೇಕು ಎಂದು ಹೇಳಿದೆ.
