ವಾಷಿಂಗ್ಟನ್: ಜಾಗತಿಕ ಮಹಾಮಾರಿ ಕೊವಿಡ್-19 ವಿರುದ್ಧ ಹೋರಾಡಲು ವಿಶ್ವದ ದೊಡ್ಡಣ್ಣ ಭಾರತಕ್ಕೆ 5.9 ಮಿಲಿಯನ್ ಡಾಲರ್ ಆರೋಗ್ಯ ನೆರವು ನೀಡಿದೆ.
ಕೊರೊನಾ ಪೀಡಿತರಿಗೆ ಸರಿಯಾದ ಆರೈಕೆ ನೀಡಲು ಹಾಗೂ ಸಮುದಾಯಗಳಿಗೆ ಅಗತ್ಯವಾದ ಸಾರ್ವಜನಿಕ ಆರೋಗ್ಯ ಸಂದೇಶ, ಪ್ರಕರಣಗಳ ಪತ್ತೆ, ಭದ್ರತೆ ಬಲಪಡಿಸುವ, ತುರ್ತು ಸಿದ್ಧತೆ ಮಾಡಿಕೊಳ್ಳುವ ಮೂಲಕ ವೈರಸ್ ಹರಡುವಿಕೆಯನ್ನು ತಡೆಗಟ್ಟಲು ಬಳಸಿಕೊಳ್ಳಲು ಈ ಹಣವನ್ನು ನೀಡಲಾಗಿದೆ ಎಂದು ಅಮೆರಿಕ ಸರ್ಕಾರ ತಿಳಿಸಿದೆ.
ಕಳೆದ 20 ವರ್ಷಗಳಲ್ಲಿ ಭಾರತಕ್ಕೆ ಅಮೆರಿಕ ಒಟ್ಟು 2.8 ಬಿಲಿಯನ್ ಡಾಲರ್ ಆರ್ಥಿಕ ನೆರವು ನೀಡಿದಂತಾಗಿದೆ. ಇದರಲ್ಲಿ 1.4 ಬಿಲಿಯನ್ ಡಾಲರ್ ಆರೋಗ್ಯ ನೆರವಾಗಿದೆ ಎಂದು ಸಹ ಯು.ಎಸ್ ಹೇಳಿದೆ.
ಭಾರತ ಸೇರಿ ಒಟ್ಟು 7 ಕೊರೊನಾ ಪೀಡಿತ ರಾಷ್ಟ್ರಗಳಿಗೆ ದೊಡ್ಡಣ್ಣ ಸಹಾಯ ಹಸ್ತ ಚಾಚಿದ್ದು, ಅಫ್ಘಾನಿಸ್ತಾನಕ್ಕೆ 18 ಮಿಲಿಯನ್ ಡಾಲರ್, ಬಾಂಗ್ಲಾದೇಶಕ್ಕೆ 9.6 ಮಿಲಿಯನ್ ಡಾಲರ್, ಭೂತಾನ್ಗೆ 500,000 ಡಾಲರ್, ಪಾಕಿಸ್ತಾನಕ್ಕೆ 4 ಮಿಲಿಯನ್ ಡಾಲರ್ ಹಾಗೂ ಶ್ರೀಲಂಕಾಗೆ 1.3 ಮಿಲಿಯನ್ ಡಾಲರ್ ನೆರವು ನೀಡಿದೆ.
