ಬಹುಭಾಷಾ ನಟಿ ತಾಪ್ಸಿ ಪನ್ನು ನಿರ್ಮಾಣದ ಧಕ್ ಧಕ್ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಅಕ್ಟೋಬರ್ 13ರಂದು ಥಿಯೇಟರ್ಗಳಲ್ಲಿ ಧಕ್ ಧಕ್ ತೆರೆಕಾಣಲಿದೆ. ಈ ಸಿನಿಮಾ ನಾಲ್ವರು ಧೈರ್ಯಶಾಲಿ ಮಹಿಳೆಯರ ಜೀವನದ ಸುತ್ತ ಸುತ್ತುತ್ತದೆ. ಖರ್ದುಂಗ್ ಲಾ ಪ್ರದೇಶದಲ್ಲಿ ಬೈಕ್ ರೈಡ್ ಮಾಡುವ ವೇಳೆ ಪರಿಚಯವಾಗುವ ನಾಲ್ವರು ಮಹಿಳೆಯರ ಜೀವನದಲ್ಲಾಗುವ ಬದಲಾವಣೆಗಳ ಮೇಲೆ ಕಥೆ ಕೇಂದ್ರಿತವಾಗಿದೆ. ವಯಾಕಾಮ್ 18 ಸ್ಟುಡಿಯೋಸ್ ಮತ್ತು ಬಿಎಲ್‌ಎಂ ಪಿಕ್ಚರ್ಸ್ ಸಹಯೋಗದಲ್ಲಿ ನಟಿ ತಾಪ್ಸಿ ಪನ್ನು ಅವರ ಔಟ್‌ಸೈಡರ್ಸ್ ಫಿಲ್ಮ್ಸ್ ಸಂಸ್ಥೆ ಈ ಚಿತ್ರವನ್ನು ನಿರ್ಮಾಣ ಮಾಡಿದೆ.
ರತ್ನ ಪಾಠಕ್ ಶಾ, ದಿಯಾ ಮಿರ್ಜಾ, ಫಾತಿಮಾ ಸನಾ ಶೇಖ್ ಮತ್ತು ಸಂಜನಾ ಸಂಘಿ ಅವರಂತಹ ಪ್ರತಿಭಾನ್ವಿತ ಕಲಾವಿದರನ್ನು ಧಕ್ ಧಕ್ ಚಿತ್ರ ಒಳಗೊಂಡಿದೆ. ವಿಶ್ವದ ಅತಿ ಎತ್ತರದ ಪ್ರದೇಶವಾಗಿರುವ ಖರ್ದುಂಗ್ ಲಾ ಹೋಗುವ ಧೈರ್ಯಶಾಲಿ ಬೈಕ್ ಪ್ರಯಾಣಿಕರ ಕಥೆಯನ್ನು ಹೊಂದಿದೆ. ಚಲನಚಿತ್ರದ ಕಥಾವಸ್ತುವು ವೀಕ್ಷಕರನ್ನು ತಲುಪಲಿದೆ ಎಂದು ಚಿತ್ರತಂಡ ವಿಶ್ವಾಸ ವ್ಯಕ್ತಪಡಿಸಿದೆ. ಏಕೆಂದರೆ ಈ ಧಕ್ ಧಕ್ ಸಿನಿಮಾ ನಾಲ್ವರು ಮಹಿಳಾ ನಾಯಕಿಯರ ಶಕ್ತಿಯನ್ನು ಪ್ರದರ್ಶಿಸುತ್ತದೆ.
ಧಕ್ ಧಕ್ ಸಿನಿಮಾ ಮೂಲಕ ತರುಣ್ ದುಡೇಜಾ (Tarun Dudeja) ಅವರು ನಿರ್ದೇಶಕರಾಗುತ್ತಿದ್ದಾರೆ. ಇವರು ಆ್ಯಕ್ಷನ್ ಕಟ್ ಹೇಳಿರುವ ಚೊಚ್ಚಲ ಚಿತ್ರವಿದು. ಪಾರಜಾತ್ ಜೋಶಿ (Parijat Joshi) ಹಾಗೂ ತರುಣ್ ದುಡೇಜಾ ಸೇರಿ ಸ್ಕ್ರಿಪ್ಟ್ ರೆಡಿ ಮಾಡಿದ್ದರು. ಬಿಡುಗಡೆಗೆ ಸಜ್ಜಾಗಿರುವ ಸಿನಿಮಾವನ್ನು ವಿಭಿನ್ನವಾಗಿ ಪ್ರಮೋಟ್ ಮಾಡಲಾಗುತ್ತಿದೆ. ನಾಳೆ ಚಿತ್ರತಂಡದಿಂದ ಬಿಡುಗಡೆ ದಿನಾಂಕದ ಬಗ್ಗೆ ಅಧಿಕೃತ ಘೋಷಣೆ ಆಗಲಿದೆ. ಅಕ್ಟೋಬರ್ 3 ರಂದು ಟ್ರೇಲರ್ ಅನಾವರಣಗೊಳ್ಳಲಿದೆ.
