ರ‍್ಯಾಂಪ್​ ವಾಕ್​ ವೇಳೆ ಪತ್ನಿ ದೀಪಿಕಾ ಪಡುಕೋಣೆ ಕೆನ್ನೆಗೆ ಮುತ್ತಿಟ್ಟ ರಣ್​ವೀರ್​ ಸಿಂಗ್ - ವಿಡಿಯೋ​

ಮನೀಶ್ ಮಲ್ಹೋತ್ರಾ ಆಯೋಜಿಸಿದ್ದ ಫ್ಯಾಷನ್​ ಶೋನಲ್ಲಿ ರ‍್ಯಾಂಪ್​​ ವಾಕ್​ ವೇಳೆ ರಣ್​ವೀರ್​ ಸಿಂಗ್​ ತಮ್ಮ ಪತ್ನಿ ದೀಪಿಕಾ ಪಡುಕೋಣೆ ಕೆನ್ನೆಗೆ ಮುತ್ತಿಟ್ಟಿರುವ ವಿಡಿಯೋ ಸೋಷಿಯಲ್​ ಮೀಡಿಯಾದಲ್ಲಿ ಹರಿದಾಡುತ್ತಿದೆ.

ಮುಂಬೈನಲ್ಲಿ ಖ್ಯಾತ ಫ್ಯಾಷನ್​ ಡಿಸೈನರ್​​ ಮನೀಶ್ ಮಲ್ಹೋತ್ರಾ 2023ರ ಗ್ರ್ಯಾಂಡ್ ಬ್ರೈಡಲ್ ಕೌಚರ್ ಶೋನ ಆಯೋಜಿಸಿದ್ದರು. ಬಿಡುಗಡೆಗೆ ಸಿದ್ಧವಾಗಿರುವ 'ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿ' ಸಿನಿಮಾ ನಟರಾದ ರಣ್​​ವೀರ್ ಸಿಂಗ್ ಮತ್ತು ಆಲಿಯಾ ಭಟ್ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಗುರುವಾರ ನಡೆದ ಫ್ಯಾಷನ್ ಶೋನಲ್ಲಿ ರಣ್​ವೀರ್ ಅದ್ಭುತವಾಗಿ ಎಂಟ್ರಿ ಕೊಟ್ಟರು. ಅವರು ಹೊಳೆಯುವ ಹೂವಿನ ಮುದ್ರಿತ ಜಾಕೆಟ್ ಜೊತೆಗೆ ಬಿಳಿ ಶೇರ್ವಾನಿ ಧರಿಸಿದ್ದರು.

ರ್ಯಾಂಪ್​ ವಾಕ್​ ವೇಳೆ ಪತ್ನಿ ದೀಪಿಕಾ ಪಡುಕೋಣೆ ಕೆನ್ನೆಗೆ ಮುತ್ತಿಟ್ಟ ರಣ್​ವೀರ್​ ಸಿಂಗ್

ರ‍್ಯಾಂಪ್ ​ವಾಕ್​ ಸಮಯದಲ್ಲಿ ಪತ್ನಿ ದೀಪಿಕಾ ಪಡುಕೋಣೆ ಕೆನ್ನೆಗೆ ರಣ್​ವೀರ್​ ಮುತ್ತಿಟ್ಟರು. ಬಳಿಕ ದೀಪಿಕಾ ಅವರ ಪಕ್ಕದಲ್ಲಿ ಕುಳಿತಿದ್ದ ಅವರ ತಾಯಿಯ ಪಾದಗಳನ್ನು ಸ್ಪರ್ಶಿಸುವ ಮೂಲಕ ಆಶೀರ್ವಾದ ಪಡೆದರು. 'ಗಲ್ಲಿ ಬಾಯ್' ನಟ ತಮ್ಮ ಹೆಂಡತಿಗೆ ಚುಂಬಿಸುತ್ತಿರುವ ಅನೇಕ ವಿಡಿಯೋಗಳು ಸೋಷಿಯಲ್​ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಈ ದೃಶ್ಯ ಅಭಿಮಾನಿಗಳಿಂದ ಅಪಾರ ಪ್ರೀತಿಯನ್ನು ಪಡೆಯಿತು. ಕಮೆಂಟ್​ ಮೂಲಕ ಇವರಿಬ್ಬರ ಪ್ರೀತಿಯನ್ನು ವರ್ಣಿಸುತ್ತಿದ್ದಾರೆ.

ಆಫ್​ ವೈಟ್​ ನೆಟ್​ ಸೀರೆಯಲ್ಲಿ ದೀಪಿಕಾ ಪಡುಕೋಣೆ ಸುಂದರವಾಗಿ ಕಾಣುತ್ತಿದ್ದರು. ಕಸೂತಿ ಹಾಲ್ಟರ್- ನೆಕ್​ ಬ್ಲೌಸ್​ ಜೊತೆ ತಮ್ಮ ನೋಟವನ್ನು ಪೂರ್ಣಗೊಳಿಸಿದರು. ಕುತ್ತಿಗೆಗೆ ಧರಿಸಿದ್ದ ವಜ್ರದ ಆಭರಣ ಅವರನ್ನು ಮತ್ತಷ್ಟು ಆಕರ್ಷಕವಾಗಿ ಕಾಣುವಂತೆ ಮಾಡಿತ್ತು. ತುಟಿಗೆ ಬಳಿದಿದ್ದ ಕ್ಲಾಸಿಕ್​ ಕೆಂಪು ಲಿಪ್ಸ್ಟಿಕ್​ ಅವರ ಅಂದವನ್ನು ಮತ್ತಷ್ಟು ಹೆಚ್ಚಿಸಿತ್ತು. ಮತ್ತೊಂದೆಡೆ ಆಲಿಯಾ ಭಟ್​ ಬೆಳ್ಳಿ ಬಣ್ಣದ ಬೆಜ್ವೆಲ್​ ಲೆಹಂಗಾವನ್ನು ಧರಿಸಿದ್ದರು. ಅದಕ್ಕೆ ಉದ್ದನೆಯ ದುಪ್ಪಟ್ಟಾವನ್ನು ಹಾಕಿದ್ದರು. ಮ್ಯಾಚ್​ ಆಗುವಂತಹ ಆಭರಣಗಳೊಂದಿಗೆ ಪರಿಪೂರ್ಣ ವಧುವಿನಂತೆ ಕಾಣುತ್ತಿದ್ದರು.

