ವಾಷಿಂಗ್ಟನ್(ಅಮೆರಿಕ): ಮಿಲಿಟರಿ ವಿಚಾರದಲ್ಲಿ ರಷ್ಯಾದ ಮೇಲಿನ ಅವಲಂಬನೆ ತಗ್ಗಿಸಲು ಗಮನಾರ್ಹವಾದ ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ. ಈ ಕುರಿತಂತೆ ಭಾರತ ಜವಾಬ್ದಾರಿಯುತ ಸ್ಥಾನದಲ್ಲಿದೆ ಎಂದು ಅಮೆರಿಕದ ಸೆನೆಟರ್ ಜಾನ್ ಕಾರ್ನಿನ್ ಅಭಿಪ್ರಾಯಪಟ್ಟಿದ್ದಾರೆ.
ಭಾರತದ ಸಿಎಎಟಿಎಸ್ಎ (CAATSA) ಕಾಯ್ದೆ ಪ್ರಯೋಗಿಸಬಾರದು ಎಂದು ಅಮೆರಿಕದ ಅಧ್ಯಕ್ಷ ಜೋ ಬೈಡನ್ ಅವರನ್ನು ಒತ್ತಾಯಿಸಿದ ನಂತರ ಮಾತನಾಡಿರುವ ಅವರು ಅಮೆರಿಕ ಮತ್ತು ಭಾರತ ಎರಡೂ ದೇಶಗಳಲ್ಲಿ ಆರ್ಥಿಕ ಸಹಕಾರದಂತೆಯೇ, ಮಿಲಿಟರಿ ಮತ್ತು ಭದ್ರತಾ ಸಹಕಾರವೂ ಇದೆ. 2016ರಲ್ಲಿ ಭಾರತವನ್ನು ಅಮೆರಿಕ ಪ್ರಮುಖ ರಕ್ಷಣಾ ಪಾಲುದಾರ ರಾಷ್ಟ್ರ ಎಂದು ಘೋಷಿಸಿದೆ. ರಕ್ಷಣಾ ಪಾಲುದಾರಿಕೆಯನ್ನು ಹೆಚ್ಚಿಸಲು ಎರಡೂ ರಾಷ್ಟ್ರಗಳು ಯತ್ನಿಸುತ್ತಿವೆ ಎಂದು ಜಾನ್ ಕಾರ್ನಿನ್ ಹೇಳಿದ್ದಾರೆ.
ಯುಎಸ್- ಇಂಡಿಯಾ ಬ್ಯುಸಿನೆಸ್ ಕೌನ್ಸಿಲ್ ಸಹಯೋಗದಲ್ಲಿ ನಡೆದ ಯುಎಸ್- ಇಂಡಿಯಾ ಫ್ರೆಂಡ್‌ಶಿಪ್ ಕೌನ್ಸಿಲ್ ಆಯೋಜಿಸಿದ Today's Geo-Political Landscape ಸಂವಾದ ಕಾರ್ಯಕ್ರಮದಲ್ಲಿ ಜಾನ್ ಕಾರ್ನಿನ್ ಭಾರತದ ಪರವಾಗಿ ಮಾತನಾಡಿದ್ದಾರೆ.
ರಷ್ಯಾದ ಮಿಲಿಟರಿ ಉಪಕರಣಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಭಾರತವು ಮಹತ್ವದ ಕ್ರಮಗಳನ್ನು ತೆಗೆದುಕೊಂಡಿದೆ ಮತ್ತು ಯುನೈಟೆಡ್ ಸ್ಟೇಟ್ಸ್‌ನಿಂದ ಉಪಕರಣಗಳನ್ನು ಖರೀದಿಸಲು ಆಸಕ್ತಿಯನ್ನು ತೋರಿಸಿದೆ ಮತ್ತು ನಮ್ಮೊಂದಿಗೆ ಹೆಚ್ಚು ನಿಕಟವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ನಾನು ಭಾವಿಸುತ್ತೇವೆ.
