ಕೆನಡಾ, (ಅಮೆರಿಕಾ): ಮಧ್ಯರಾತ್ರಿ. ಒಂಟಿ ಮಹಿಳೆ. ಕೆಲವೇ ವಾರಗಳ ಹಿಂದೆ ಕೊಂಡ ಹೊಸ ಕಾರು ಕೈಕೊಟ್ಟು ಕೆಟ್ಟು ನಿಂತಿದೆ. ಏನು ಮಾಡಬೇಕು ಎಂದು ತೋಚದೆ ಮಹಿಳೆ ಆತಂಕದಲ್ಲಿದ್ದಳು. ಆಗ ಆಕೆಗೆ ಸಹಾಯಕ್ಕೆ ಬಂದವರು ಮೂವರು ಹುಡುಗರು.
ಅಮರಿಕಾದ ಕೆನಡಾ ಸಿಟಿಯಲ್ಲಿ ಈ ಘಟನೆ ನಡೆದಿದೆ. ಏರಾನ್ ಮೆಕ್ಕ್ವಿಲಿಕ್(18), ಬೈಲಿ ಕ್ಯಾಂಪ್ಬೆಲ್(17) ಹಾಗೂ ಬಿಲ್ಲಿ ಟಾರ್ಬೆಟ್(15) ಅಪರಿಚಿತ ಒಂಟಿ ಮಹಿಳೆಗೆ ಮಧ್ಯರಾತ್ರಿ ಸಹಾಯಕ್ಕೆ ಧಾವಿಸಿದ ಹುಡುಗರು. ಈ ಮೂವರೂ ಡೋನಟ್ ತಿನ್ನಲು ರಾತ್ರಿ ಮನೆಯಿಂದ ಹೊರಟಿದ್ದರು. ಹೈವೇಯಲ್ಲಿದ್ದ ಕಾರಿನಿಂದ ಹೊಗೆ ಬರ್ತಿರೋದು ಗಮನಿಸಿದ್ದಾರೆ.
'ನಾವು ಕಾರಿನ ಬಳಿ ಹೋಗಿ ಪರಿಶೀಲಿಸಿದಾಗ, ಸ್ಟಾರ್ಟ್ ಮಾಡಬಾರದು ಹಾಗೂ ಡ್ರೈವ್ ಮಾಡಬಾರದು ಎಂದು ನಿರ್ಧರಿಸಿದೆವು. ಕಾರ್ನಲ್ಲಿ ಸೋರಿಕೆ ಉಂಟಾಗಿ, ಎಂಜಿನ್ ಕೂಲೆಂಟ್ ಹಾಗೂ ಎಣ್ಣೆ ಮಿಶ್ರವಾಗಿತ್ತು. ಇದರಿಂದಾಗಿ ಕಾರು ಚಲಾಯಿಸುವುದು ಅಪಾಯಕಾರಿ ಎಂದು ಅರಿತುಕೊಂಡೆವು. ಹಾಗಾಗಿ ನಾವು 8 ಕಿಲೋ ಮೀಟರ್ವರೆಗೆ ಕಾರನ್ನು ತಳ್ಳಿಕೊಂಡೇ ಸಾಗಿದೆವು. ಒಂದೂವರೆ ಗಂಟೆಯಲ್ಲಿ ನಾವು ನಮ್ಮ ಗುರಿ ತಲುಪಿದೆವು' ಎಂದು ಏರಾನ್ ಮೆಕ್ಕ್ವಿಲಿಕ್ ಎಂಬ ಬಾಲಕ ಫೇಸ್ಬುಕ್ನಲ್ಲಿ ಬರೆದುಕೊಂಡಿದ್ದಾನೆ.
ಈ ಘಟನೆಗೆ ಸಾಕ್ಷಿಯಾದ ಡಾನ್ ಮಾರಿಸನ್ ಎಂಬ ವ್ಯಕ್ತಿ, '6 ವಾರಗಳ ಹಿಂದೆಯಷ್ಟೇ ಕಾರನ್ನು ಮಹಿಳೆ ಖರೀದಿದ್ದರು. ಅದು ಕೆಟ್ಟು ನಿಂತಾಗ ಮನೆ ತಲುಪಿಸುವಲ್ಲಿ ಸಹಾಯ ಮಾಡಿದ ಹುಡುಗರ ಸಹಾಯ ಮಾಡುವ ಮನೋಭಾವ ಪ್ರಶಂಸನೀಯ' ಎಂದು ಫೇಸ್ಬುಕ್ನಲ್ಲಿ ಬರೆದು, ಯುವಕರ ಫೋಟೋಗಳನ್ನೂ ಪೋಸ್ಟ್ ಮಾಡಿದ್ದಾರೆ. 'ನಮ್ಮ ಕೆಲಸಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುವ ಹಲವಾರು ಸಂದೇಶಗಳು ಫೇಸ್ಬುಕ್ನಲ್ಲಿ ಬರಲಾರಂಭಿಸಿದವು. ನಮ್ಮ ಕೆಲಸದಿಂದಾಗಿ ಇತರರೂ ಕೂಡಾ ಅಗತ್ಯವಿರುವವರಿಗೆ ಸಹಾಯ ಹಸ್ತ ನೀಡುವಂತಾಗಲಿ' ಎಂದು ಮೆಕ್ಕ್ವಿಲಿಕ್ ಎಂಬ ಮತ್ತೊಬ್ಬ ಹುಡುಗ ಹೇಳಿಕೊಂಡಿದ್ದಾನೆ.
ಕೆಟ್ಟಿದ್ದ ಕಾರಿನಲ್ಲೇ ನನ್ನ ಕೂರಿಸಿ ಅದನ್ನ 8 ಕಿ.ಮೀ ತಳ್ಳಿಕೊಂಡು ರಾತ್ರಿ ಮನೆಗೆ ಯಾರಾದ್ರೂ ಬಿಡ್ತಾರೆ ಅಂತಾ ನಾನು ಅಂದ್ಕೊಂಡಿರಲಿಲ್ಲ. ಆದರೆ, ಆ ಹುಡುಗರು ಅದನ್ನ ಮಾಡಿದ್ದರು. ಈ ಹುಡುಗರ ಸಹಾಯ ಮರೆಯುವಂತಿಲ್ಲ ಅಂತಾ ಮುಕ್ತಕಂಠದಿಂದಲೇ ನೆರವು ಪಡೆದ ಮಹಿಳೆ ಶ್ಲಾಘಿಸಿದ್ದಾರೆ.
