ಬೀಜಿಂಗ್(ಚೀನಾ ): ಮೊದಲ ಕೋವಿಡ್ ಪ್ರಕರಣ ಪತ್ತೆಯಾಗುವ ಒಂದು ತಿಂಗಳ ಮೊದಲೇ ವುಹಾನ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿಯ (ಡಬ್ಲ್ಯುಐವಿ) ಮೂವರು ಸಂಶೋಧಕರು ಕೋವಿಡ್ಗೆ ಚಿಕಿತ್ಸೆ ಕೋರಿದ್ದರು ಎಂಬ ಮಾಧ್ಯಮ ವರದಿಯನ್ನು ಚೀನಾ ತಳ್ಳಿ ಹಾಕಿದೆ.
ಡಬ್ಲ್ಯುಐವಿಯ ಮೂವರು ಸಂಶೋಧಕರು 2019ರಲ್ಲಿ ಮೊದಲ ಕೋವಿಡ್ ಪ್ರಕರಣ ಪತ್ತೆಯಾಗುವ ಒಂದು ತಿಂಗಳ ಮೊದಲೇ ಕೋವಿಡ್ ಸೋಂಕಿಗೆ ಚಿಕಿತ್ಸೆ ಕೋರಿದ್ದರು ಎಂದು ಅಮೆರಿಕದ ದಿ ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿತ್ತು ಮತ್ತು ಇದಕ್ಕೆ ಪೂರಕವಾದ ದಾಖಲೆ ಒದಗಿಸುವುದಾಗಿ ಹೇಳಿತ್ತು.
ವಾಲ್ ಸ್ಟ್ರೀಟ್ ಜರ್ನಲ್ನ ಈ ವರದಿಯು, ಕೋವಿಡ್ ಸೋಂಕು ಚೀನಾ ಹುಟ್ಟು ಹಾಕಿದ್ದು ಎಂಬ ಜಾಗತಿಕ ರಾಷ್ಟ್ರಗಳ ವಾದವನ್ನು ಬಲಪಡಿಸಿತ್ತು.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಚೀನಾದ ವಿದೇಶಾಂಗ ಇಲಾಖೆ ವಕ್ತಾರ ಝಾಹೋ ಲಿಜಿಯಾನ್, ಇದು 'ಶುದ್ಧ ಸುಳ್ಳು', 2019 ಡಿಸೆಂಬರ್ 30ರವರೆಗೆ ಡಬ್ಲ್ಯುಐವಿಯ ಸಿಬ್ಬಂದಿ ಮತ್ತು ಪದವೀಧರ ವಿದ್ಯಾರ್ಥಿಗಳು ಯಾರಲ್ಲೂ ಕೋವಿಡ್ ಸೋಂಕು ಕಂಡು ಬಂದಿಲ್ಲ ಎಂದಿದ್ದಾರೆ. ಚೀನಾ ಉನ್ನತ ಇಲಾಖೆಗಳ ಪ್ರಕಾರ, ಡಬ್ಲ್ಯುಐವಿಯಲ್ಲಿ ಕೋವಿಡ್ ವೈರಸ್ ಬಗ್ಗೆ ಅಧ್ಯಯನ ಮಾಡಲಾಗಿದೆ ಅಷ್ಟೇ..
ಚೀನಾದ ಲ್ಯಾಬ್ನಿಂದ ಕೋವಿಡ್ ವೈರಸ್ ಹರಡಿದೆ ಎಂದು ಅಮೆರಿಕ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ಹಿಂದೆ ಗಂಭೀರ ಆರೋಪ ಮಾಡಿದ್ದರು. ಟ್ರಂಪ್ ಆರೋಪಕ್ಕೆ ಹಲವು ರಾಷ್ಟ್ರಗಳು ಧ್ವನಿಗೂಡಿಸಿದ್ದವು. ಆದರೆ, ಈ ಆರೋಪವನ್ನು ಪ್ರತಿ ಬಾರಿಯೂ ಚೀನಾ ತಳ್ಳಿ ಹಾಕಿತ್ತು.
