ನ್ಯೂಯಾರ್ಕ್: ಕೊರೊನಾ ವೈರಸ್ ಜಗತ್ತಿನ ವಿವಿಧ ರಾಷ್ಟ್ರಗಳ ಆರ್ಥಿಕತೆಯ ಬುಡವನ್ನೇ ಹಿಡಿದು ಅಲುಗಾಡಿಸುತ್ತಿದ್ದು, ಅಭಿವೃದ್ಧಿ ಹೊಂದಿದ ಪ್ರಮುಖ ರಾಷ್ಟ್ರಗಳಿಗೂ ವೈರಸ್ ಬಲವಾದ ಗುದ್ದು ಕೊಟ್ಟಿದೆ. ಈ ನಡುವೆ ವಿಶ್ವಸಂಸ್ಥೆ ನೀಡಿರುವ ವರದಿಯೊಂದು ಪ್ರಬಲ ರಾಷ್ಟ್ರಗಳನ್ನು ಬೆಚ್ಚಿಬೀಳಿಸಿದೆ.
ಸಾಂಕ್ರಾಮಿಕ ರೋಗ ಕೊರೊನಾ ವೈರಸ್ ದಾಳಿಯಿಂದಾಗಿ ಜಾಗತಿಕ ಆರ್ಥಿಕತೆಗೆ ಈ ವರ್ಷ ಟ್ರಿಲಿಯನ್ಗಟ್ಟಲೆ ಡಾಲರ್ ನಷ್ಟವಾಗಲಿದೆಯಂತೆ. ವಿಶೇಷವೆಂದರೆ, ಪ್ರಮುಖ ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳು ಹೆಚ್ಚು ನಷ್ಟ ಅನುಭವಿಸಲಿದೆಯಂತೆ.
ಭಾರತ, ಚೀನಾಗಿಲ್ಲ ಸಂಕಷ್ಟ:
ವಿಶೇಷವೆಂದರೆ ಕೊರೊನಾ ಹುಟ್ಟಿಕೊಂಡ ಚೀನಾಗೆ ಈ ಆರ್ಥಿಕ ಹಿಂಜರಿತದ ಹೊಡೆತ ಬೀಳಲ್ವಂತೆ. ಅದರಂತೆ ಕೊರೊನಾ ವಿರುದ್ಧ ನಿರಂತರ ಹೋರಾಟದಲ್ಲಿರುವ ಭಾರತಕ್ಕೂ ಇದರಿಂದ ತೊಂದರೆಯಾಗಲ್ಲ ಎಂದು ವಿಶ್ವಸಂಸ್ಥೆ ತನ್ನ ವರದಿಯೊಂದರಲ್ಲಿ ಹೇಳಿದೆ.
ವಿಶ್ವದ ಒಟ್ಟು ಜನಸಂಖ್ಯೆಯ ಮೂರನೇ ಎರಡರಷ್ಟು ಜನರಿರುವ ಅಭಿವೃದ್ಧಿಶೀಲ ರಾಷ್ಟ್ರಗಳು COVID-19 ಬಿಕ್ಕಟ್ಟಿನಿಂದ ಆರ್ಥಿಕ ನಷ್ಟವನ್ನು ಎದುರಿಸುತ್ತಿವೆ. ಹೀಗಾಗಿ ಈ ರಾಷ್ಟ್ರಗಳಿಗೆ 2.5 ಟ್ರಿಲಿಯನ್ ಯುಎಸ್ ಡಾಲರ್ ರಕ್ಷಣಾ ಪ್ಯಾಕೇಜ್ ನೀಡಲು ವಿಶ್ವಸಂಸ್ಥೆ ಮುಂದಾಗಿದೆ.
ಆದ್ರೆ ಇನ್ನೊಂದೆಡೆ, ವಿಶ್ವ ಬ್ಯಾಂಕ್‌ ಸಾಂಕ್ರಾಮಿಕ ರೋಗ ಚೀನಾದ ಆರ್ಥಿಕಾಭಿವೃದ್ಧಿಯನ್ನು ಸಂಪೂರ್ಣವಾಗಿ ಬುಡಮೇಲು ಮಾಡಬಹುದು ಎಂದು ಎಚ್ಚರಿಸಿದೆ.
