ದಕ್ಷಿಣ ಚಿತ್ರರಂಗದ ಸುಂದರ ಜೋಡಿ ಫಹಾದ್ ಫಾಸಿಲ್ ಮತ್ತು ನಜ್ರಿಯಾ ನಜೀಮ್. ಇವರಿಬ್ಬರು ಆದರ್ಶ ದಂಪತಿ ಎಂದರೆ ತಪ್ಪಾಗಲಾರದು. ಫಹಾದ್ ಅವರು ಸೋಷಿಯಲ್ ಮೀಡಿಯಾದಲ್ಲಿ ಹೆಚ್ಚು ಆಕ್ಟೀವ್ ಇರೋದಿಲ್ಲ. ಆದರೆ, ನಜ್ರಿಯಾ ನಜೀಮ್ ಪತಿಯೊಂದಿಗಿನ ಫೋಟೋವನ್ನು ಆಗಾಗ ಹಂಚಿಕೊಳ್ಳುತ್ತಿರುತ್ತಾರೆ. ಇಂದು ಫಹಾದ್ ಫಾಸಿಲ್ ಹುಟ್ಟುಹಬ್ಬದ ಸಲುವಾಗಿ ಹೊಸ ಚಿತ್ರವನ್ನು ಹಂಚಿಕೊಂಡು, ಅವರಿಗೆ ಶುಭಾಶಯ ಕೋರಿದ್ದಾರೆ. 42ನೇ ವಸಂತಕ್ಕೆ ಕಾಲಿಟ್ಟಿರುವ ನಟನಿಗೆ ಎಲ್ಲೆಡೆಯಿಂದ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ.
ಫಹಾದ್ ಫಾಸಿಲ್ ಜೊತೆಗೆ ನಿಂತಿರುವ ಫೋಟೋವನ್ನು ಇನ್ಸ್ಟಾದಲ್ಲಿ ಹಂಚಿಕೊಂಡಿರುವ ನಜ್ರಿಯಾ ನಜೀಮ್, "ಹುಟ್ಟುಹಬ್ಬದ ಶುಭಾಶಯಗಳು. ಲವ್ ಯು ಶಾನು. ನೀವು ವಜ್ರದಂತೆ ಹೊಳೆಯಿರಿ. ನಿಮ್ಮಂತೆ ಯಾರೂ ಇಲ್ಲ. ಅತ್ಯುತ್ತಮ ಸ್ನೇಹಿತ.. ವಿ ಲವ್ ಯು" ಎಂದು ಪ್ರೀತಿಯಿಂದ ಶುಭ ಹಾರೈಸಿದ್ದಾರೆ. ಅವರಿಬ್ಬರ ಸುಂದರ ಫೋಟೋವನ್ನು ಮಲಯಾಳಂ ಸೂಪರ್ಸ್ಟಾರ್ ನಟ ಮಮ್ಮುಟಿ ಕ್ಲಿಕ್ಕಿಸಿದ್ದಾರೆ. ಅವರಿಗೂ ಕೂಡ ನಜ್ರಿಯಾ ನಜೀಮ್ ಧನ್ಯವಾದ ಹೇಳುವುದರೊಂದರಿಗೆ 'ನೀವು ನಮ್ಮ ನೆಚ್ಚಿನ ವ್ಯಕ್ತಿ' ಎಂದಿದ್ದಾರೆ.
ಫಹಾದ್ ಫಾಸಿಲ್ ಅವರು ಪ್ರತಿ ವರ್ಷದಂತೆ ಈ ಬಾರಿಯೂ ಹೆಂಡತಿ, ಕುಟುಂಬಸ್ಥರು ಮತ್ತು ಆತ್ಮೀಯ ಸ್ನೇಹಿತರೊಂದಿಗೆ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ. ಮಾಲಿವುಡ್ ಸೂಪರ್ಸ್ಟಾರ್ ಮಮ್ಮುಟಿ ಮತ್ತು ಅವರ ಮಗ, ನಟ ದುಲ್ಕರ್ ಸಲ್ಮಾನ್ ಜೊತೆ ಫಹಾದ್ ಫಾಸಿಲ್ ಮತ್ತು ನಜ್ರಿಯಾ ನಜೀಮ್ ಉತ್ತಮ ಬಾಂಧವ್ಯ ಇಟ್ಟುಕೊಂಡಿದ್ದಾರೆ. 2006 ರಲ್ಲಿ ಮಮ್ಮುಟಿ ಮಗಳಾಗಿ ಪಲುಂಕು ಚಿತ್ರದಲ್ಲಿ ನಜ್ರಿಯಾ ನಜೀಮ್ ನಟಿಸಿದ್ದರು. ಈ ಮೂಲಕ ಅವರು ಬಾಲ ನಟಿಯಾಗಿ ಬಣ್ಣದ ಲೋಕ ಪ್ರವೇಶಿಸಿದರು.