ಓದಿ : ಕೋವಿಡ್ ಪತ್ತೆಯಾಗುವ ಮೊದಲೇ ಚಿಕಿತ್ಸೆ ಕೋರಿದ್ದರಂತೆ ಚೀನಾದ ಸಂಶೋಧಕರು!
ಕೋವಿಡ ವೈರಸ್ನ ಮೂಲ ಕಂಡು ಹಿಡಿಯುವ ಸಲುವಾಗಿ ವಿಶ್ವ ಆರೋಗ್ಯ ಸಂಸ್ಥೆಯ ತಜ್ಞರು ಮತ್ತು ಚೀನಾದ ಆರೋಗ್ಯ ತಜ್ಞರು ವುಹಾನ್ನಲ್ಲಿ ಉಳಿದುಕೊಂಡು ನಾಲ್ಕು ವಾರಗಳ ಕಾಲ ಅಧ್ಯಯನ ನಡೆಸಿದ್ದರು.
ಬಳಿಕ, ಕೋವಿಡ್ ವೈರಸ್ ಚೀನಾದ ಲ್ಯಾಬ್ನಿಂದ ಹರಡಿದೆ ಎಂಬುವುದಕ್ಕೆ ಪುರಾವೆಗಳಿಲ್ಲ ಎಂದು ವರದಿ ಕೊಟ್ಟಿದ್ದರು. ಕೆಲ ಮೂಲಗಳ ಪ್ರಕಾರ, ಡಬ್ಲ್ಯುಹೆಚ್ಒ ತಜ್ಞರಿಗೆ ವುಹಾನ್ನಲ್ಲಿ ಸ್ವತಂತ್ರವಾಗಿ ಅಧ್ಯಯನ ಮಾಡಲು ಬಿಟ್ಟಿಲ್ಲ ಎನ್ನಲಾಗುತ್ತಿದೆ.
ಹಲವು ಆರೋಪ, ನಿರಾಕರಣೆಗಳು ಮತ್ತು ಅಧ್ಯಯನಗಳ ಬಳಿಕವೂ ಕೋವಿಡ್ ವೈರಸ್ ಎಲ್ಲಿಂದ ಹುಟ್ಟಿಕೊಂಡಿತು ಎಂಬುವುದು ಇನ್ನೂ ನಿಗೂಢವಾಗಿಯೇ ಉಳಿದಿದೆ. ಆದರೆ, ಜಗತ್ತಿನ ಹೆಚ್ಚಿನ ರಾಷ್ಟ್ರಗಳ ಚೀನಾದತ್ತ ಬೊಟ್ಟು ಮಾಡುತ್ತಿವೆ.
ಏನೇ ಆದರೂ, ಕೋವಿಡ್ ವೈರಸ್ ಜಾಗತಿಕ ಬಲಿಷ್ಠ ರಾಷ್ಟ್ರಗಳ ಆರ್ಥಿಕತೆಯ ಮೇಲೆ ಹೊಡೆತ ನೀಡಿ ಸಂಕಷ್ಟಕ್ಕೆ ದೂಡಿದ್ದು ಸುಳ್ಳಲ್ಲ. ಇದರೊಂದಿಗೆ ತೀವ್ರ ಆರೋಗ್ಯ ಬಿಕ್ಕಟ್ಟು ಸೃಷ್ಠಿಸಿರುವ ಈ ಸಣ್ಣ ವೈರಸ್, ಭಾರತದಂತಹ ಅಭಿವೃದ್ದಿ ಹೊಂದುತ್ತಿರುವ ರಾಷ್ಟ್ರಗಳು ನಲುಗುವಂತೆ ಮಾಡಿದೆ. ಭಾರತ ಕೋವಿಡ್ಗೆ ತುತ್ತಾದ ರಾಷ್ಟ್ರಗಳ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿದೆ.
