ಕನ್ನಡ ಚಿತ್ರರಂಗದಲ್ಲಿ ಸಿನಿಪ್ರಿಯರಿಗೆ ವಿವಿಧ ರೀತಿಯ ಸಿನಿಮಾಗಳನ್ನು ಪರಿಚಯಿಸುತ್ತಿರುವ ಕೆಆರ್ಜಿ ಸ್ಟುಡಿಯೋಸ್ ಸಂಸ್ಥೆ ಇಂದು 6ನೇ ವರ್ಷದ ಸಂಭ್ರಮದಲ್ಲಿದೆ. ಈ ಖುಷಿ ವೇಳೆಯಲ್ಲಿ ಸಿನಿ ಪ್ರಿಯರಿಗೆ ಗುಡ್ ನ್ಯೂಸ್ ಒಂದನ್ನು ಕೊಟ್ಟಿದೆ. ದಕ್ಷಿಣ ಭಾರತದ ಹೆಸರಾಂತ ಸಂಸ್ಥೆ, ಪ್ರಾದೇಶಿಕ ಭಾಷೆಗಳ ಮೇಲೆ ನಿರ್ದಿಷ್ಟ ಗಮನ ಹೊಂದಿರುವ ಟಿವಿಎಫ್ ಮೋಷನ್ ಪಿಕ್ಚರ್ಸ್‌ನೊಂದಿಗೆ ಕೆಆರ್ಜಿ ಸ್ಟುಡಿಯೋಸ್ ಕೈ ಜೋಡಿಸಿದೆ.
ತಮ್ಮ 6ನೇ ವರ್ಷದ ಸಂಭ್ರಮದ ಸಲುವಾಗಿ ಕೆಆರ್ಜಿ ಸಂಸ್ಥೆಯು ಈ ಸಹಯೋಗವನ್ನು ಘೋಷಿಸಿ, ಎರಡೂ ಸಂಸ್ಥೆಯು ಇನ್ನು ಮುಂದೆ ವಿಶಿಷ್ಟ ಕಥೆಗಳನ್ನು ಹಾಗೂ ಮೌಲ್ಯಗಳನ್ನು ಪ್ರತಿಬಿಂಬಿಸುತ ಚಿತ್ರಗಳನ್ನು ಸಿನಿ ಪ್ರೇಕ್ಷಕರಿಗೆ ಪರಿಚಯಿಸುವುದ್ದಕ್ಕೆ ಸಜ್ಜಾಗಿದೆ ಎಂದು ತಿಳಿಸಿದೆ.
ಕೆಆರ್ಜಿ ಸ್ಟುಡಿಯೋಸ್ ಕಥೆಗಳ ಸೃಜನಾತ್ಮಕ ಬೆಳವಣಿಗೆ, ಅದರ ಕಾರ್ಯಗತಗೊಳಿಸುವಿಕೆ ಮತ್ತು ಎಲ್ಲೆಡೆ ಪ್ರೇಕ್ಷಕರಿಗೆ ಪ್ರಸ್ತುತಪಡಿಸುವಿಕೆಯಿಂದ ಚಲನಚಿತ್ರ ನಿರ್ಮಾಣದ ಸಂಪೂರ್ಣ ವ್ಯಾಪ್ತಿಯನ್ನು ಒಳಗೊಳ್ಳುವ ವಿಚಾರದಲ್ಲಿ ಬದ್ಧವಾಗಿದೆ. ಹೊಸ ಧ್ವನಿಗಳು, ತಾಜಾ ಮತ್ತು ವೈವಿಧ್ಯಮಯ ಕಥೆ ಹೇಳುವಿಕೆ ಮತ್ತು ಆಳವಾದ, ಅರ್ಥಪೂರ್ಣ ಮೈತ್ರಿಗಳನ್ನು ಪ್ರೋತ್ಸಾಹಿಸುವುದು ಇವರ ಗುರಿಯಾಗಿದೆ.
