ಬೆಂಗಳೂರು: ಖ್ಯಾತ ನಿರ್ದೇಶಕ ರಾಜಮೌಳಿ ತಮ್ಮ ಮುಂದಿನ ಸಿನಿಮಾವನ್ನು ಮಹೇಶ್ ಬಾಬು ಜೊತೆ ಮಾಡುತ್ತಿದ್ದಾರೆ ಎಂಬ ಸುದ್ದಿ ಇದೀಗ ಅಧಿಕೃತವಾಗಿದೆ. ಮಹೇಶ್ ಬಾಬು ಅವರ 'ಎಸ್ಎಸ್ಎಂಬಿ29' ಪ್ಯಾನ್ ವರ್ಲ್ಡ್ ಪ್ರಾಜೆಕ್ಟ್ ಆಗಿದ್ದು, ಇದಕ್ಕಾಗಿ ಅವರು ರಾಜಮೌಳಿ ತಂಡವನ್ನು ಸೇರಿದದ್ದಾರೆ. ಈ ಕುರಿತು ಇತ್ತೀಚೆಗೆ ಖ್ಯಾತ ಬರಹಕಾರ ಕೆವಿ ವಿಜಯೇಂದ್ರ ಪ್ರಸಾದ್ ಕೂಡ ಚಿತ್ರದ ಮಾಹಿತಿ ಹಂಚಿಕೊಂಡಿದ್ದರು. ಸುದ್ದಿ ವಾಹಿನಿಯೊಂದರ ಸಂದರ್ಶನದಲ್ಲಿ ಮಾತನಾಡಿರುವ ಕೆವಿ ವಿಜಯೇಂದ್ರ ಪ್ರಸಾದ್, 'ಎಸ್ಎಸ್ಎಂಬಿ29' ಚಿತ್ರಕ್ಕೆ ಮಹೇಶ್ ಬಾಬು, ರಾಜಮೌಳಿ ಒಂದಾಗಿದ್ದಾರೆ. ಈ ಚಿತ್ರ 'ಆರ್ಆರ್ಆರ್' ಸಿನಿಮಾವನ್ನು ಮೀರಿಸಲಿದ್ದು, ಸಿಕ್ಕಾಪಟ್ಟೆ ಆ್ಯಕ್ಷನ್ ಸಿನಿಮಾವಾಗಿರಲಿದೆ ಎಂದಿದ್ದಾರೆ.
'ಆರ್ಆರ್ಆರ್' ಬಳಿಕ ರಾಜಮೌಳಿ ಅವರ ಮುಂದಿನ ಯೋಜನೆ 'ಎಸ್ಎಸ್ಎಂಬಿ29' ಆಗಿದೆ. ಈ ಚಿತ್ರಕ್ಕಾಗಿ ಜಗತ್ತಿನಾದ್ಯಂತ ಅಭಿಮಾನಿಗಳು ಕಾತುರರಾಗಿದ್ದಾರೆ. ಈ ಹಿಂದೆ ಕೂಡ ರಾಜಮೌಳಿ ತಮ್ಮ ಮುಂದಿನ ಚಿತ್ರವನ್ನು ನಟ ಮಹೇಶ್ ಬಾಬುಗೆ ನಿರ್ದೇಶನ ಮಾಡಲಿದ್ದಾರೆ ಎಂಬ ಸುದ್ದಿ ಹೆಚ್ಚು ಕೇಳಿ ಬಂದಿತು. ಈ ಕುರಿತು ಮಾತನಾಡಿರುವ ವಿಜಯೇಂದ್ರ ಪ್ರಸಾದ್, ಇದೊಂದು ದೊಡ್ಡ ಮಟ್ಟದ ಸಿನಿಮಾ ಆಗಿರಲಿದ್ದು, ಆರ್ಆರ್ಆರ್ಗಿಂತ ದೊಡ್ಡ ಮಟ್ಟದಲ್ಲಿರಲಿದೆ ಎಂದಿದ್ದಾರೆ
ವರ್ಕ್ಶಾಪ್ನಲ್ಲಿ ಪರಕಾಯ ಪ್ರವೇಶಕ್ಕೆ ಮಹೇಶ್ ಬಾಬು ಸಜ್ಜು: ಈ ಚಿತ್ರದ ಪಾತ್ರಕ್ಕಾಗಿ ನಟ ಮಹೇಶ್ ಬಾಬು ಮೂರು ತಿಂಗಳ ವರ್ಕ್ಶಾಪ್ಗೆ ತೆರಳಲಿದ್ದಾರೆ. ರಾಜಮೌಳಿ ತಮ್ಮ ಪ್ರತಿ ಸಿನಿಮಾದಲ್ಲೂ ನಟರು ತಮ್ಮ ಪಾತ್ರದ ಆಳ ಹೊಕ್ಕುವ ಉದ್ದೇಶದಿಂದ ಈ ರೀತಿಯ ಕಠಿಣ ವರ್ಕ್ ಶಾಪ್ ನಡೆಸುವುದು ಸಾಮಾನ್ಯ. ಇದು ಸಿನಿ ಉದ್ಯಮದ ಎಲ್ಲರಿಗೂ ತಿಳಿದ ವಿಚಾರವಾಗಿದೆ. ಇದೀಗ ಎಸ್ಎಸ್ಎಂಬಿ29 ಚಿತ್ರದ ಪಾತ್ರಧಾರಿಗಳು ಈ ರೀತಿಯ ವರ್ಕ್ಶಾಪ್ ಪಡೆಯಲಿದ್ದಾರೆ.
