ಕನ್ನಡ ಚಿತ್ರರಂಗದಲ್ಲಿ ಸಸ್ಪೆನ್ಸ್ ಹಾರಾರ್ ಕಂಟೆಂಟ್ ಹೊಂದಿರುವ ಚಿತ್ರ ಜೂಲಿಯೆಟ್ 2 ಇನ್ನೇನು ತೆರೆಗೆ ಬರಲಿದೆ. ಅದಕ್ಕೂ ಮುನ್ನ ಚಿತ್ರತಂಡವೊಂದು ಹೊಸ ಅಪ್ಡೇಟ್ ನೀಡಿದೆ. ಪ್ರೇಮಂ ಪೂಜ್ಯಂ ಚಿತ್ರದ ಬೆಡಗಿ ಬೃಂದಾ ಆಚಾರ್ಯ ಅಭಿನಯಿಸಿರುವ ಈ ಚಿತ್ರದ ಮತ್ತೊಂದು ಹಾಡು ಇದೀಗ ರಿಲೀಸ್ ಆಗಿದೆ. ಹೌದು... ಕೆಲ ದಿನಗಳ ಹಿಂದೆಯಷ್ಟೇ ಜ್ಯೂಲಿಯೆಟ್ 2 ಚಿತ್ರದ ಹಾಡೊಂದು ಬಿಡುಗಡೆ ಆಗಿತ್ತು.
ಮಗಳ ಬದುಕಿಗೆ ಬೆಳಕಾಗುವ ತಂದೆಯ ಕುರಿತ ಈ ಹಾಡು ಎಲ್ಲರ ಮೆಚ್ಚುಗೆಯನ್ನು ಗಳಿಸಿತ್ತು. ಇದೀಗ ತಾಯಿಯ ಮಮತೆಯ ಹಾಡೊಂದು ಅನಾವರಣಗೊಂಡಿದೆ. ತನ್ನವರಿಗಾಗಿ ತನ್ನ ಬದುಕನ್ನೇ ಮುಡಿಪಾಗಿಟ್ಟು ಬದುಕುತ್ತಾ ಇರುವ ತಾಯಂದಿರಿಗೆ ಈ ಹಾಡನ್ನು ಚಿತ್ರತಂಡ ಅರ್ಪಿಸಿದೆ. ಕರುಳ ಕರೆಗೆ ಮರುಗುವ ತಾಯಿಯ ಸುತ್ತ ಈ ಹಾಡು ಸುತ್ತುತ್ತದೆ. ಹಾಡಿನ ಪ್ರತಿಯೊಂದು ಸಾಲನ್ನು ಭಾವನಾತ್ಮಕವಾಗಿ ಸುಕ್ರೀತ್ ಶೆಟ್ಟಿ ಹೆಣೆದಿದ್ದಾರೆ.
ಇದಕ್ಕೆ ಧ್ವನಿಯಾಗಿರುವ ರಂಜಿತಾ ಮಲ್ಲೂರು ಅವರ ಚಿನ್ನದ ಕಂಠಕ್ಕೆ ಪ್ರೇಕ್ಷಕರು ಮನಸೋತಿದ್ದಾರೆ. ಬಿಡುಗಡೆಯಾಗಿ ಕೆಲ ಗಂಟೆಗಳಲ್ಲೇ ಒಂದು ಮಿಲಿಯನ್ ಜನ ನೋಡಿ ಅಮ್ಮ ಮಗಳ ಬಾಂಧವ್ಯದ ಹಾಡನ್ನು ಮೆಚ್ಚಿಕೊಂಡಿದ್ದಾರೆ. ಅಂದ ಹಾಗೇ ಜ್ಯೂಲಿಯಟ್ 2 ಸಾಮಾನ್ಯವಾದ ಕಥೆಯಲ್ಲ. ಹೆಣ್ಣು ಅಬಲೆಯಲ್ಲ ಸಬಲೆಯನ್ನುವ ವಿಷಯವನ್ನು ಈ ಚಿತ್ರ ಪ್ರಸ್ತುತಪಡಿಸಲಿದೆ. ಜೊತೆಗೆ ಸಸ್ಪೆನ್ಸ್ ಹಾರರ್ ಕಂಟೆಟ್ ಅನ್ನು ಒಳಗೊಂಡಿರಲಿದೆ. ಚಿತ್ರದ ಹಾಡುಗಳಿಂದಲೇ ಸಿನಿಮಾದ ಬಗ್ಗೆ ಜನರಲ್ಲಿ ಮತ್ತಷ್ಟು ಕುತೂಹಲ ಹೆಚ್ಚಿದೆ.
ಇದನ್ನೂ ಓದಿ: 'ಪಠಾಣ್' 19 ದಿನದಲ್ಲಿ 946 ಕೋಟಿ ಕಲೆಕ್ಷನ್.. ಪಾರ್ಟ್ 2 ಬರಲಿದೆಯಾ?