ಇದನ್ನೂ ಓದಿ: ರಶ್ಮಿಕಾ ರಣ್ಬೀರ್ ಜೋಡಿಯ ಅನಿಮಲ್ ಸಿನಿಮಾದಲ್ಲಿ ಬಾಬಿ ಡಿಯೋಲ್ ವಿಲನ್: ಫಸ್ಟ್ ಲುಕ್ ರಿಲೀಸ್
ನಟಿ ತಾಪ್ಸಿ ಪನ್ನು ಸಿನಿಮಾವನ್ನು ನಿರ್ಮಾಣ ಮಾಡಿದ್ದು ಮಾತ್ರವಲ್ಲದೇ, ಈ ಯೋಜನೆಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ತಾಪ್ಸಿ ಪನ್ನು ಅವರಿಗೆ ಚಲನಚಿತ್ರ ನಿರ್ಮಾಣ ಕ್ಷೇತ್ರ ಹೊಸದೇನಲ್ಲ. ಅಜಯ್ ಬಹ್ಲ್ (Ajay Bahl) ನಿರ್ದೇಶಿಸಿದ್ದ ಥ್ರಿಲ್ಲರ್ ಸಿನಿಮಾ ಬ್ಲರ್ (Blurr) ಅನ್ನು ನಿರ್ಮಾಣ ಮಾಡಿದ್ದು, ಕಳೆದ ವರ್ಷ ತೆರೆಕಂಡಿತ್ತು. ಬ್ಲರ್ ಯಶಸ್ಸಿನ ನಂತರ 'ಧಕ್ ಧಕ್' ನಟಿ ನಿರ್ಮಾಣ ಮಾಡುತ್ತಿರುವ ಎರಡನೇ ಸಿನಿಮಾ.
ಇದನ್ನೂ ಓದಿ: ಆಲಿಯಾ ಭಟ್ ಮುಂದಿನ ಸಿನಿಮಾ 'ಜಿಗ್ರಾ': ನಟನೆ ಜೊತೆ ನಿರ್ಮಾಣ - ಬಿಡುಗಡೆ ದಿನಾಂಕವೂ ಅನೌನ್ಸ್
ಇನ್ನೂ ನಟಿ ತಾಪ್ಸಿ ಪನ್ನು ನಟನೆಯ ಸಿನಿಮಾಗಳು ಬಿಡುಗಡೆಗೆ ಸಜ್ಜಾಗುತ್ತಿದೆ. ರಾಜ್‌ಕುಮಾರ್ ಹಿರಾನಿ ನಿರ್ದೇಶನದ ಡಂಕಿ ಸಿನಿಮಾ ಇದೇ ವರ್ಷ ತೆರೆಕಾಣಲಿದೆ. ಶಾರುಖ್ ಖಾನ್ ಜೊತೆ ತೆರೆಹಂಚಿಕೊಂಡಿದ್ದಾರೆ. ಆನಂದ್ ಎಲ್ ರೈ ಅವರ 'ಫಿರ್ ಆಯಿ ಹಸೀನ್ ದಿಲ್ರುಬಾ' ಸಿನಿಮಾದಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ. ಸಿದ್ಧಾರ್ಥ್ ರಾಯ್ ಕಪೂರ್ ಅವರ 'ವೋ ಲಡ್ಕಿ ಹೈ ಕಹಾನ್'ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ, ಚಿತ್ರದಲ್ಲಿ ಪ್ರತೀಕ್ ಗಾಂಧಿ ಅವರೊಂದಿಗೆ ಸ್ಕ್ರೀನ್ ಶೇರ್ ಮಾಡಲಿದ್ದಾರೆ. ಇದಲ್ಲದೇ ಕಾಮಿಡಿ ಎಂಟರ್ಟೈನ್ಮೆಂಟ್ ಸಿನಿಮಾ 'ಖೇಲ್ ಖೇಲ್ ಮೈ' ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಜೊತೆ ನಟಿಸಲು ತಾಪ್ಸಿ ಸಜ್ಜಾಗುತ್ತಿದ್ದಾರೆ. ಈ ಚಿತ್ರ ಮುಂದಿನ ತಿಂಗಳು ಲಂಡನ್ನಲ್ಲಿ ಶೂಟಿಂಗ್ ಪ್ರಾರಂಭಿಸಲಿದೆ.
