ಬಲರಾಂಪುರ (ಉತ್ತರ ಪ್ರದೇಶ): ಪಿಪಿಇ ಕಿಟ್ ಧರಿಸಿದ ವ್ಯಕ್ತಿ ಸೇರಿ 4 ಮಂದಿ ಮೃತದೇಹವನ್ನು ಸೇತುವೆಯೊಂದರಿಂದ ರಾಪ್ತಿ ನದಿಗೆ ಎಸೆಯಲು ಪ್ರಯತ್ನಿಸುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಕೊಟ್ವಾಲಿ ನಗರದ ಸಿಸಾಯ್ ಘಾಟ್ ಸೇತುವೆಯ ಮೇಲೆ ನಡೆದಿರುವ ಘಟನೆ ಎಂದು ತಿಳಿದು ಬಂದಿದೆ.
ವಿಡಿಯೋವನ್ನು ದಾರಿಹೋಕರು ಚಿತ್ರೀಕರಿಸಿದ್ದಾರೆ. ಇನ್ನು, ಈ ಬಗ್ಗೆ ಮಾತನಾಡಿದ ಬಲರಾಂಪುರದ ಮುಖ್ಯ ವೈದ್ಯಾಧಿಕಾರಿ (ಸಿಎಂಒ) ಡಾ.ವಿಜಯ್ ಬಹದ್ದೂರ್ ಸಿಂಗ್, ಘಟನೆ ಬಗ್ಗೆ ಕ್ರಮ ಕೈಗೊಂಡಿದ್ದು, ಎಫ್ಐಆರ್ ದಾಖಲಿಸಲಾಗಿದೆ ಎಂದು ಹೇಳಿದ್ದಾರೆ.
ಇನ್ನು, ಈ ಮೃತದೇಹ ಸಿದ್ಧಾರ್ಥನಗರ ಜಿಲ್ಲೆಯ ಶೋಹರತ್‌ಗಢ ನಿವಾಸಿ ಪ್ರೇಮ್ ನಾಥ್ ಮಿಶ್ರಾ ಎಂಬುವರದ್ದು ಎನ್ನಲಾಗಿದೆ. ಇವರು ಸೋಂಕಿನಿಂದಾಗಿ ಮೇ 25ರಂದು ಆಸ್ಪತ್ರೆಗೆ ದಾಖಲಾಗಿದ್ದರು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಮೇ 28ರಂದು ನಿಧನರಾಗಿದ್ದಾರೆ ಎನ್ನಲಾಗಿದೆ.
ಕೊರೊನಾ ಮುಂಜಾಗ್ರತೆಗಳನ್ನು ವಹಿಸಿ ಮೃತದೇಹವನ್ನು ಕುಟುಂಬಕ್ಕೆ ಹಸ್ತಾಂತರಿಸಲಾಗಿದೆ. ಆದರೆ, ಕುಟುಂಬಸ್ಥರು ಶವವನ್ನು ರಾಪ್ತಿ ನದಿಗೆ ಎಸೆದಿರಬಹುದು ಎಂದು ಬಹದ್ದೂರ್ ಸಿಂಗ್ ಹೇಳಿದ್ದಾರೆ.
