ಟೊರೊಂಟೊ : 23 ವರ್ಷದ ಭಾರತೀಯ ಮೂಲದ ಯುವಕನನ್ನು ಹತ್ಯೆ ಮಾಡಿರುವ ಘಟನೆ ಕೆನಡಾದ ಟ್ರುರೊ ನಗರದ ನೊವಾ ಸ್ಕೊಟಿಯಾ ಪ್ರಾಂತ್ಯದಲ್ಲಿ ನಡೆದಿದೆ. ಪ್ರಬ್‌ಜಿತ್‌ ಸಿಂಗ್‌ ಕತ್ರಿ ಮೃತ ದುರ್ದೈವಿ ಎಂದು ಮೂಲಗಳು ತಿಳಿಸಿವೆ. ಇದು ಜನಾಂಗೀಯ ಪ್ರೇರಿತ ದ್ವೇಷದ ಅಪರಾಧ ಎಂದು ಅಲ್ಲಿನ ಭಾರತೀಯ ಸಮುದಾಯದ ಸದಸ್ಯರು ಆರೋಪಿಸಿದ್ದಾರೆ.
ಕಳೆದ ಭಾನುವಾರ ತಡರಾತ್ರಿ 2 ಗಂಟೆಗೆ ಕರೆ ಬಂತು. ಮೃತ ಯುವಕ ತಂದಿದ್ದ ಅಪಾರ್ಟ್ಮೆಂಟ್‌ ಸ್ಥಳಕ್ಕೆ ಭೇಟಿ ನೀಡಿದಾಗ ತೀವ್ರಗಾಯಗಳ ಸ್ಥಿತಿಯಲ್ಲಿ ಮೃತ ದೇಹ ಪತ್ತೆಯಾಗಿದೆ. ಲೇಟನ್ಸ್‌ ಟ್ಯಾಕ್ಸಿಯಲ್ಲಿ ಸಿಂಗ್‌ ಕೆಲಸ ಮಾಡುತ್ತಿದ್ದ ಎಂದು ಟ್ರುರೊ ಪೊಲೀಸ್‌ ಅಧಿಕಾರಿ ಡೇವಿಡ್‌ ಮ್ಯಾಕ್‌ನೈಲ್‌ ತಿಳಿಸಿದ್ದಾರೆ. ಘಟನೆ ಸಂಬಂಧ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವುದಾಗಿ ಮಾಹಿತಿ ನೀಡಿದ್ದಾರೆ.
ಆರೋಪಿಯೋರ್ವನನ್ನು ಬಂಧಿಸಲಾಗಿತ್ತಾದರೂ ಬಳಿಕ ಆತನನ್ನು ಬಿಡುಗಡೆ ಮಾಡಲಾಗಿದೆ. 2017ರಲ್ಲಿ ಸಿಂಗ್‌ ವಿದ್ಯಾಭ್ಯಾಸದ ಉದ್ದೇಶದಿಂದ ಕೆನಡಾಗೆ ಬಂದಿದ್ದ. ಉತ್ತಮ ಭವಿಷ್ಯ ರೂಪಿಸಿಕೊಳ್ಳಲು ಈತ ಅತ್ಯಂತ ಶ್ರಮ ಜೀವಿಯಾಗಿದ್ದ. ಈತನ ಸಾವು ತುಂಬಲಾರದ ನಷ್ಟ ಎಂದು ಮ್ಯಾಕ್‌ನೈಲ್‌ ಸಂತಾಪ ವ್ಯಕ್ತಪಡಿಸಿದ್ದಾರೆ. ಮೃತ ದೇಹವನ್ನು ಭಾರತಕ್ಕೆ ಕಳುಹಿಸಲು ಎಲ್ಲಾ ರೀತಿಯ ಸಿದ್ಧತೆ ಮಾಡಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ.
ಟ್ಯಾಕ್ಸಿ ಚಾಲಕನಾಗಿ ಕೆಲಸ ಮಾಡುತ್ತಿದ್ದ ಪ್ರಬ್‌ಜಿತ್‌ ಸಿಂಗ್‌ ತುಂಬಾ ಮುಗ್ಧನಾಗಿದ್ದ. ಒಳ್ಳೆಯ ಜೀವನ ರೂಪಿಸಿಕೊಳ್ಳಲು ಇಲ್ಲಿಗೆ ಬಂದಿದ್ದೆವು. ಆದರೆ, ಈತನ ಸಾವಿನಿಂದ ನಮಗೂ ಭಯ ಶುರುವಾಗಿದೆ ಎಂದು ಮೃತನ ಸ್ನೇಹಿತ ಜತಿಂದರ್‌ ಕುಮಾರ್‌ ದೀಪ್‌ ಆತಂಕ ವ್ಯಕ್ತಪಡಿಸಿದ್ದಾರೆ.