ಕೆಆರ್ಜಿ ಸ್ಟುಡಿಯೋಸ್‌ನ ಸಂಸ್ಥಾಪಕ ಹೇಳಿದ್ದಿಷ್ಟು: ಕೆಆರ್ಜಿ ಸ್ಟುಡಿಯೋಸ್‌ನ ಸಂಸ್ಥಾಪಕ ಕಾರ್ತಿಕ್ ಗೌಡ ಮಾತನಾಡಿ, "6 ವರ್ಷಗಳ ಹಿಂದೆ ನಾವು ಕನ್ನಡ ಮತ್ತು ಇತರೆ ಪ್ರಾದೇಶಿಕ ಭಾಷೆಯ ಚಿತ್ರರಂಗಕ್ಕೆ ಅರ್ಥಪೂರ್ಣವಾಗಿ ಕೊಡುಗೆ ನೀಡುವ ಉದ್ದೇಶದಿಂದ ಕೆಆರ್ಜಿ ಸಂಸ್ಥೆ ಪ್ರಾರಂಭಿಸಿದ್ದೇವೆ. ಕಥೆ, ಗುಣಮಟ್ಟದ ನಿರ್ವಹಣೆ ಮತ್ತು ವ್ಯಾಪಕ ವಿತರಣೆಗೆ ನಿರಂತರವಾಗಿ ಗಮನ ಹರಿಸಿದ್ದೇವೆ. ನಮ್ಮ ಪ್ರಯತ್ನ ಯಾವಾಗಲೂ ವೈವಿಧ್ಯಮಯ ಕಥೆಗಳು ಮತ್ತು ಕಥೆಗಾರರನ್ನು ಪ್ರೋತ್ಸಾಹಿಸುವುದಾಗಿದೆ. ಟಿವಿಎಫ್ನೊಂದಿಗೆ ನಮ್ಮ ಸಹಯೋಗವು - ಬಲವಾದ ಮತ್ತು ವಿಶಿಷ್ಟವಾದ ಪಾತ್ರ ಆಧಾರಿತ ಕಥೆ ಹೇಳುವಿಕೆಯಲ್ಲಿ ಮುಂದುವರಿಯಲು ಮತ್ತು ಶಕ್ತಿಯ ಕೇಂದ್ರವಾಗಿದೆ. ಮೀಡಿಯಾ ಮತ್ತು ಎಂಟರ್‌ಟೈನ್‌ಮೆಂಟ್‌ನಲ್ಲಿ ಅನುಭವಿ ಆಗಿರುವ ವಿಜಯ್ ಸುಬ್ರಮಣ್ಯಂ ಅವರಿಗೆ ನಾನು ಧನ್ಯವಾದ ಹೇಳಲು ಬಯಸುತ್ತೇನೆ. ಅವರು ಈ ಉದ್ದೇಶವನ್ನು ಬೆಂಬಲಿಸಿದರು ಮತ್ತು ಈ ಪ್ರಯಾಣದ ಭಾಗವಾಗಲು ಸಾಥ್ ನೀಡಿದ್ದಾರೆ" ಎಂದು ತಿಳಿಸಿದರು.