ಇದನ್ನೂ ಓದಿ: Watch... ಮನೆಯಲ್ಲೇ ಸರಳವಾಗಿ ಹುಟ್ಟುಹಬ್ಬ ಆಚರಿಸಿಕೊಂಡ ಮಹೇಶ್​ ಬಾಬು ಪ್ರಿನ್ಸೆಸ್​ ಸಿತಾರಾ

ಮನೀಶ್ ಮಲ್ಹೋತ್ರಾ ಅವರ ಕಾರ್ಯಕ್ರಮದಲ್ಲಿ ಜಾಹ್ನವಿ ಕಪೂರ್, ಅರ್ಜುನ್ ಕಪೂರ್, ಅಂಶುಲಾ ಕಪೂರ್, ಕರಣ್ ಜೋಹರ್, ನೋರಾ ಫತೇಹಿ ಸೇರಿದಂತೆ ಮನರಂಜನಾ ಉದ್ಯಮದ ಅನೇಕ ಪ್ರಸಿದ್ಧ ಮುಖಗಳು ಭಾಗವಹಿಸಿದ್ದರು. ಜೊತೆಗೆ ಮುಖೇಶ್ ಅಂಬಾನಿ ಮತ್ತು ಅವರ ಕುಟುಂಬ ಕೂಡ ಹಾಜರಿತ್ತು.

ಇನ್ನು ದೀಪಿಕಾ- ರಣ್​ವೀರ್​ ಸಿನಿಮಾ ವಿಚಾರವಾಗಿ ನೋಡುವುದಾದರೆ, ರಣವೀರ್ ಆಲಿಯಾ ಭಟ್ ಜೊತೆ 'ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿ' ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಜೋಹರ್ ನಿರ್ದೇಶನದ ಈ ಚಿತ್ರದಲ್ಲಿ ಧರ್ಮೇಂದ್ರ, ಶಬಾನಾ ಅಜ್ಮಿ ಮತ್ತು ಜಯಾ ಬಚ್ಚನ್ ಕೂಡ ಇದ್ದಾರೆ. ಚಿತ್ರವು ಜುಲೈ 28 ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಲಿದೆ. ಮತ್ತೊಂದೆಡೆ, ದೀಪಿಕಾ ಪಡುಕೋಣೆ, ಪ್ರಭಾಸ್ ಮತ್ತು ಅಮಿತಾಬ್ ಬಚ್ಚನ್ ಜೊತೆಗೆ ಪ್ರಾಜೆಕ್ಟ್ ಕೆ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇದಲ್ಲದೇ 'ಫೈಟರ್‌'ನಲ್ಲಿ ಹೃತಿಕ್ ರೋಷನ್ ಜೊತೆ ನಟಿಸಲಿದ್ದಾರೆ. ಶಾರುಖ್ ಖಾನ್ ಅವರ 'ಜವಾನ್' ಸಿನಿಮಾದಲ್ಲೂ ದೀಪಿಕಾ ಇದ್ದಾರೆ.

'ದೀಪ್​ವೀರ್​' ಸ್ಟಾರ್​ ದಂಪತಿ: ನವೆಂಬರ್ 14, 2018 ರಂದು ಇಟಲಿಯ ಐಷಾರಾಮಿ ಹೋಟೆಲ್​ನಲ್ಲಿ ಹಸೆಮಣೆ ಏರುವ ಮೂಲಕ ರಣವೀರ್​ ಸಿಂಗ್​ ಮತ್ತು ದೀಪಿಕಾ ಪಡುಕೋಣೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಐದು ವರ್ಷಗಳ ಕಾಲ ಸುಂದರ ಜೀವನ ನಡೆಸುವ ಮೂಲಕ ಬಾಲಿವುಡ್‌ನ ದಿ ಬೆಸ್ಟ್​ ಜೋಡಿಗಳಾಗಿದ್ದಾರೆ. ಜೊತೆಯಾಗಿ ಮೊದಲ ಬಾರಿ ಕಾಣಿಸಿಕೊಂಡ 2012ರಲ್ಲಿ ತೆರೆಕಂಡ 'ಗೋಲಿಯೋನ್ ಕಿ ರಾಸ್ಲೀಲಾ-ರಾಮ್ಲೀಲಾ ಚಿತ್ರದಲ್ಲೇ ಇಬ್ಬರ ನಡುವೆ ಪ್ರೀತಿ ಚಿಗುರಿತ್ತು.

ಇದನ್ನೂ ಓದಿ: ಕಮಲ್​ ಕೊಂಡಾಡಿದ ಅಮಿತಾಭ್​: ನಟ ಹಾಸನ್​ ನೆಗೆಟಿವ್​ ರೋಲ್​ ಒಪ್ಪಿಕೊಳ್ಳಲು ಕಾರಣವೇನು ಗೊತ್ತಾ?