ಹ್ಯೂಸ್ಟನ್‌ನಲ್ಲಿರುವ ಚೀನಾ ಕಾನ್ಸುಲೇಟ್​ ಕಚೇರಿ ಮುಚ್ಚಲು ಅಮೆರಿಕ​ ಸೂಚನೆ

ವಿವಿಧ ವಿಷಯಗಳ ಕುರಿತು ಚೀನಾ-ಅಮೆರಿಕ ನಡುವೆ ನಡೆಯುತ್ತಿರುವ ಶೀತಲ ಸಮರ ಇದೀಗ ಮತ್ತೊಂದು ಹಂತ ತಲುಪಿದೆ.

ವಾಶಿಂಗ್ಟನ್ : ಹ್ಯೂಸ್ಟನ್​ನಲ್ಲಿರುವ ಚೀನಾದ ಕಾನ್ಸುಲೇಟ್​ ಕಚೇರಿಯನ್ನು 72 ಗಂಟೆಯೊಳಗೆ ಮುಚ್ಚುವಂತೆ ಅಮೆರಿಕ ಸೂಚಿಸಿದೆ.

ಈ ಕುರಿತು ಚೀನಾ ಸರ್ಕಾರದ ಮುಖವಾಣಿ 'ಗ್ಲೋಬಲ್ ಟೈಮ್ಸ್' ಪ್ರಧಾನ ಸಂಪಾದಕ ಹು ಝಿಜಿನ್ ಟ್ವೀಟ್​ ಮಾಡಿದ್ದು," ಹ್ಯೂಸ್ಟನ್​ನಲ್ಲಿರುವ ಚೀನಾದ ಕಾನ್ಸುಲೇಟ್​ ಕಚೇರಿಯನ್ನು 72 ಗಂಟೆಗಳೊಳಗಾಗಿ ಮುಚ್ಚುವಂತೆ ಅಮೆರಿಕ ತಿಳಿಸಿದೆ. ಇದೊಂದು ಹುಚ್ಚುತನದ ನಡೆ" ಎಂದಿದ್ದಾರೆ.

ಈ ಹಿಂದೆ ಚೀನಾ ಕಾನ್ಸುಲೇಟ್​ ಕಚೇರಿಯಲ್ಲಿ ದಾಖಲೆಗಳನ್ನು ಸುಡಲಾಗುತ್ತಿದೆ ಎಂದು ಅಮೆರಿಕದ​ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿದ್ದವು. ಹಾಂಕಾಂಗ್​ ಮೇಲೆ ಚೀನಾ ಹಿಡಿತ ಯತ್ನ ಮತ್ತು ದಕ್ಷಿಣ ಚೀನಾ ಸಮುದ್ರ ವಿವಾದದ ವಿಷಯದಲ್ಲಿ ಚೀನಾ ಹಾಗೂ ಅಮೆರಿಕದ ಮಧ್ಯೆ ಶೀತಲ ಸಮರ ನಡೆಯುತ್ತಲೇ ಬಂದಿದೆ. ಈ ಬೆಳವಣಿಗೆಗಳ ಮುಂದುವರೆದ ಭಾಗವಾಗಿ ಈಗ ಕಾನ್ಸುಲೇಟ್ ಕಚೇರಿಯನ್ನು ಯುಎಸ್​ ಮುಚ್ಚಿಸುತ್ತಿದೆ ಎಂದು ಹೇಳಲಾಗುತ್ತದೆ.