ಕಾಬೂಲ್(ಅಫ್ಘಾನಿಸ್ತಾನ್): ತಾಲಿಬಾನ್ ಮತ್ತು ಅಮೆರಿಕ ದೇಶದ ನಡುವೆ ಐತಿಹಾಸಿಕ ಕದನ ವಿರಾಮ ಒಪ್ಪಂದಕ್ಕೆ ಇನ್ನೇನು ಕೇವಲ ಒಂದು ದಿನ ಮಾತ್ರ ಬಾಕಿ ಇದ್ದು, ಅಫ್ಘಾ ನಿಸ್ತಾನದಲ್ಲಿರುವ ಅಮೆರಿಕ ಸೈನಿಕರು ಈ ಒಪ್ಪಂದದ ಬಳಿಕ ತಮ್ಮ ತವರಿಗೆ ಹಿಂದಿರುಗಲಿದ್ದಾರೆ.
ಈ ಐತಿಹಾಸಿಕ ಒಪ್ಪಂದದ ಬಗ್ಗೆ 2001ರಿಂದಲೂ ಚರ್ಚೆ ನಡೆಯುತ್ತಿದ್ದರೂ ಇದು ಕಾರ್ಯರೂಪಕ್ಕೆ ಬರಲು ಸಾಧ್ಯವಾಗಿರಲಿಲ್ಲ. ಈ ಕದನ ವಿರಾಮದ ಮುಖ್ಯ ಧ್ಯೇಯವೇ ಅಲ್ ಖೈದಾದಂತಹ ಭಯೋತ್ಪಾದಕ ಗುಂಪುಗಳನ್ನು ಆಶ್ರಯಿಸದಂತೆ ತಾಲಿಬಾನ್‌ನಿಂದ ಬದ್ಧತೆ ಪಡೆದುಕೊಳ್ಳುವುದು.
ತಾಲಿಬಾನ್ ಎಂದರೇನು? ಆ ಬಗ್ಗೆ ನಿಮಗೆಷ್ಟು ಗೊತ್ತು?:
ತಾಲಿಬಾನ್ ಎಂದರೆ ವಿದ್ಯಾರ್ಥಿಗಳು ಎಂಬ ಅರ್ಥವನ್ನು ನೀಡುತ್ತದೆ. 1996ರ ಸೆಪ್ಟೆಂಬರ್ನಲ್ಲಿ ಕಾಬೂಲ್ ಪತನದ ನಂತರ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ತನ್ನ ಆಡಳಿತವನ್ನು ಪ್ರಾರಂಭಿಸುತ್ತದೆ. ತದನಂತರದ ದಿನಗಳಲ್ಲಿ ಇದನ್ನು ಇಸ್ಲಾಮಿಕ್ ಎಮಿರೇಟ್ ಎಂದು ಕರೆಯಲಾಗುತ್ತದೆ. ತಾಲಿಬಾನ್ ಗುಂಪು ಮೊಹಮ್ಮದ್ ಒಮರ್ ನೇತೃತ್ವದ ಧಾರ್ಮಿಕ ವಿದ್ಯಾರ್ಥಿಗಳನ್ನು ಒಳಗೊಂಡಿತ್ತು, ಮುಲ್ಲಾ ಒಮರ್ ಎಂದೂ ಆತನನ್ನು ಕರೆಯಲಾಗುತ್ತಿತ್ತು.
ತಾಲಿಬಾನ್ ಆರಂಭವಾಗಿದ್ದು ಹೇಗೆ?:
1994: ತಾಲಿಬಾನ್ ಎಂಬುದು ಧಾರ್ಮಿಕ ವಿದ್ಯಾರ್ಥಿಗಳ ಒಂದು ಗುಂಪಾಗಿದ್ದು, ಇಲ್ಲಿರುವ ಎಲ್ಲ ಸಂಘಟಕರು ಗುಂಪಿನ ಬೆಳವಣಿಗೆ ಮತ್ತು ಯಶಸ್ಸಿಗಾಗಿ ಪ್ರಮುಖ ಪಾತ್ರ ವಹಿಸುತ್ತಾರೆ.
1996: ತಾಲಿಬಾನ್ ಸಂಘಟನೆಯ ಮೂಲಕ ಇಸ್ಲಾಮಿಕ್ ಎಮಿರೇಟ್ಸ್ನ್ನು ಸ್ಥಾಪಿಸಲಾಯಿತು ಹಾಗೂ ತದನಂತರದ ದಿನಗಳಲ್ಲಿ ಇದು ತಾಲಿಬಾನ್ ಶಕ್ತಿ ಕೇಂದ್ರವಾಗಿ ಮಾರ್ಪಟ್ಟಿತು.
1998: ಶೇ.90ರಷ್ಟು ಅಫ್ಘಾನಿಸ್ತಾನವನ್ನು ತಮ್ಮ ಹಿಡಿತದಲ್ಲಿ ಇಟ್ಟುಕೊಳ್ಳಲು ತಾಲಿಬಾನ್ ಯಶಸ್ವಿಯಾಯಿತು.
