ಈಗಾಗಲೇ ರಾಜಮೌಳಿ ನಿರ್ದೇಶನದ 'ಆರ್ಆರ್ಆರ್' ಚಿತ್ರದ ನಾಟು ನಾಟು ಹಾಡು ಆಸ್ಕರ್ ಅಂಗಳ ತಲುಪಿದ್ದು, ಭಾರತೀಯರ ಹರ್ಷ ಮುಗಿಲುಮುಟ್ಟಿದೆ. ಈ ಸಂಭ್ರಮವನ್ನು ಇದೀಗ ಬಾಲಿವುಡ್ ಬೆಡಗಿ ದೀಪಿಕಾ ಪಡುಕೋಣೆ ದುಪ್ಪಟ್ಟು ಮಾಡಿದ್ದಾರೆ. ಈ ಬಾರಿ ಸಿನಿಮಾ ರಂಗದ ಪ್ರತಿಷ್ಟಿತ ಅವಾರ್ಡ್ ಕಾರ್ಯಕ್ರಮದಲ್ಲಿ ಬೆಂಗಳೂರಿನ ಬೆಡಗಿ ಕೂಡಾ ಮಿಂಚು ಹರಿಸಲಿದ್ದಾರೆ.!
ಇತ್ತೀಚೆಗಷ್ಟೇ ಬಿಡುಗಡೆಯಾದ ಪಠಾಣ್ ಯಶಸ್ಸಿನಲ್ಲಿರುವ ದೀಪಿಕಾ ಇದೀಗ 95ನೇ ಆಸ್ಕರ್ ಪ್ರಶಸ್ತಿ ಸಮಾರಂಭದಲ್ಲಿ ಸೆಲೆಬ್ರಿಟಿಗಳ ನಿರೂಪಣೆಯಲ್ಲಿ ಸ್ಥಾನ ಪಡೆದಿದ್ದಾರೆ. ಈ ಸಂಬಂಧ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದ್ದಾರೆ. ಆಸ್ಕರ್ ಅಂಗಳದಲ್ಲಿ ನಿರೂಪಣೆ ಮಾಡುವವರ ಪಟ್ಟಿಯನ್ನು ನಟಿ ಹಂಚಿಕೊಂಡಿದ್ದಾರೆ. ಇದರಲ್ಲಿ ಹಾಲಿವುಡ್ ನಟ-ನಟಿಯರ ಜೊತೆ ನಟಿ ದೀಪಿಕಾ ಹೆಸರು ಕೂಡ ಪ್ರಕಟವಾಗಿದೆ. ಅಮೆರಿಕ ಕಾಲಮಾನದ ಅನುಸಾರ ಮಾರ್ಚ್ 12 ರಂದು ಲಾಸ್ ಏಂಜಲೀಸ್‌ನ ಡಾಲ್ಬಿ ಥಿಯೇಟರ್ನಲ್ಲಿ ದೀಪಿಕಾ ಇದೇ ಮೊದಲ ಬಾರಿಗೆ ಆಸ್ಕರ್ ಅಂಗಳದಲ್ಲಿ ನಿರೂಪಣೆ ಮಾಡುತ್ತಿದ್ದಾರೆ. ಕೇವಲ ಹಾಲಿವುಡ್ ಹಾಗು ವಿಶ್ವದ ಪ್ರಮುಖ ಸಿನಿಮಾ ನಟರಿಗೆ ಸೀಮಿತವಾಗಿರುವ ವೇದಿಕೆಯಲ್ಲಿ ದೀಪಿಕಾ ಸ್ಥಾನ ಪಡೆದಿದ್ದಾರೆ.
ದೀಪಿಕಾ ಪಡುಕೋಣೆ ಈ ಕುರಿತು ಮಾಹಿತಿ ಹಂಚಿಕೊಳ್ಳುತ್ತಿದ್ದಂತೆ ಅಭಿಮಾನಿಗಳು ಮತ್ತು ಅವರ ಸಹ ನಟ-ನಟಿಯರು ಸಂತಸ ವ್ಯಕ್ತಪಡಿಸಿದ್ದಾರೆ. ಬಾಲಿವುಡ್ ನಟಿ ನೇಹಾ ದೂಪಿಯಾ ಪ್ರತಿಕ್ರಿಯಿಸಿ, ದೀಪಿಕಾ ಅವರನ್ನು ನೋಡಲು ಕಾತುರರಾಗಿರುವುದಾಗಿ ಹೇಳಿದ್ದಾರೆ. ಅಭಿಮಾನಿಗಳು ಈ ಬಗ್ಗೆ ಪ್ರತಿಕ್ರಿಯಿಸಿ, ಪಠಾಣ್ ಬೆಡಗಿ ಆಸ್ಕರ್ನಲ್ಲಿ! ನಮ್ಮ ದೀಪಿಕಾ ಸಮಯವಿದು ಎಂದಿದ್ದಾರೆ. ಕತಾರ್‌ನಲ್ಲಿ ಫಿಫಾ ವಿಶ್ವಕಪ್ನಲ್ಲೂ ಕೂಡ ದೀಪಿಕಾ ಟ್ರೋಫಿಯನ್ನು ಅನಾವರಣಗೊಳಿಸಿದ್ದರು. ಕಳೆದ ವರ್ಷ ಕೇನ್ಸ್‌ನಲ್ಲಿ ತೀರ್ಪುಗಾರರ ಸದಸ್ಯರಲ್ಲಿ ಒಬ್ಬರಾಗಿದ್ದರು. ಇದೀಗ ಆಸ್ಕರ್ನಲ್ಲೂ ತಮ್ಮ ಮಿಂಚು ಹರಿಸಲಿದ್ದಾರೆ.
