ಬೀಜಿಂಗ್(ಚೀನಾ): ಇಡೀ ವಿಶ್ವಕ್ಕೆ ಮಾರಕವಾಗಿರುವ ತಾಲಿಬಾನ್ಗೆ ಚೀನಾ ಹಾಗೂ ಪಾಕಿಸ್ತಾನ ಬೇಷರತ್ ಬೆಂಬಲ ಸೂಚಿಸುತ್ತಲೇ ಇವೆ. ಆಫ್ಫನ್ನಲ್ಲಿ ತಾಲಿಬಾನ್ ಸರ್ಕಾರದ ಗುಣಗಾನ ಮಾಡುತ್ತಿರುವ ಡ್ರ್ಯಾಗನ್ ಸರ್ಕಾರ 31 ಮಿಲಿಯನ್ ಡಾಲರ್ ನೆರವು ಘೋಷಿಸಿದೆ.
ಇತ್ತೀಚೆಗಷ್ಟೇ ತಾಲಿಬಾನ್ ನೂತನ ಮಧ್ಯಂತರ ಸರ್ಕಾರ ಘೋಷಿಸಿದ್ದು, ಆಫ್ಘನ್ನಲ್ಲಿ ಸೃಷ್ಟಿಯಾಗಿದ್ದ ಅರಾಜಕತೆ ಕೊನೆಗೊಳಿಸಿದೆ. ಆಡಳಿತ ಮರುಸ್ಥಾಪಿಸಲು ಇದೊಂದು ಅಗತ್ಯಕ್ರಮ. ಅಲ್ಲದೇ, ವಿಶಾಲವಾದ ರಾಜಕೀಯ ರಚನೆ ಮತ್ತು ವಿವೇಕಯುತ ದೇಶೀಯ - ವಿದೇಶಿ ನೀತಿಯನ್ನು ಅನುಸರಿಸುವುದಾಗಿ ತಾಲಿಬಾನ್ ಭರವಸೆ ನೀಡಿದೆ.
ಹೀಗಾಗಿ ತಾಲಿಬಾನ್ ಸರ್ಕಾರಕ್ಕೆ ನಾವು ಬೆಂಬಲ ನೀಡುವುದರ ಜತೆಗೆ ಹಣಕಾಸಿನ ನೆರವು ನೀಡುತ್ತಿದ್ದೇವೆ ಎಂದು ಚೀನಾ ವಿದೇಶಾಂಗ ಸಚಿವ ವಾಂಗ್‌ ಯಿ ಹಾಗೂ ವಿದೇಶಾಂಗ ವಕ್ತಾರ ವಾಂಗ್‌ ವೆನ್ಬಿನ್‌ ಹೇಳಿದ್ದಾರೆ.
ಚಳಿಗಾಲದ ಆಹಾರ, ಲಸಿಕೆ ಮತ್ತು ಔಷಧ ಸಹಾಯಕ್ಕಾಗಿ 31 ಮಿಲಿಯನ್ ಡಾಲರ್ (2,28,73,50,500 ಕೋಟಿ ರೂ) ನೆರವು ನೀಡುತ್ತೇವೆ ಎಂದಿದ್ದಾರೆ. ಅಲ್ಲದೇ, ಮೊದಲ ಕಂತಿನಲ್ಲಿ 30 ಲಕ್ಷ ಡೋಸ್‌ ಲಸಿಕೆಯನ್ನು ಕಳುಹಿಸಲಾಗುವುದು ಎಂದು ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ: 'ನಾನು ಕಾಬೂಲ್ ತೊರೆದರೆ ಬಂದೂಕುಗಳು ಮೌನವಾಗುತ್ತವೆ ಎಂದು ತಿಳಿದಿತ್ತು.. ಕ್ಷಮೆ ಇರಲಿ..': ಅಶ್ರಫ್ ಘನಿ
ಜತೆಗೆ ಆಫ್ಘನ್ನಲ್ಲಿ ಆರ್ಥಿಕತೆ ಮತ್ತು ಸಮಾಜವನ್ನು ಪುನರ್ ನಿರ್ಮಾಣ ಮಾಡಲು ಸಹಾಯ ಮಾಡುತ್ತೇವೆ. ಭಯೋತ್ಪಾದಕ ಗುಂಪುಗಳು ಮತ್ತು ಕಾನೂನು ಬಾಹಿರ ಔಷಧ ವ್ಯಾಪಾರದ ವಿರುದ್ಧ ಹೋರಾಡಲು ಡ್ರ್ಯಾಗನ್ ರಾಷ್ಟ್ರವು ಪಾಕ್ ಹಾಗೂ ಆಫ್ಘನ್ ಜತೆಗೆ ಕೆಲಸ ಮಾಡುವುದಾಗಿ ಹೇಳಿದೆ.
