ವಾಷಿಂಗ್ಟನ್: ಕೊರೊನಾ ವೈರಸ್ ಮೂಲದ ಮಾಹಿತಿ ಕಲೆ ಹಾಕುತ್ತಿರುವ ಅಮೆರಿಕ ಗುಪ್ತಚರ ಸಂಸ್ಥೆ ಇದೀಗ, ವೈರಸ್ ಸೋಂಕಿತ ಪ್ರಾಣಿಗಳೊಂದಿಗಿನ ಮಾನವ ಸಂಪರ್ಕದಿಂದ ಸ್ವಾಭಾವಿಕವಾಗಿ ಕೋವಿಡ್-19 ಹೊರಹೊಮ್ಮಿರಬಹುದು ಅಥವಾ ಇದನ್ನು ಪ್ರಯೋಗಾಲಯದಲ್ಲಿ ಸೃಷ್ಟಿ ಮಾಡಿರಬಹುದು. ಆದ್ರೆ ಈ ಬಗ್ಗೆ ಖಚಿತವಾಗಿ ಹೇಳಲು ಸಾಕಷ್ಟು ಮಾಹಿತಿ ಬೇಕಿದೆ ಎಂದು ತನಿಖಾಧಿಕಾರಿಗಳು ಹೇಳುತ್ತಿದ್ದಾರೆ.
1. ಲ್ಯಾಬ್ ಸೋರಿಕೆ- ಗಂಭೀರ ಆರೋಪ
2019ರ ಡಿಸೆಂಬರ್ನಲ್ಲಿ ಮೊದಲ ಕೋವಿಡ್ ಪ್ರಕರಣ ಚೀನಾದ ವುಹಾನ್ನಲ್ಲಿ ವರದಿಯಾಗಿತ್ತು. ಬಳಿಕ ವಿಶ್ವಾದ್ಯಂತ ಸೋಂಕು ಹರಡಿದ್ದು, ಇಲ್ಲಿಯವರೆಗೆ 16,96,24,157 ಮಂದಿಗೆ ವೈರಸ್ ಅಂಟಿದ್ದು, 35,25,042 ಜನರು ಬಲಿಯಾಗಿದ್ದಾರೆ. ಕೋವಿಡ್ ಮೂಲವು ವ್ಯಾಪಕವಾಗಿ ಚರ್ಚಿಸಲ್ಪಟ್ಟ ವಿಷಯವಾಗಿ ಉಳಿದಿದೆ. ಕೆಲವು ವಿಜ್ಞಾನಿಗಳು, ಜಾಗತಿಕ ನಾಯಕರು ಚೀನಾದ ಲ್ಯಾಬ್ ಸೋರಿಕೆ ಸಿದ್ಧಾಂತದ ಬಗ್ಗೆ ಚರ್ಚಿಸುತ್ತಾ ಬಂದಿದ್ದಾರೆ.
2. 'ವುಹಾನ್ನ ಲ್ಯಾಬ್‌ನಲ್ಲೇ ವೈರಸ್ ಸೃಷ್ಟಿ'
ಉದ್ದೇಶಪೂರ್ವಕವಾಗಿ ಸೋಂಕು ಪಸರಿಸಲು ಚೀನಾ ತನ್ನ ವುಹಾನ್ನ ಪ್ರಯೋಗಾಲಯದಲ್ಲೇ ವೈರಸ್ ಸೃಷ್ಟಿಸಿದೆ ಎಂದು ಅಮೆರಿಕ ಕೂಡ ಆರೋಪ ಮಾಡುತ್ತಾ ಬಂದಿದೆ. ಈ ಬಗ್ಗೆ ತನಿಖೆ ನಡೆಸುತ್ತಿರುವ ಯುಎಸ್ ಗುಪ್ತಚರ ಸಂಸ್ಥೆಗೆ ನಿನ್ನೆಯಷ್ಟೇ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಅವರು ಕೊರೊನಾ ವೈರಸ್ ಮೂಲದ ಬಗ್ಗೆ ನಿರ್ದಿಷ್ಟ ತೀರ್ಮಾನಕ್ಕೆ ಬರುವಂತಹ ಮಾಹಿತಿಯನ್ನು ಸಂಗ್ರಹಿಸುವ ಪ್ರಯತ್ನ ದ್ವಿಗುಣಗೊಳಿಸಿ, 90 ದಿನಗಳಲ್ಲಿ ವರದಿ ನೀಡುವಂತೆ ಸೂಚಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: ಕೊರೊನಾ ಮೂಲದ ತನಿಖೆ ಚುರುಕುಗೊಳಿಸಿ: ಯುಎಸ್ ಗುಪ್ತಚರ ಸಂಸ್ಥೆಗೆ ಬೈಡನ್ ಆದೇಶ