ಸಹಯೋಗದ ಕುರಿತು ಟಿವಿಎಫ್ ಸಂಸ್ಥಾಪಕರಾದ ಅರುಣಭ್ ಕುಮಾರ್ ಮಾತನಾಡಿ, ''ಒಟ್ಟಿಗೆ ಭಾರತದಾದ್ಯಂತ ಕಥೆಗಳನ್ನು ಹೇಳುವ ಉದ್ದೇಶದಿಂದ ಕೆಆರ್ಜಿ ಜೊತೆ ಕೈ ಜೋಡಿಸಿದ್ದೇವೆ. ರತ್ನನ್ ಪ್ರಪಂಚ, ಗುರುದೇವ್ ಹೊಯ್ಸಳದಂತಹ ಸೂಪರ್ ಹಿಟ್ ಚಿತ್ರಗಳೊಂದಿಗೆ ಅದ್ಭುತ ಸಂದೇಶ ಕೊಟ್ಟ ಸ್ಟುಡಿಯೋ ಜೊತೆಗೆ ಪಾಲುದಾರರಾಗಲು ಹೆಮ್ಮೆಯಾಗುತ್ತದೆ. ಕನ್ನಡ, ತಮಿಳು, ಮಲಯಾಳಂ ಭಾಷೆಗಳಲ್ಲಿ ಒಳ್ಳೊಳ್ಳೆ ಚಲನಚಿತ್ರಗಳನ್ನು ಮಾಡಲು ಮತ್ತು ಹೆಚ್ಚು ವೈವಿಧ್ಯಮಯ ಕಥೆಗಳನ್ನು ಹೇಳಲು ನಾವು ಸದಾ ಪ್ರಯತ್ನಿಸುತ್ತೇವೆ'' ಎಂದು ತಿಳಿಸಿದರು.
ಟಿವಿಎಫ್ ಅಧ್ಯಕ್ಷ ವಿಜಯ್ ಕೋಶಿ ಈ ಕುರಿತು ಮಾತನಾಡಿ, "ಟಿವಿಎಫ್ ಮೊದಲಿನಿಂದಲೂ ವೀಕ್ಷಕರ ಮನಮುಟ್ಟುವಂತಹ ನೈಜ ಕಥೆಗಳನ್ನು ಪ್ರಸ್ತುತ ಪಡಿಸುತ್ತಾ ಬಂದಿದೆ. ನಮ್ಮಂತೆಯೇ ಜನರ ಸದಭಿರುಚಿಯನ್ನು ಅರಿತು ಈವರೆಗೂ ಒಂದೊಳ್ಳೆ ಸಂದೇಶ ಹೊಂದಿರುವ ಸಿನೆಮಾಗಳನ್ನೇ ಮಾಡಿಕೊಂಡು ಬಂದಿರುವ ಕೆಆರ್ಜಿ ಸಂಸ್ಥೆಯ ಜೊತೆ ಕೈ ಜೋಡಿಸಲು ಬಹಳ ಉತ್ಸುಕರಾಗಿದ್ದೇವೆ. ಬೇರೆ ರಾಜ್ಯಗಳಿಂದ ಬಂದಿದ್ದರೂ, ಈ ನಮ್ಮ ಸಿನಿ ಪ್ರೇಮ ಹಾಗೂ ಯಾವುದೋ ಒಂದು ಶಕ್ತಿ ನಮ್ಮನ್ನು ಒಂದುಗೂಡಿಸಿದೆ ಎಂದರೆ ತಪ್ಪಾಗಲ್ಲ. ಈ ಸಹಯೋಗದ ಮೂಲಕ ಸಿನಿ ಪ್ರಿಯರಿಗೆ ತಾಜಾ, ಮೂಲ ಕಥೆಗಳನ್ನು ಹೇಳುವ ಭರವಸೆ ನೀಡುತ್ತೇವೆ. ಹಾಗೂ ನಮ್ಮ ವೈವಿಧ್ಯಮಯ ಪ್ರೇಕ್ಷಕರಿಗೆ ಹಿಡಿಸುವಂತೆ ಚಿತ್ರ ತಯಾರಿಸಲಾಗುತ್ತದೆ ಎಂದು ತಿಳಿಸಿದರು.