ತಾಲಿಬಾನ್ ಮಾಡಿದ್ದೇನು?:
ತಾಲಿಬಾನ್ ಸಂಘಟನೆ ಅಫ್ಘಾನಿಸ್ತಾವನ್ನ ತನ್ನ ಹಿಡಿತಕ್ಕೆ ಪಡೆದ ಕೂಡಲೇ ಮಾಡಿದ ಕೆಲಸವೆಂದರೆ ದೇಶದ ಆರ್ಥಿಕತೆ ಮತ್ತು ಮೂಲಸೌಕರ್ಯಗಳನ್ನು ನಾಶಪಡಿಸಿದ್ದು. ಮೂಲ ಸರಬರಾಜುಗಳನ್ನು ಅತಿ ಕಡಿಮೆಯಾಗಿ ಪೂರೈಕೆ ಮಾಡಿ, ಟಿವಿ, ಸಂಗೀತ ಮತ್ತು ಸಿನಿಮಾವನ್ನು ನಿಷೇಧಿಸಲಾಗಿತ್ತು.
ದೇಶದ ಜನತೆಗೆ ಕಟ್ಟುನಿಟ್ಟಾದ ಡ್ರೆಸ್ ಕೋಡ್ಗಳನ್ನು ಜಾರಿಗೊಳಿಸಲಾಗಿತ್ತು. ಸ್ತ್ರೀ ಶಿಕ್ಷಣವನ್ನು ಮೊಟಕುಗೊಳಿಸಿ, ಅಫ್ಘಾನಿಸ್ತಾನದಲ್ಲಿ ಕ್ರೂರ ಶಿಕ್ಷೆಗಳನ್ನು ಜಾರಿ ಮಾಡಲಾಗಿತ್ತು.
ತಾಲಿಬಾನ್ನ ಸಂಪನ್ಮೂಲಗಳೇನು?
- ಓಪಿಯಮ್(ಅಫೀಮು) ಕೃಷಿಗೆ ತೆರಿಗೆ ವಿಧಿಸುವ ಮೂಲಕ ತಾಲಿಬಾನ್ ಹೆಚ್ಚು ಹಣವನ್ನು ಸಂಪಾದಿಸಿತು. ಶೇ 10 ರಷ್ಟು ಕೃಷಿ ತೆರಿಗೆಯನ್ನು ಪಾವತಿಸುವಂತೆ ತಾಲಿಬಾನ್ ಆದೇಶ ಹೊರಡಿಸಿತು.
- ಅಫೀಮನ್ನು ಖರೀದಿಸಿ ಹೆರಾಯಿನ್ ಆಗಿ ಪರಿವರ್ತಿಸುವ ಪ್ರಯೋಗಾಲಯಗಳ ಮೇಲೆಯೂ ಸಹ ತಾಲಿಬಾನ್ ತೆರಿಗೆಯನ್ನು ಹೇರ ತೊಡಗಿತು.
- ಅಕ್ರಮವಾಗಿ ಔಷಧಗಳನ್ನು ರಫ್ತು ಮಾಡುವ ವ್ಯಾಪಾರಿಗಳ ಮೇಲೆಯೂ ತೆರಿಗೆ ಹೇರುವ ಮೂಲಕ ತಾಲಿಬಾನ್ ಹೆಚ್ಚು ಸಂಪನ್ಮೂಲಭರಿತಬಾಗಲು ಕಾರಣವಾಯಿತು.
ಏನಿದು ಅಮೆರಿಕ ತಾಲಿಬಾನ್ ಒಪ್ಪಂದ:
ಅಮೆರಿಕ ಮತ್ತು ಅಫ್ಘಾನಿಸ್ತಾನದ ನಡುವೆ ಕದನ ವಿರಾಮದ ಒಪ್ಪಂದ ಇದಾಗಿದ್ದು, ಈ ಒಪ್ಪಂದದ ಬಳಿಕ ಅಫ್ಘಾನಿಸ್ತಾನದಲ್ಲಿರುವ ಅಮೆರಿಕದ ಸೇನಾಬಲವನ್ನು 13 ಸಾವಿರದಿಂದ 8,600ಕ್ಕೆ ತಗ್ಗಿಸಲಿದೆ. ಹಾಗೂ ಇನ್ನುಳಿದ ಸೈನಿಕರು ಅಲ್ಲಿಯೇ ವಾಸ್ತವ್ಯ ಹೂಡಲಿದ್ದು, ಅಲ್ಲಿನ ಪರಿಸ್ಥಿತಿಗಳ ಬಗ್ಗೆ ಹಾಗೂ ಆಗು ಹೋಗುಗಳ ಬಗ್ಗೆ ನಿಗಾ ಇಡಲಿದ್ದಾರೆ.
ಈ ಒಪ್ಪಂದಕ್ಕೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಾತ್ವಿಕವಾಗಿ ಒಪ್ಪಿಗೆ ನೀಡಿದ್ದು, ಒಪ್ಪಂದದ ಪ್ರಕಾರ ಅಲ್-ಖೈದಾ ಸಂಘಟನೆ ವಿರುದ್ದ ಅಪ್ಘಾನಿಸ್ತಾನದಲ್ಲಿ ಯುಎಸ್ ಭಯೋತ್ಪಾದನಾ ನಿಗ್ರಹ ಕಾರ್ಯಾಚರಣೆ ಮುಂದುವರೆಸಲಿದೆ ಎಂದು ತಿಳಿದು ಬಂದಿದೆ.
