ಜಿನೀವಾ: ಕೋವಿಡ್-19 ವಿರುದ್ಧದ ಹೋರಾಟಕ್ಕೆ ಆರೋಗ್ಯ ಸಿಬ್ಬಂದಿಗೆ ನೆರವಾಗಲು ಹಾಗೂ ಜನ ಸಾಮಾನ್ಯರಿಗೆ ಸೋಂಕಿನ ಬಗ್ಗೆ ತಿಳವಳಿಕೆ ಮೂಡಿಸಲು ವಿಶ್ವ ಆರೋಗ್ಯ ಸಂಸ್ಥೆಯು (ಡಬ್ಲ್ಯುಎಚ್ಒ) ಎರಡು ಮೊಬೈಲ್ ಅಪ್ಲಿಕೇಷನ್ಗಳನ್ನು ಬಿಡುಗಡೆ ಮಾಡಿದೆ.
ಡಬ್ಲ್ಯುಎಚ್ಒ ಅಕಾಡೆಮಿಯ ಒಂದು ಅಪ್ಲಿಕೇಷನ್ ಅನ್ನು ಸಾಂಕ್ರಾಮಿಕ ಸೋಂಕು ಹಬ್ಬಿದ ಸಮಯದಲ್ಲಿ ಆರೋಗ್ಯ ಕಾರ್ಯಕರ್ತರು ತಮ್ಮ ಜೀವ ಉಳಿಸಿಕೊಳ್ಳುವ ಕೌಶಲ್ಯ ಬೆಳೆಸಿಕೊಳ್ಳಲು ನೆರವಾಗುವಂತೆ ವಿನ್ಯಾಸಗೊಳಿಸಲಾಗಿದೆ. ಎರಡನೇ ಆ್ಯಪ್ನಲ್ಲಿ ಡಬ್ಲ್ಯುಎಚ್ಒ ಜನರಿಗೆ ಸೋಕಿನ ಬಗ್ಗೆ ಮಾಹಿತಿ ಒದಗಿಸಲಾಗಿದೆ.
ಆರೋಗ್ಯ ಕಾರ್ಯಕರ್ತರು ಡಬ್ಲ್ಯುಎಚ್ಒ ಅಭಿವೃದ್ಧಿಪಡಿಸಿದ ಕೊರೊನಾ ಬಗೆಗಿನ ಹೆಚ್ಚಿನ ತಿಳವಳಿಗೆ ಈ ಅಪ್ಲಿಕೇಷನ್ ನೆರವು ಪಡೆಯಬಹುದು. ಇದರಲ್ಲಿ ರೋಗಿಗಳ ಆರೈಕೆಗೆ ನೆರವಾಗುವ ಮಾರ್ಗದರ್ಶನ, ಪರಿಕರಗಳು, ತರಬೇತಿ ಮತ್ತು ವರ್ಚುವಲ್ ಕಾರ್ಯಾಗಾರಗಳು ಸೇರಿವೆ. ತಮ್ಮನ್ನು ತಾವು ರಕ್ಷಿಸಿಕೊಳ್ಳುವ ಕುರಿತು ವಿವರಣೆ ಸೇರಿಸಲಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.
ಈ ಹೊಸ ಮೊಬೈಲ್ ಅಪ್ಲಿಕೇಷನ್‌ನೊಂದಿಗೆ ಡಬ್ಲ್ಯುಎಚ್ಒ ಕಲಿಕೆ ಮತ್ತು ಜ್ಞಾನ ಹಂಚಿಕೆಯನ್ನು ಆರೋಗ್ಯ ಕಾರ್ಯಕರ್ತರಿಗೆ ಕೈಗೆಟಕುವಂತೆ ಮಾಡಿದೆ ಎಂದು ಡಬ್ಲ್ಯುಎಚ್ಒ ಮಹಾನಿರ್ದೇಶಕ ಡಾ. ಟೆಡ್ರೊಸ್ ಅಧಾನೊಮ್ ಘೆಬ್ರೆಯೆಸಸ್ ಹೇಳಿದರು.
20,000 ಜಾಗತಿಕ ಆರೋಗ್ಯ ಕಾರ್ಯಕರ್ತರ ಸಮೀಕ್ಷೆಯ ಆಧಾರದ ಮೇಲೆ ಈ ಅಪ್ಲಿಕೇಷನ್ ಅಭಿವೃದ್ಧಿಪಡಿಸಲಾಗಿದೆ. ಸಾಂಕ್ರಾಮಿಕ ರೋಗದಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ವರ್ಚುವಲ್ ಕಲಿಕೆಗೆ ಇವು ಸಹಾಯಕವಾಗಿವೆ.
ಕೊರೊನಾ ಕುರಿತಾದ ಸುತ್ತಮುತ್ತಲಿನ ಇತ್ತೀಚಿನ ಸುದ್ದಿಗಳು ಮತ್ತು ಬೆಳವಣಿಗೆಗಳ ಬಗ್ಗೆ ಜಗತ್ತಿನಾದ್ಯಂತ ಲಕ್ಷಾಂತರ ಜನರಿಗೆ ಈ ಆ್ಯಪ್ ಮೂಲಕ ಡಬ್ಲ್ಯುಎಚ್ಒ ಮಾಹಿತಿ ಒದಗಿಸುತ್ತದೆ. ಎರಡೂ ಅಪ್ಲಿಕೇಷನ್‌ಗಳು ಆ್ಯಪಲ್ ಆ್ಯಪ್ ಸ್ಟೋರ್ ಮತ್ತು ಗೂಗಲ್ ಪ್ಲೇ ಸ್ಟೋರ್ನಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು.