ನಾಟು ನಾಟು ಪ್ರದರ್ಶನ: ವಿಶ್ವದ ಎಲ್ಲಾ ಭಾಷೆಗಳ ಚಿತ್ರಗಳನ್ನು ಪ್ರದರ್ಶಿಸುವ ಸಿನಿಮಾ ಕ್ಷೇತ್ರದ ಅತಿ ದೊಡ್ಡ ವೇದಿಕೆಯಾಗಿರುವ ಆಸ್ಕರ್ನಲ್ಲಿ ಈ ಬಾರಿ ಆರ್ಆರ್ಆರ್ ಸಿನಿಮಾದ ನಾಟು ನಾಟು ಹಾಡು ಲೈವ್ ಪ್ರದರ್ಶನಗೊಳ್ಳುತ್ತಿದೆ. ಈ ಹಾಡಿನ ಗಾಯಕರಾದ ಕಾಲಭೈರವ ಮತ್ತು ರಾಹುಲ್ ಸಿಪ್ಲಿಗಂಜ್ ಆಸ್ಕರ್ ವೇದಿಕೆ ಮೇಲೆ ಪ್ರದರ್ಶನ ತೋರುವ ಮೂಲಕ ಜಗತ್ತಿನ ಕಣ್ಸೆಳೆಯಲಿದ್ದಾರೆ.
ನಾಟು ನಾಟುಗೆ ಒಲಿದ ಪ್ರಶಸ್ತಿ: ಅತ್ಯುತ್ತಮ ಮೂಲ ಗೀತೆ ವಿಭಾಗದಲ್ಲಿ 'ಗೋಲ್ಡನ್ ಗ್ಲೋಬ್ಸ್ ಪ್ರಶಸ್ತಿ'ಪಡೆದಿದೆ. ಕ್ರಿಟಿಕ್ಸ್ ಚಾಯ್ಸ್ ಅವಾರ್ಡ್ಸ್ನಲ್ಲಿಯೂ ಎರಡು ಪ್ರಶಸ್ತಿ ಮುಡಿಗೇರಿಸಿಕೊಂಡಿದೆ. ಇತ್ತೀಚೆಗಷ್ಟೇ ಅಮೆರಿಕದಲ್ಲಿ ನಡೆದ ಹಾಲಿವುಡ್ ಕ್ರಿಟಿಕ್ಸ್ ಅಸೋಸಿಯೇಷನ್ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಆರ್ಆರ್ಆರ್ 'ಅತ್ಯುತ್ತಮ ಅಂತಾರಾಷ್ಟ್ರೀಯ ಚಲನಚಿತ್ರ', 'ಅತ್ಯುತ್ತಮ ಆಕ್ಷನ್ ಚಿತ್ರ, 'ಅತ್ಯುತ್ತಮ ಹಾಡು', 'ಅತ್ಯುತ್ತಮ ಸ್ಟಂಟ್' ವಿಭಾಗಗಳಲ್ಲಿ ಪ್ರಶಸ್ತಿ ಪಡೆದುಕೊಂಡಿದೆ. ಒಟ್ಟಿನಲ್ಲಿ ಭಾರತೀಯ ಚಿತ್ರವೊಂದು ಆಸ್ಕರ್ ರೇಸ್‌ನಲ್ಲಿರುವುದು ಒಂದು ಖುಷಿಯ ಸುದ್ದಿಯಾದರೆ, ಪ್ರಶಸ್ತಿ ಪ್ರದಾನ ಸಮಾರಂಭದ ಮೇಲೆ ಕೋಟಿಗಟ್ಟಲೆ ಭಾರತೀಯರ ಕಣ್ಣುಗಳು ನೆಟ್ಟಿವೆ.
ಇದನ್ನೂ ಓದಿ: ಶಾರುಖ್ ಖಾನ್ ಐಷಾರಾಮಿ 'ಮನ್ನತ್' ಬಂಗಲೆಗೆ ನುಗ್ಗಿದ ಇಬ್ಬರು ಪೊಲೀಸ್ ವಶಕ್ಕೆ
