ಖ್ಯಾತ ಪಂಜಾಬಿ ಗಾಯಕ ದಿವಂಗತ ಸಿಧು ಮೂಸೆವಾಲಾ ಅಭಿಮಾನಿಗಳಿಗೆ ಸಂತಸದ ಸಿಹಿ ಸುದ್ದಿಯೊಂದಿದೆ. ಸಿಧು ಅವರ 'ಮೇರಾ ನಾಮ್' ಎಂಬ ಹೊಸ ಹಾಡು ಇಂದು ಬಿಡುಗಡೆಯಾಗಿದೆ. ಈ ಹೊಸ ಹಾಡನ್ನು ಸಿಧು ಅವರ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ. ಜೊತೆಗೆ ಯೂಟ್ಯೂಬ್ನಲ್ಲೂ ಮೇರಾ ನಾಮ್ ಹಾಡು ಲಭ್ಯವಿದೆ. ಈ ಹಾಡನ್ನು ಬರ್ನಾ ಬಾಯ್ ಮತ್ತು ಸ್ಟೀಲ್ ಬ್ಯಾಂಗಲ್ಸ್ ಹಾಡಿದ್ದಾರೆ.
ಕಳೆದ ಕೆಲವು ತಿಂಗಳಿನಿಂದ ಸಿಧು ಮೂಸೆವಾಲಾ ಅವರ ಯಾವುದೇ ಹೊಸ ಹಾಡುಗಳು ಬಿಡುಗಡೆಗೊಂಡಿರಲಿಲ್ಲ. ಹೀಗಾಗಿ ಸಿಧು ಅಭಿಮಾನಿಗಳು ಅವರ ಹಾಡಿಗಾಗಿ ಕಾಯುತ್ತಿದ್ದರು. ಅದರಂತೆ ಕೊನೆಗೂ 'ಮೇರಾ ನಾಮ್' ಹಾಡು ಬಿಡುಗಡೆಯಾಗಿದ್ದು, 11 ನಿಮಿಷದಲ್ಲಿ 11 ಲಕ್ಷ ಮಂದಿ ವೀಕ್ಷಿಸಿದ್ದಾರೆ. ಸಿಧು ನಿಧನದ ನಂತರ ರಿಲೀಸ್ ಆಗುತ್ತಿರುವ ಅವರ ಮೂರನೆಯ ಸಾಂಗ್ ಇದಾಗಿದೆ. ಅವರ ಎರಡು ಹಾಡುಗಳು ಎಸ್ವೈಎಲ್ ಮತ್ತು ವಾರ್ ಈ ಹಿಂದೆ ಬಿಡುಗಡೆಯಾಗಿದೆ.
'ಮೇರಾ ನಾಮ್' ರಿಲೀಸ್ ಆದ ಕೂಡಲೇ ಅತೀ ಹೆಚ್ಚಿನ ಜನರು ಈ ಹಾಡನ್ನು ವೀಕ್ಷಿಸಿದ್ದಾರೆ. 'ಮೇರಾ ನಾಮ್ ಮೇರಾ ನಾಮ್' ಎಂದು ಈ ಹಾಡಿನ ಲಿರಿಕ್ಸ್ ಪ್ರಾರಂಭವಾಗುತ್ತದೆ. ಹಾಡಿನಲ್ಲಿ ಗಾಯಕನ ಜನಪ್ರಿಯತೆಯನ್ನು ಕಟ್ಟಿಕೊಡಲಾಗಿದೆ. ಅಭಿಮಾನಿಗಳು ಹಾಡು ಕೇಳಿ ಭಾವುಕರಾಗಿದ್ದು, ಕಮೆಂಟ್ ಮೂಲಕ ತಮ್ಮ ಅಭಿಪ್ರಾಯವನ್ನು ತಿಳಿಸುತ್ತಿದ್ದಾರೆ.
