ಅಂಕಾರಾ : ಟರ್ಕಿಯ ಭೂಕಂಪನ ಸಮೀಕ್ಷಾ ಹಡಗು 'ಒರುಕ್ ರೀಸ್' ತನ್ನ ಕಾರ್ಯ ಚಟುವಟಿಕೆಗಳನ್ನು ಪುನಾರಂಭಿಸಲು ಪೂರ್ವ ಮೆಡಿಟರೇನಿಯನ್ ಸಮುದ್ರಕ್ಕೆ ಪ್ರಯಾಣಿಸಿದೆ ಎಂದು ಟರ್ಕಿ ಇಂಧನ ಮತ್ತು ನೈಸರ್ಗಿಕ ಸಂಪನ್ಮೂಲ ಸಚಿವ ಫಾತಿಹ್ ಡೊನ್ಮೆಜ್ ತಿಳಿಸಿದ್ದಾರೆ.
ಈ ಕುರಿತು ಟ್ವೀಟ್ ಮಾಡಿರುವ ಅವರು, ಮಾಸಿಕ ನಿರ್ವಹಣಾ ಕಾರ್ಯ ಪೂರ್ಣಗೊಂಡ ಬಳಿಕ ಹಡಗು ಮತ್ತೆ ಸಮೀಕ್ಷಾ ಕಾರ್ಯಾಚರಣೆಗೆ ತೆರಳಿದೆ ಎಂದಿದ್ದಾರೆ.
ಮಾಸಿಕ ನಿರ್ವಹಣೆಯ ಸಲುವಾಗಿ ಕಳೆದ ತಿಂಗಳು ಒರುಕ್ ರೀಸ್ ಹಡಗು ತನ್ನ ಕಾರ್ಯಾಚರಣೆಯ ಪ್ರದೇಶದಿಂದ ಅಂಟಲ್ಯ ಪ್ರಾಂತ್ಯದ ಬಂದರಿಗೆ ಹಿಂದಿರುಗಿತ್ತು. ಈ ಹಡಗು ಇದುವರೆಗೆ ಮೆಡಿಟರೇನಿಯನ್ ಸಮುದ್ರದಲ್ಲಿ ಒಟ್ಟು 3,525 ಕಿ.ಮೀ ಭೂಕಂಪನ ಡೇಟಾ ಸಂಗ್ರಹಿಸಿದೆ.
ಪೂರ್ವ ಮೆಡಿಟರೇನಿಯನ್ನಲ್ಲಿ ಇಂಧನ ಪರಿಶೋಧನೆಗೆ ಟರ್ಕಿ ಪ್ರಯತ್ನಿಸುತ್ತಿದೆ, ಇದಕ್ಕೆ ಗ್ರೀಸ್ ತಕರಾರು ತೆಗೆದಿದೆ. ಹೀಗಾಗಿ, ಈ ಪ್ರದೇಶದಲ್ಲಿ ಉದ್ವಿಗ್ನತೆ ಉಂಟಾಗಿದೆ. ಈ ನಡುವೆ ಟರ್ಕಿಯ ಹಡಗು ಮತ್ತೆ ಕಾರ್ಯಾಚರಣೆಗೆ ತೆರಳಿದೆ ಎಂದು ಹುರಿಯೆತ್ ಡೈಲಿ ನ್ಯೂಸ್ ವರದಿ ಮಾಡಿದೆ.
