ಮ್ಯಾನ್ಮಾರ್​ನಲ್ಲಿ ಮತ ಎಣಿಕೆ ಶುರು: ಆಂಗ್ ಸಾನ್ ಸೂಕಿ ಪಕ್ಷಕ್ಕೆ ಭಾರಿ ಮುನ್ನಡೆ

ಮ್ಯಾನ್ಮಾರ್​ನಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಎನ್‌ಎಲ್‌ಡಿ ಪಕ್ಷ ಮುನ್ನಡೆ ಸಾಧಿಸಿದೆ. ಈಗಾಗಲೇ ಮತ ಎಣಿಕೆ ಪ್ರಕ್ರಿಯೆ ಶುರುವಾಗಿದ್ದು, ನ್ಯಾಷನಲ್ ಲೀಗ್ ಆಫ್ ಡೆಮಾಕ್ರಸಿ ಮೇಲುಗೈ ಸಾಧಿಸಿದೆ.

ನಾಯ್ಪಿಟಾವ್: ಮ್ಯಾನ್ಮಾರ್‌ನ ಯಾಂಗೊನ್ ಪ್ರದೇಶದ ಹೆಚ್ಚಿನ ಪ್ರದೇಶಗಳಲ್ಲಿ ಮುಂಗಡ ಮತಗಳನ್ನು ಎಣಿಕೆ ಮಾಡುತ್ತಿದ್ದು, ಆಂಗ್ ಸಾನ್ ಸೂ ಕಿ ಅವರ ನ್ಯಾಷನಲ್ ಲೀಗ್ ಆಫ್ ಡೆಮಾಕ್ರಸಿ (ಎನ್‌ಎಲ್‌ಡಿ) ಅಭ್ಯರ್ಥಿಗಳು ಸಾರ್ವತ್ರಿಕ ಚುನಾವಣೆಯಲ್ಲಿ ಗರಿಷ್ಠ ಮತಗಳನ್ನು ಪಡೆದು ಮುನ್ನಡೆ ಸಾಧಿಸಿದ್ದಾರೆ.

ಈ ಬಗ್ಗೆ ವರದಿ ಮಾಡಿರುವ ಮ್ಯಾನ್ಮರ್ ಪತ್ರಿಕೆಯೊಂದು, 'ಎನ್‌ಎಲ್‌ಡಿ ಹೆಚ್ಚಿನ ಮುಂಗಡ ಮತಗಳಲ್ಲಿ ಪ್ರಾಬಲ್ಯ ಸಾಧಿಸಿದೆ. ಇಲ್ಲಿಯವರೆಗೆ ಎನ್​ಎಲ್​ಡಿ 200 ಕ್ಕೂ ಹೆಚ್ಚು ಮತಗಳನ್ನು ಪಡೆದಿದ್ರೆ, ಇತರ ಪಕ್ಷಗಳು 20 ರಿಂದ 30 ಮತಗಳನ್ನು ಪಡೆದಿವೆ' ಎಂದಿದೆ.

ಐದು ದಶಕಗಳ ಮಿಲಿಟರಿ ಆಡಳಿತದ ಅಂತ್ಯದ ನಂತರ ಮ್ಯಾನ್ಮಾರ್​ನಲ್ಲಿ ಎರಡನೇ ಬಾರಿಗೆ ಸಾರ್ವತ್ರಿಕ ಚುನಾವಣೆ ನಡೆದಿದೆ. 2015ರಲ್ಲಿ ನಡೆದ ಚುನಾವಣೆಯಲ್ಲಿ ಎನ್‌ಎಲ್‌ಡಿ ಭರ್ಜರಿ ಗೆಲುವು ಸಾಧಿಸಿತ್ತು.