ಇನ್ನು ಫಹಾದ್ ಫಾಸಿಲ್ ಬಹುಭಾಷಾ ನಟನಾಗಿ ಗುರುತಿಸಿಕೊಂಡಿದ್ದಾರೆ. ತಮ್ಮ ಅಮೋಘ ಅಭಿನಯದಿಂದಲೇ ಅಪಾರ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಇವರ ಹೆಚ್ಚಿನ ಎಲ್ಲಾ ಸಿನಿಮಾಗಳು ಬ್ಲಾಕ್ಬಸ್ಟರ್ ಹಿಟ್ ಕಂಡಿವೆ. ಮಮ್ಮುಟ್ಟಿ ಅವರ ಅನೇಕ ಸಿನಿಮಾದಲ್ಲಿ ಫಹಾದ್ ಪಾಸಿಲ್ ಅವರು ನಟಿಸಿದ್ದಾರೆ. ಸದ್ಯ ನಟ, ಮಾರಿ ಸೆಲ್ವರಾಜ್ ನಿರ್ದೇಶನದ ಮಾಮಣ್ಣನ್ ಚಿತ್ರದ ಯಶಸ್ಸಿನ ಖುಷಿಯಲ್ಲಿದ್ದಾರೆ. ರಾಷ್ಟ್ರಪ್ರಶಸ್ತಿ ವಿಜೇತ ನಟನ ಅತ್ಯುತ್ತಮ ನಟನೆಯು ಉತ್ತಮ ಮೆಚ್ಚುಗೆ ಗಳಿಸಿದೆ. ವಡಿವೇಲು, ಉದಯನಿಧಿ ಸ್ಟಾಲಿನ್ ಮತ್ತು ಕೀರ್ತಿ ಸುರೇಶ್ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.
ಸದ್ಯ ಫಹಾದ್ ಫಾಸಿಲ್ 'ಪುಷ್ಪ 2: ದಿ ರೂಲ್' ಚಿತ್ರದ ವಿಚಾರವಾಗಿ ಸುದ್ದಿಯಲ್ಲಿದ್ದಾರೆ. ಈ ಸಿನಿಮಾದಲ್ಲಿ ಅವರ ಫಸ್ಟ್ ಲುಕ್ ಅನ್ನು ಚಿತ್ರತಂಡ ಇಂದು ಬಿಡುಗಡೆಗೊಳಿಸಿದೆ. ಖಾಕಿ ಜಾಕೆಟ್ ಮತ್ತು ಕೂಲಿಂಗ್ ಗ್ಲಾಸ್ ಧರಿಸಿ ಸಿಗರೇಟ್ ಸೇದುತ್ತಿರುವ ನೋಟದಲ್ಲಿ ಫಹಾದ್ ಫಾಸಿಲ್ ಕಾಣಿಸಿಕೊಂಡಿದ್ದಾರೆ. ತಲೆಯಲ್ಲಿ ಕೂದಲಿಲ್ಲದೇ ವಿಲನ್ ಪಾತ್ರಕ್ಕೆ ಬೇಕಾದಂತೆ ಅವರನ್ನು ತೋರಿಸಲಾಗಿದೆ.
ಪುಷ್ಪ 2: ದಿ ರೂಲ್ ಸಿನಿಮಾವನ್ನು ಸುಕುಮಾರನ್ ಬರೆದು ನಿರ್ದೇಶಿಸಿದ್ದಾರೆ. ಮೈತ್ರಿ ಮೂವೀ ಮೇಕರ್ಸ್ ನಿರ್ಮಿಸಿದೆ. 2023ರ ಡಿಸೆಂಬರ್ ಕೊನೆಯಲ್ಲಿ ಸಿನಿಮಾ ತೆರೆಗೆ ಬರಲಿದೆ. ಚಿತ್ರದಲ್ಲಿ ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ, ಫಹಾದ್ ಫಾಸಿಲ್, ಸುನೀಲ್, ಅಜಯ್, ರಾವ್ ರಮೇಶ್, ಅನುಸೂಯಾ ಸೇರಿದಂತೆ ಅನೇಕರು ನಟಿಸಿದ್ದಾರೆ. ಚಿತ್ರಕ್ಕೆ ದೇವಿ ಶ್ರೀ ಪ್ರಸಾದ್ ಸಂಗೀತ ನಿರ್ದೇಶನ, ಮಿರೋಸ್ಪಾ ಕುಬಾ ಛಾಯಾಗ್ರಹಣ, ಕಾರ್ತಿಕಾ ಶ್ರೀನಿವಾಸ್ ಮತ್ತು ರೂಬೆನ್ ಸಂಕಲನವಿದೆ.
ಇದನ್ನೂ ಓದಿ: Pushpa 2: ನಟ ಫಹಾದ್ ಫಾಸಿಲ್ ಜನ್ಮದಿನ.. 'ಪುಷ್ಪ 2' ಖಳನಾಯಕನ ಫಸ್ಟ್ ಲುಕ್ ಔಟ್
