ರಶ್ಮಿಕಾ ಮಂದಣ್ಣ ಇತ್ತೀಚಿಗೆಷ್ಟೆ ತಮ್ಮ ಬಾಲಿವುಡ್ ಸಿನಿಮಾ 'ಅನಿಮಲ್' ಯಶಸ್ಸಿನ ಪಾರ್ಟಿ ಮುಗಿಸಿದ್ದಾರೆ. ದಕ್ಷಿಣ ಮತ್ತು ಹಿಂದಿ ಚಿತ್ರದಲ್ಲಿ ಸದ್ಯ ಬೇಡಿಕೆ ನಟಿಯಾಗಿ ಮಿಂಚುತ್ತಿರುವ ನಟಿ ರಶ್ಮಿಕಾಗೆ 'ಅನಿಮಲ್' ಸಿನಿಮಾ ಹಿಂದಿ ಚಿತ್ರರಂಗದಲ್ಲಿ ದೊಡ್ಡ ಯಶಸ್ಸು ನೀಡಿದೆ. ಈಗಾಗಲೇ ತೆಲುಗಿನ ಗೀತಾ ಗೋವಿಂದಂ, ಸೀತಾ ರಾಮಂ ಸೇರಿದಂತೆ ಹಲವು ಸೂಪರ್ ಡೂಪರ್ ಸಿನಿಮಾಗಳ ಮೂಲಕ ನ್ಯಾಷನಲ್ ಕ್ರಶ್ ಪಟ್ಟಕ್ಕೂ ಏರಿದ್ದರು. ತಮ್ಮ ಬಿಡುವಿಲ್ಲದ ಸಿನಿಮಾ ಶೂಟಿಂಗ್ಗಳ ನಡುವೆಯೂ ಸಾಮಾಜಿಕ ಜಾಲತಾಣದಲ್ಲಿ ಅತಿ ಹೆಚ್ಚು ಸಕ್ರಿಯವಾಗಿರುವ ಈ ನಟಿ ಅಭಿಮಾನಿಗಳೊಂದಿಗೆ ತಮ್ಮ ಫೋಟೋ ಮತ್ತು ಅನಿಸಿಕೆಗಳನ್ನು ಆಗಾಗ ಹಂಚಿಕೊಳ್ಳುತ್ತಿರುತ್ತಾರೆ.
ಇದೀಗ ಅಭಿಮಾನಿಗಳೊಂದಿಗೆ ಫೇಸ್ ಮಾಸ್ಕ್ ಹಾಕಿರುವ ಚಿತ್ರವನ್ನು ಹಂಚಿಕೊಂಡಿದ್ದು, ತಮ್ಮ ಆರೈಕೆ ಕುರಿತು ತಿಳಿಸಿದ್ದಾರೆ. ಈ ಚಿತ್ರದ ಜೊತೆಗೆ ಅವರು ಈ ರೀತಿಯ ಸಾಲುಗಳನ್ನು ಬರೆದಿದ್ದಾರೆ. ಏನು ಮಾಡುವುದು - ಅತಿಯಾದ ಕೆಲಸ - ನಿದ್ರೆ ಇಲ್ಲ- ಬಿಡುವಿರದ ಪ್ರಯಾಣದಿಂದ ತ್ವಚೆಗೆ ವಿಶ್ರಾಂತಿ ಇಲ್ಲವಾಗಿದೆ. ತ್ವಚೆ ತಜ್ಞರ ಬಳಿ ಕೂಡ ಹೋಗಲು ಸಮಯ ಸಿಗುತ್ತಿಲ್ಲ. ಹೀಗಾಗಿ ಏನು ಮಾಡುತ್ತೀರಾ.. ಒಂದು ಪರಿಹಾರ ಇದೆ - ಶೀಟ್ ಮಾಸ್ಕ್ ಎಂದು ಬರೆದು ತ್ವಚೆ ಮಾಸ್ಕ್ ಹಾಕಿಕೊಂಡಿರುವ ಫೋಟೋವನ್ನು ಹಂಚಿಕೊಂಡಿದ್ದಾರೆ. ಈ ಮೂಲಕ ತಮ್ಮ ಬಿಡುವಿಲ್ಲದ ದಿನಚರಿ ಸಂಕ್ಷಿಪ್ತವಾಗಿ ತಿಳಿಸಿದ್ದಾರೆ. ಜೊತೆಗೆ ತಮ್ಮ ಕೆಲಸದ ಬದ್ಧತೆಯ ನಡುವೆಯೂ ತಮ್ಮ ಕಾಳಜಿಗೆ ಸಮಯ ಮೀಸಲಿಟ್ಟಿರುವುದಾಗಿ ತಿಳಿಸಿದ್ದಾರೆ.