ಟಿವಿಎಫ್ ಸಂಸ್ಥೆ: ಈ ಸಂಸ್ಥೆಯು ಲಕ್ಷಾಂತರ ಜನರೊಂದಿಗೆ ಸಂಪರ್ಕ ಹೊಂದಿದೆ. ಮನರಂಜನೆಯನ್ನು ಪಡೆಯುವ ಯುವ ಪೀಳಿಗೆಯ ಭಾರತೀಯರಿಗೆ ವಿಷಯವನ್ನು 'ವೈರಲ್' ಸ್ನೇಹಿಯನ್ನಾಗಿ ಮಾಡಿದೆ. ಹಲವು ಮಾಧ್ಯಮಗಳು ಮತ್ತು ಪ್ರೊಡಕ್ಷನ್ ಹೌಸ್ ವರ್ಷಗಳ ನಂತರ ಪ್ರಾರಂಭವಾದಾಗಲೂ, ಟಿವಿಎಫ್ ಭಾರತದಲ್ಲಿ ಗುಣಮಟ್ಟದ ವೆಬ್ ವಿಷಯವನ್ನು ಒದಗಿಸುವ ಅತ್ಯಂತ ಸ್ಥಿರವಾದ ಪ್ರವರ್ತಕರಲ್ಲಿ ಒಂದಾಗಿದೆ. ಅದು ಇಡೀ ಕುಟುಂಬವನ್ನು ಮನರಂಜಿಸುತ್ತದೆ.
ಇದನ್ನೂ ಓದಿ: ಕಮಲ್ ಕೊಂಡಾಡಿದ ಅಮಿತಾಭ್: ನಟ ಹಾಸನ್ ನೆಗೆಟಿವ್ ರೋಲ್ ಒಪ್ಪಿಕೊಳ್ಳಲು ಕಾರಣವೇನು ಗೊತ್ತಾ?
ಕಳೆದ 6 ವರ್ಷಗಳಿಂದ ವಿಭಿನ್ನ ಶೈಲಿಯ ಸಿನಿಮಾಗಳನ್ನು ಮಾಡಿ ಪ್ರೇಕ್ಷಕರ ಮನಸ್ಸನ್ನು ಗೆದ್ದಿರುವ ಕೆ ಆರ್ ಜಿ ಸಂಸ್ಥೆ ಕನ್ನಡ ಚಿತ್ರರಂಗದ ಹೆಮ್ಮೆ. ಕಾರ್ತಿಕ್ ಗೌಡ ಹಾಗೂ ತಮ್ಮ ದೀರ್ಘ ಕಾಲದ ಸ್ನೇಹಿತ ಯೋಗಿ ಜಿ ರಾಜ್ ಇಬ್ಬರೂ ಸೇರಿ ಈ ಸಂಸ್ಥೆ ಹುಟ್ಟುಹಾಕಿ ಕನ್ನಡ ಚಿತ್ರರಂಗದಲ್ಲಿ ಹೊಸ ರೀತಿಯ ಕಂಟೆಂಟ್ಗೆ ನಾಂದಿ ಹಾಡಿದರು. ವರ್ಷದಿಂದ ವರ್ಷಕ್ಕೆ ಹಿಟ್ ಚಿತ್ರಗಳನ್ನು ಪ್ರಸ್ತುತ ಪಡಿಸುವುದಷ್ಟೇ ಅಲ್ಲದೇ ಹೊಸ ಪ್ರತಿಭೆಗಳಿಗೂ ಅವಕಾಶ ಕಲ್ಪಿಸಿದ್ದಾರೆ. ಜೀವನಕ್ಕೆ ಹೊಂದುವಂತಹ ಸಬ್ಜೆಕ್ಟ್ಗಳನ್ನು ತಲೆಯಲ್ಲಿಟ್ಟುಕೊಂಡು, ಕೆಆರ್ಜಿ ಸಂಸ್ಥೆಯು ಹೊಸ ಕಂಟೆಂಟ್ಗಳನ್ನು ಪ್ರೇಕ್ಷಕರಿಗೆ ಪರಿಚಯಿಸುವಲ್ಲಿ ಯಶಸ್ವಿಯಾಗಿದೆ ಎಂದರೆ ತಪ್ಪಾಗಲ್ಲ. ತಮ್ಮ ಸಿನಿಮಾ, ವೆಬ್ ಸಿರೀಸ್, ವಿಡಿಯೋಗಳಿಂದ ಕನ್ನಡಿಗರನ್ನ ಮತ್ತಷ್ಟು ರಂಜಿಸಲಿದೆ.