ಗಾಯಕ ಸ್ಟೀಲ್ ಬ್ಯಾಂಗಲ್ಸ್ ಅವರು ನವೆಂಬರ್ 2022 ರಲ್ಲಿ ಯುಕೆಗೆ ಭೇಟಿ ನೀಡಿದಾಗ ಸಿಧು ಅವರ ಫೋಷಕರನ್ನು ಭೇಟಿಯಾಗಿದ್ದರು. ಬಳಿಕ ಸಿಧು ಪೋಷಕರು ಮತ್ತು ಬರ್ನಾ ಬಾಯ್ ಜೊತೆಗಿನ ಫೋಟೋವನ್ನು ಶೇರ್ ಮಾಡಿದ್ದರು. ಆಗಲೇ ಈ ಹೊಸ ಹಾಡಿನ ಬಗ್ಗೆ ಅವರು ಸುಳಿವು ನೀಡಿದ್ದರು.
ಸಿಧು ಅಗಲಿಕೆಯ ನಂತರ ಬಿಡುಗೆಯಾದ ಹಾಡುಗಳಿವು.. ಸಿಧು ಮೂಸೆವಾಲಾ ನಿಧನದ ನಂತರ ಅವರ ಎರಡು ಹಾಡುಗಳು ಬಿಡುಗಡೆಗೊಂಡಿವೆ. ಎಸ್ವೈಎಲ್ ಮತ್ತು ವಾರ್ ಎಂಬ ಎರಡು ಸಾಂಗ್ಸ್ ಈಗಾಗಲೇ ರಿಲೀಸ್ ಆಗಿದೆ. ಆದರೆ ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಎಸ್ವೈಎಲ್ ಹಾಡನ್ನು ಯೂಟ್ಯೂಬ್ನಿಂದ ತೆಗೆದುಹಾಕಲಾಗಿದೆ. ವಾರ್ ಯೂಟ್ಯೂಬ್ನಲ್ಲಿ ಮಿಲಿಯನ್ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ.
ಗುಂಡಿಕ್ಕಿ ಸಿಧು ಹತ್ಯೆ: ಸಿಧು ಮೂಸೆವಾಲಾ ಹತ್ಯೆ ಪ್ರಕರಣ ಇಡೀ ದೇಶದ ಗಮನ ಸೆಳೆದಿತ್ತು. 2022ರ ಮೇ 29 ರಂದು ಮಾನ್ಸಾ ಜಿಲ್ಲೆಯ ಜವಾಹರ್ಕೆ ಗ್ರಾಮದಲ್ಲಿ ಅಪರಿಚಿತ ದುಷ್ಕರ್ಮಿಗಳು ಕಾಂಗ್ರೆಸ್ ನಾಯಕರೂ ಆಗಿದ್ದ ಸಿಧು ಮೂಸೆವಾಲಾ ಅವರನ್ನು ಗುಂಡಿಕ್ಕಿ ಕೊಂದಿದ್ದರು. ಸಿಧು ತಮ್ಮ ಕಾರಿನಲ್ಲಿ ಹೋಗುತ್ತಿದ್ದಾಗ ದುಷ್ಕರ್ಮಿಗಳು ಮನಬಂದಂತೆ ಗುಂಡು ಹಾರಿಸಿದ್ದು, ಗಾಯಕ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದರು. ಪಂಜಾಬ್ ಪೊಲೀಸರು ಮೂಸೆವಾಲಾ ಸೇರಿದಂತೆ 424 ಜನ ಪ್ರಮುಖ ಪೊಲೀಸ್ ಭದ್ರತೆ ಹಿಂತೆಗೆದುಕೊಂಡ ಎರಡು ದಿನಗಳ ನಂತರ ಈ ಕೊಲೆ ನಡೆದಿತ್ತು. ಅದಾದ ನಂತರ ಅವರ ತಂದೆ ಬಲ್ಕೌರ್ ಸಿಂಗ್ ಅವರಿಗೂ ಕೊಲೆ ಬೆದರಿಕೆ ಬಂದಿತ್ತು.
ಇದನ್ನೂ ಓದಿ: 'ನಾನು ನಿಮ್ಮನ್ನು ಪ್ರೀತಿಸುತ್ತೇನೆ, ನೀವು ನನ್ನನ್ನು ಪ್ರೀತಿಸುತ್ತೀರಿ ಎಂದು ನನಗೆ ತಿಳಿದಿದೆ'