ಭಾರತದ ಮೇಲೆ ಈ ವಿಚಾರದಲ್ಲಿ ನಿರ್ಬಂಧ ವಿಧಿಸುವುದನ್ನು ಅಮೆರಿಕ ಬಿಡಬೇಕು ಎಂದು ಜಾನ್ ಕಾರ್ನಿನ್ ಮತ್ತು ಮತ್ತೊಬ್ಬ ಸೆನೆಟರ್ ಮಾರ್ಕ್ ವಾರ್ನರ್ ಅವರು ಜೋ ಬೈಡನ್ ಅವರನ್ನು ಒತ್ತಾಯಿಸಿದ್ದರು. ಇದಾದ ಮರುದಿನವೇ ಜಾನ್ ಕಾರ್ನಿನ್ ಮತ್ತೊಮ್ಮೆ ಭಾರತ ಪರ ಬ್ಯಾಟಿಂಗ್ ಮಾಡಿದ್ದು, ಸಿಎಎಟಿಎ ಕಾಯ್ದೆಯಿಂದ ಭಾರತವನ್ನು ಹೊರಗಿಡುವುದೂ ಕೂಡಾ ಅಮೆರಿಕದ ಹಿತಾಸಕ್ತಿಯೇ ಆಗಿದೆ ಎಂದು ಪ್ರತಿಪಾದಿಸಿದ್ದಾರೆ.
ಏನಿದು ಸಿಎಎಟಿಎಸ್ಎ? ಏಕೆ?
ಅಮೆರಿಕ ತನ್ನ ಹಿತಾಸಕ್ತಿಯ ರಕ್ಷಣೆಗಾಗಿ ರೂಪಿಸಿದ ಕಾಯ್ದೆ ಇದಾಗಿದೆ. ಸಿಎಎಟಿಎಸ್ಎ ( CAATSA- Countering America's Adversaries Through Sanctions Act) ಅಮೆರಿಕ ಹಿತಾಸಕ್ತಿಗಳ ವಿರುದ್ಧ ಇರುವ ರಾಷ್ಟ್ರಗಳ ಮೇಲೆ ನಿರ್ಬಂಧ ಹೇರುವ ಸಲುವಾಗಿ ಈ ಕಾಯ್ದೆಯನ್ನು ರೂಪಿಸಿದೆ.
ಈಗ ಸದ್ಯಕ್ಕೆ ರಷ್ಯಾನಿರ್ಮಿತ ಎಸ್-400 ಮಿಸೈಲ್ ವ್ಯವಸ್ಥೆಯನ್ನು ಭಾರತ ಖರೀದಿಸಲು ಮುಂದಾಗಿತ್ತು. ಆದರೆ ರಷ್ಯಾದಿಂದ ಈ ಮಿಸೈಲ್ ಅನ್ನು ಖರೀದಿಸುವುದು ಅಮೆರಿಕದ ಹಿತಾಸಕ್ತಿಗೆ ವಿರುದ್ಧವಾಗಿದ್ದು, ಈ ಮಿಸೈಲ್ ವ್ಯವಸ್ಥೆಯನ್ನು ಖರೀದಿಸಿದರೆ ಅಮೆರಿಕ ಸಿಎಎಟಿಎಸ್ಎ ನಿರ್ಬಂಧವನ್ನು ಭಾರತದ ಮೇಲೆ ಹೇರುವುದಾಗಿ ಇತ್ತೀಚೆಗೆ ಹೇಳಿಕೊಂಡಿತ್ತು.
ಭಾರತ ಈಗ ಎಸ್-400 ಅನ್ನು ಖರೀದಿಸಬೇಕೋ ಅಥವಾ ಬೇಡವೋ ಎಂಬ ಗೊಂದಲದಲ್ಲಿದ್ದಾಗ ಅಮೆರಿಕದ ಕೆಲವು ಸೆನೆಟರ್ಗಳೇ ಈಗ ಭಾರತದ ಮೇಲೆ ಸಿಎಎಟಿಎಸ್ಎ ಹೇರಬಾರದು ಎಂದು ಅಧ್ಯಕ್ಷ ಜೋ ಬೈಡನ್ಗೆ ಮನವಿ ಮಾಡಿವೆ. ಚೀನಾ ಕೂಡಾ ಅಮೆರಿಕಕ್ಕೆ ಪ್ರತಿಸ್ಪರ್ಧಿಯಾಗಿರುವುದು ಕೂಡಾ ಇಲ್ಲಿ ಕೆಲಸ ಮಾಡಿದೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: ಮುಂಬೈ ಕ್ರೂಸ್‌ ಶಿಪ್‌ ಡ್ರಗ್ಸ್‌ ಪ್ರಕರಣದ ಸ್ವತಂತ್ರ ಸಾಕ್ಷಿ ಕಿರಣ್‌ ಗೋಸಾವಿ ಪೊಲೀಸ್ ವಶ