ನಟಿ ರಶ್ಮಿಕಾ ಕಳೆದ ಡಿಸೆಂಬರ್ನಲ್ಲಿ ತಮ್ಮ ಸಿನಿ ಪಯಣದಲ್ಲಿ ಏಳು ವರ್ಷಗಳು ಪೂರೈಸಿದ ಕುರಿತು ತಿಳಿಸಿದ್ದರು. ರಿಷಬ್ ಶೆಟ್ಟಿ ನಿರ್ದೇಶನದಲ್ಲಿ ಕನ್ನಡದ 'ಕಿರಿಕ್ ಪಾರ್ಟಿ' ಚಿತ್ರದ ಮೂಲಕ 2016ರಲ್ಲಿ ಸಿನಿಮಾ ಪ್ರವೇಶಿಸಿದ ರಶ್ಮಿಕಾ ಬಳಿಕ ತೆಲುಗು ಚಿತ್ರದಲ್ಲಿ ಹಲವು ಹಿಟ್ ಸಿನಿಮಾ ನೀಡುವ ಮೂಲಕ ಸೂಪರ್ ಹಿಟ್ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ.
ತಮಿಳಿನಲ್ಲೂ ನಟ ವಿಜಯ್ ಜೊತೆ ನಟಿಸಿರುವ ರಶ್ಮಿಕಾ ಕಳೆದ ವರ್ಷ ಅಮಿತಾಬ್ ಬಚ್ಚನ್ ಅವರೊಂದಿಗೂ ಅಭಿನಯಿಸುವ ಮೂಲಕ 'ಗುಡ್ಬೈ' ಚಿತ್ರದೊಂದಿಗೆ ಹಿಂದಿ ಸಿನಿಮಾದ ಪಯಣ ಆರಂಭಿಸಿದ್ದರು. ಇದಾದ ಬಳಿಕ ನಟ ಸಿದ್ಧಾರ್ಥ್ ಮಲ್ಹೋತ್ರಾ ಜೊತೆಗೆ 'ಮಿಷನ್ ಮಜ್ನು' ಚಿತ್ರದಲ್ಲಿ ನಟಿಸಿದ ಅವರಿಗೆ ಸಂದೀಪ್ ರೆಡ್ಡಿ ವಾಂಗಾ ಅವರ ನಿರ್ದೆಶನದ 'ಅನಿಮಲ್' ಸಿಕ್ಕಾಪಟ್ಟೆ ಯಶಸ್ಸು ತಂದುಕೊಟ್ಟಿದೆ. ಚಿತ್ರದಲ್ಲಿ ನಟ ರಣಬೀರ್ ಕಪೂರ್ ಹೆಂಡತಿಯಾಗಿ ರಶ್ಮಿಕಾ ಮಿಂಚಿದ್ದಾರೆ.
ಸದ್ಯ ಹಿಂದಿ ಸೇರಿದಂತೆ ದಕ್ಷಿಣ ಭಾರತದ ಸಿನಿಮಾದಲ್ಲಿ ಅತ್ಯಂತ ಬ್ಯುಸಿಯಾಗಿದ್ದಾರೆ ನಟಿ ರಶ್ಮಿಕಾ ಮಂದಣ್ಣ. 'ಪುಷ್ಪ 2: ದಿ ರೂಲ್'ನಲ್ಲಿ ಮತ್ತೆ ಶ್ರೀವಲ್ಲಿ ಪಾತ್ರದಲ್ಲಿ ಅವರು ನಟಿಸುತ್ತಿದ್ದಾರೆ. ಸದ್ಯ ಈ ಚಿತ್ರದ ಶೂಟಿಂಗ್ ಭರದಿಂದ ಸಾಗಿದ್ದು, ನಟ ಅಲ್ಲು ಅರ್ಜುನ್, ಫಹಾದ್ ಫಾಸಿಲ್, ಜಗಪತಿಬಾಬು, ಪ್ರಕಾಶ್ ರಾಜ್, ಸುನೀಲ್ ಸೇರಿದಂತೆ ಪ್ರಮುಖರು ಈ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಇದರ ಜೊತೆಗೆ 'ದಿ ಗರ್ಲ್ಫ್ರೆಂಡ್' ಚಿತ್ರದಲ್ಲೂ ಬ್ಯುಸಿಯಾಗಿದ್ದಾರೆ ನಟಿ ರಶ್ಮಿಕಾ.
ಇದನ್ನೂ ಓದಿ: ಮೂರು ಚಿತ್ರದೊಂದಿಗೆ 700 ಕೋಟಿ ಕ್ಲಬ್ ಸೇರಿದ ದಕ್ಷಿಣ ಭಾರತದ ಏಕೈಕ ನಟ ಪ್ರಭಾಸ್