ತಮ್ಮ ಚಿತ್ರದಲ್ಲಿ ರಾಮಯಾಣ ಮತ್ತು ಮಹಾಭಾರತದಂತಹ ಅಂಶಗಳನ್ನು ಸೇರಿಸುವಲ್ಲಿ ಖ್ಯಾತಿ ಪಡೆದಿರುವ ರಾಜಮೌಳಿ ಅವರು, ಈ ಚಿತ್ರದಲ್ಲಿ ಮಹೇಶ್ ಬಾಬು ಅವರ ಪಾತ್ರವು ಹನುಮಂತನ ಪ್ರೇರಣೆಯಿಂದ ರೂಪಿಸಿದ್ದಾರೆ ಎನ್ನಲಾಗಿದೆ. ಈ ಚಿತ್ರದ ಸೆಟ್ ಅನ್ನು ಆಫ್ರಿಕನ್ ಅರಣ್ಯದಲ್ಲಿ ಹಾಕುವ ಸಾಧ್ಯತೆ ಇದ್ದು, ಮಹೇಶ್ ಬಾಬು ಅವರ ಪಾತ್ರವನ್ನು ರಾಮಾಯಣದ ಪ್ರಮುಖಾಂಶಗಳಿಂದ ಕೂಡಿದ್ದು, ಅದಕ್ಕೆ ವಿಶೇಷ ಟ್ವಿಸ್ಟ್ ನೀಡಲಾಗಿದೆ. ಅರಣ್ಯದಲ್ಲಿ ಹೋರಾಡಿ ಗೆಲ್ಲುವ ಕಥಾನಕವನ್ನು ಇದು ಹೊಂದಿರಲಿದ್ದು, ರಾಮಾಯಣದ ಪ್ರಭಾವವನ್ನು ಹೊಂದಿರಲಿದೆ ಎನ್ನಲಾಗಿದೆ.
ಈ ಚಿತ್ರದ ಕುರಿತು ಈ ಮೊದಲು 'ಎಸ್ಎಸ್ಎಂಬಿ 29' ಕುರಿತು ಮಾತನಾಡಿರುವ ನಿರ್ದೇಶಕರು, ಇದೊಂದು ಜಾಗತಿಕ ಸಾಹಸಿ ಚಿತ್ರವಾಗಿದ್ದು, ರಾಜಮೌಳಿ ತಂದೆ ವಿಜಯೇಂದ್ರ ಈ ಚಿತ್ರಕ್ಕೆ ಚಿತ್ರಕಥೆ ಬರೆಯಲಿದ್ದಾರೆ. ಇದೊಂದು ಆ್ಯಕ್ಷನ್, ಥ್ರಿಲ್ಲರ್ ಮತ್ತು ಡ್ರಾಮಾ ಆಗಿರಲಿದೆ. 'ಆರ್ಆರ್ಆರ್' ಆಸ್ಕರ್ ಅಂಗಳದಲ್ಲಿ ಮಿಂಚಿರುವ ಹಿನ್ನಲೆ 'ಎಸ್ಎಸ್ಎಂಬಿ 29'ಗೆ ಜಾಗತಿಕ ಪ್ರೇಕ್ಷಕರಲ್ಲಿ ಸಾಕಷ್ಟು ನಿರೀಕ್ಷೆ ಮೂಡಿಸಿದ್ದು, ಕುತೂಹಲ ಹುಟ್ಟು ಹಾಕಿದೆ. ಈ ಚಿತ್ರವು ಬೇರೆ ಚಿತ್ರಗಳಿಗಿಂದ ವಿಭಿನ್ನವಾಗಿ ಸಿನಿಮೀಯ ಅನುಭವದ ಮೂಲಕ ಸೆರೆಹಿಡಿಯುವ ಭರವಸೆ ವ್ಯಕ್ತವಾಗಿದೆ.
ಇದನ್ನೂ ಓದಿ: ರವಿತೇಜ- ಗೋಪಿಚಂದ್ ಕಾಂಬಿನೇಷನ್ನಲ್ಲಿ 4ನೇ ಸಿನಿಮಾ ಫಿಕ್ಸ್; ಮೋಷನ್ ಪೋಸ್ಟರ್ ಔಟ್