3. ಎರಡು ಸನ್ನಿವೇಶಗಳನ್ನು ತಿಳಿಸಿದ US ಗುಪ್ತಚರ ಸಂಸ್ಥೆ
ಬೈಡನ್ ಆದೇಶದ ಬೆನ್ನಲ್ಲೇ ಹೇಳಿಕೆ ನೀಡಿರುವ ಸ್ಟ್ರಾಟೆಜಿಕ್ ಕಮ್ಯುನಿಕೇಷನ್ಸ್‌ನ ರಾಷ್ಟ್ರೀಯ ಗುಪ್ತಚರ ಸಹಾಯಕ ನಿರ್ದೇಶಕಿ ಅಮಂಡಾ ಸ್ಕೋಚ್, ಕೊರೊನಾ ವೈರಸ್ ಆರಂಭದಲ್ಲಿ ಎಲ್ಲಿ, ಯಾವಾಗ, ಅಥವಾ ಹೇಗೆ ಹರಡಿತು ಎಂಬುದು ಯುಎಸ್ ಗುಪ್ತಚರ ಸಂಸ್ಥೆಗೆ ಸ್ಪಷ್ಟವಾಗಿ ತಿಳಿದಿಲ್ಲ. ಆದರೆ ಇದರ ಹಿಂದೆ ಎರಡು ಸನ್ನಿವೇಶಗಳಿವೆ.. ಒಂದು, ವೈರಸ್ ಸೋಂಕಿತ ಪ್ರಾಣಿಗಳೊಂದಿಗಿನ ಮಾನವ ಸಂಪರ್ಕದಿಂದ ಸ್ವಾಭಾವಿಕವಾಗಿ ಕೋವಿಡ್ ಹರಡಿದೆ. ಅಥವಾ, ಪ್ರಯೋಗಾಲಯದ ಚಟುವಟಿಕೆಯಿಂದ ಹುಟ್ಟಿದೆ. ಇವರೆಡರ ಕುರಿತು ನಿರ್ಣಯಿಸಲು ಸಾಕಷ್ಟು ಮಾಹಿತಿ ಬೇಕು. ಲಭ್ಯವಿರುವ ಎಲ್ಲ ಪುರಾವೆಗಳನ್ನು ಗುಪ್ತಚರ ಸಂಸ್ಥೆ ಪರಿಶೀಲಿಸುತ್ತಿದೆ. ವಿಭಿನ್ನ ದೃಷ್ಟಿಕೋನಗಳನ್ನು ಪರಿಗಣಿಸುತ್ತದೆ. ಹೊಸ ಮಾಹಿತಿಯನ್ನು ಸಂಗ್ರಹಿಸಿ, ವಿಶ್ಲೇಷಿಸುತ್ತದೆ ಎಂದು ಹೇಳಿದ್ದಾರೆ.
4. WHO ತಜ್ಞರ ಚೀನಾ ಭೇಟಿ
ವೈರಸ್ ಮೂಲದ ಬಗ್ಗೆ ತನಿಖೆ ನಡೆಸುವ ಸಲುವಾಗಿ ವಿಶ್ವ ಆರೋಗ್ಯ ಸಂಸ್ಥೆಯ (ಡಬ್ಲ್ಯುಹೆಚ್‌ಒ) ತಜ್ಞರು ವುಹಾನ್ ಸೇರಿದಂತೆ ಚೀನಾದ ವಿವಿಧ ಪ್ರದೇಶಗಳಿಗೆ ಭೇಟಿ ನೀಡಿ, ಚೀನಾ ಅಧ್ಯಯನ ತಂಡದೊಂದಿಗೆ ಸೇರಿ ತನಿಖೆ ನಡೆಸಿತ್ತು. ತನಿಖೆ ಬಳಿಕ ಡಬ್ಲ್ಯುಹೆಚ್‌ಒ, ಇದರ ಹಿಂದೆ ಚೀನಾ ಕೈವಾಡವಿಲ್ಲವೆಂದು ತಿಳಿಸಿತ್ತು. ಆದರೆ ಇದನ್ನು ನಂಬದ ಅಮೆರಿಕ, ಈ ಬಗ್ಗೆ ತನಿಖೆ ಚುರುಕುಗೊಳಿಸಲು ತನ್ನ ಗುಪ್ತಚರ ಸಂಸ್ಥೆಗೆ ಆದೇಶಿಸಿದೆ.