ಜೂಲಿಯಟ್ 2 ಸಿನಿಮಾ ಕಥೆಯು ಸಂಪೂರ್ಣವಾಗಿ ಬೃಂದಾ ಪಾತ್ರದ ಸುತ್ತ ಸುತ್ತುತ್ತದೆ. ಪಟ್ಟಣದಿಂದ ಹಳ್ಳಿ ಸೇರುವ ನಾಯಕಿಯ ಬದುಕಲ್ಲಿ ನಡೆಯುವ ಘಟನೆ, ಶಾಂತರೂಪಿಯಾಗಿರುವ ನಾಯಕಿ ಹೇಗೆ ರಣಚಂಡಿ ಆಗ್ತಾಳೆ ಎಂಬ ಕುತೂಹಲಕಾರಿ ಕಥೆ ಇದಾಗಿದೆ. ಈಗಾಗಲೇ ಟೀಸರ್ನಿಂದಲೇ ನಿರೀಕ್ಷೆ ಹೆಚ್ಚಿಸಿರುವ ಜೂಲಿಯಟ್ 2 ಸಿನಿಮಾದ ಪ್ರತಿ ಫ್ರೇಮ್ ಕೂಡ ನಿಮ್ಮನ್ನು ಹಿಡಿದಿಡಲಿದೆ. ಅಷ್ಟೇ ಅಲ್ಲದೇ ಚಿತ್ರ ಪ್ಯಾನ್ ಇಂಡಿಯಾ ರೀತಿಯಲ್ಲಿ ಪಂಚ ಭಾಷೆಯಲ್ಲಿಯೂ ಬಿಡುಗಡೆ ಆಗಲಿದೆ. ಸಿನಿಮಾ ಚಿತ್ರೀಕರಣವನ್ನು ಮಂಗಳೂರು, ಬೆಳ್ತಂಗಡಿ ಮತ್ತು ಅದರ ಸುತ್ತಲಿನ ಅರಣ್ಯ ಪ್ರದೇಶಗಳಲ್ಲಿ ಮಾಡಲಾಗಿದೆ.
ಚಿತ್ರತಂಡ ಹೀಗಿದೆ.. ಜ್ಯೂಲಿಯಟ್ 2 ಸಿನಿಮಾದಲ್ಲಿ ಹೊಸ ಪ್ರತಿಭೆಗಳು ಹೆಚ್ಚಾಗಿ ಕಾಣಿಸಿಕೊಂಡಿದ್ದಾರೆ. ಬೃಂದಾ ಆಚಾರ್ಯ ಈ ಚಿತ್ರದ ಲೀಡ್ ಹೀರೋಯಿನ್ ಆಗಿ ಮಿಂಚಿದ್ದಾರೆ. ಜೊತೆಗೆ ಅನೂಪ್ ಸಾಗರ್, ರವಿ ಕಾಲ ಬ್ರಹ್ಮ, ಶ್ರೀಕಾಂತ್, ರಾಯ್ ಬಡಿಗೇರ್, ಖುಷ್ ಆಚಾರ್ಯ, ರಾಧೇಶ್ ಶೆಣೈ ಹೀಗೆ ಸಾಕಷ್ಟು ಪ್ರತಿಭಾವಂತ ಕಲಾವಿದರು ಸಿನಿಮಾದಲ್ಲಿ ಅಭಿನಯಿಸಿದ್ದಾರೆ. ಈ ಚಿತ್ರವನ್ನು ವಿರಾಟ್ ಬಿ ಗೌಡ ನಿರ್ದೇಶಿಸಿದ್ದು, ಲಿಖಿತ್ ಆರ್ ಕೋಟ್ಯಾನ್ ನಿರ್ಮಾಣ ಮಾಡಿದ್ದಾರೆ. ಸಚಿನ್ ಬಸ್ರೂರ್ ಅವರ ಬಿಜಿಎಂ, ಶ್ಯಾಂಟೋ ವಿ ಆಂಟೋ ಅವರ ಕ್ಯಾಮರಾ ವರ್ಕ್ ಮತ್ತು ದಿನೇಶ್ ಆಚಾರ್ಯ ಅವರ ವಿಎಫೆಕ್ಸ್ ಚಿತ್ರವನ್ನು ಮತ್ತಷ್ಟು ಸುಂದರಗೊಳಿಸಿದೆ. ಸಿನಿಮಾವು ಫೆಬ್ರವರಿ 24 ರಂದು ತೆರೆ ಮೇಲೆ ಬರಲಿದೆ.
ಇದನ್ನೂ ಓದಿ: ವಿನೋದ್ ಪ್ರಭಾಕರ್ ಲಂಕಾಸುರನಿಗೆ ಸಿಕ್ತು ಕನಸಿನ ರಾಣಿಯ ಸಪೋರ್ಟ್
