'ಆರ್ಆರ್ಆರ್' ಸಿನಿಮಾವು ಹಾಲಿವುಡ್ ಕ್ರಿಟಿಕ್ಸ್ ಅಸೋಸಿಯೇಶನ್ ಫಿಲ್ಮ್ ಅವಾರ್ಡ್ಸ್ನಲ್ಲಿ ನಾಲ್ಕು ಪ್ರಶಸ್ತಿಗಳನ್ನು ಗೆದ್ದುಕೊಂಡಿದೆ. ಚಿತ್ರತಂಡದ ಪರವಾಗಿ ನಿರ್ದೇಶಕ ಎಸ್.ಎಸ್.ರಾಜಮೌಳಿ ಪ್ರಶಸ್ತಿ ಸ್ವೀಕರಿಸಿದ್ದು, ಬಳಿಕ 11 ವರ್ಷದ ಹಾಲಿವುಡ್ ನಟಿ ವೈಲೆಟ್ ಮೆಕ್ಗ್ರಾಳೊಂದಿಗೆ ಸೆಲ್ಫಿಗೆ ಫೋಸ್ ಕೊಟ್ಟರು. ಈ ಕ್ಯೂಟ್‌ ಫೋಟೋವನ್ನು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿರುವ ನಿರ್ದೇಶಕ, ಮಿಲಿಯನ್ ಡಾಲರ್ ಸ್ಮೈಲ್ನಲ್ಲಿ ಮಿಂಚಿದ್ದಾರೆ.
"ಪ್ರತಿಭಾವಂತ ನಟಿ 11 ವರ್ಷದ @violetmcgraw ವೇದಿಕೆಯಲ್ಲಿ ನನಗೆ ಪ್ರಶಸ್ತಿ ನೀಡಿದಾಗ ಬಹಳಷ್ಟು ಸಂತೋಷವಾಯಿತು. ಬಳಿಕ ಅವಳೇ ನನ್ನಲ್ಲಿ ಸೆಲ್ಫಿ ಕೇಳಿದಾಗ ಇನ್ನಷ್ಟು ಖುಷಿ ಇಮ್ಮಡಿಯಾಯಿತು" ಎಂದು ಬರೆದುಕೊಂಡಿದ್ದಾರೆ. ಚಿತ್ರದಲ್ಲಿ ರಾಜಮೌಳಿ ಬೂದು ಬಣ್ಣದ ಕುರ್ತಾ ಧರಿಸಿ ನಗುಮುಖದೊಂದಿಗೆ ಪೋಸ್ ನೀಡಿದ್ದು, ವೈಲೆಟ್ ಮೆಕ್ಗ್ರಾ ಹಳದಿ ಬಣ್ಣದ ಡ್ರೆಸ್ ಧರಿಸಿ ಕಂಗೊಳಿಸುತ್ತಿದ್ದರು.
'ಆರ್ಆರ್ಆರ್'ಗೆ ಸಂದ 4 ಅತ್ಯುನ್ನತ ಪ್ರಶಸ್ತಿಗಳು: ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಧೂಳೆಬ್ಬಿಸಿರುವ ಆರ್ಆರ್ಆರ್ ಸಿನಿಮಾ ಸಾಕಷ್ಟು ಪ್ರಶಸ್ತಿ ಪುರಸ್ಕಾರಗಳನ್ನು ಗಿಟ್ಟಿಸಿಕೊಂಡಿದೆ. ಹೊಸ ಹೊಸ ದಾಖಲೆ ಬರೆಯುತ್ತಿರುವ ರಾಜಮೌಳಿ ಸಿನಿಮಾಗೆ ಒಂದೇ ವೇದಿಕೆಯಲ್ಲಿ ನಾಲ್ಕು ಪ್ರಶಸ್ತಿಗಳು ಲಭಿಸಿವೆ. ಶನಿವಾರ ನಡೆದ ಹಾಲಿವುಡ್ ಕ್ರಿಟಿಕ್ಸ್ ಫಿಲ್ಮ್ ಅವಾರ್ಡ್ನಲ್ಲಿ 'ಅತ್ಯುತ್ತಮ ಅಂತಾರಾಷ್ಟ್ರೀಯ ಚಲನಚಿತ್ರ', 'ಅತ್ಯುತ್ತಮ ಆ್ಯಕ್ಷನ್ ಚಿತ್ರ', 'ಅತ್ಯುತ್ತಮ ಹಾಡು' ಮತ್ತು 'ಅತ್ಯುತ್ತಮ ಸ್ಟಂಟ್' ವಿಭಾಗಗಳಲ್ಲಿ ಪ್ರಶಸ್ತಿ ಗೆದ್ದುಕೊಂಡಿತು.
ಇದನ್ನೂ ಓದಿ: ದಾದಾಸಾಹೇಬ್ ಫಾಲ್ಕೆ ಚಲನಚಿತ್ರೋತ್ಸವ ಪ್ರಶಸ್ತಿ: ರಣಬೀರ್, ಆಲಿಯಾ ದಂಪತಿಗೆ ಅತ್ಯುತ್ತಮ ನಟ, ನಟಿ ಪ್ರಶಸ್ತಿ
ತೆಲುಗು ಸೂಪರ್ಸ್ಟಾರ್ಗಳಾದ ರಾಮ್ಚರಣ್ ಮತ್ತು ಜೂನಿಯರ್ ಎನ್ಟಿಆರ್ ಸೇರಿದಂತೆ ಆಲಿಯಾ ಭಟ್, ಅಜಯ್ ದೇವಗನ್ ಮತ್ತು ಶ್ರೀಯಾ ಶರಣ್ ಒಳಗೊಂಡ ಆರ್ಆರ್ಆರ್ ಸಿನಿಮಾ ಭಾರತೀಯ ಚಿತ್ರರಂಗದ ಕೀರ್ತಿಯನ್ನು ಮುಗಿಲೆತ್ತರಕ್ಕೇರಿಸಿದೆ. ಈ ಸಿನಿಮಾವು ವಿಶ್ವದಾದ್ಯಂತ 1,200 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್ ಮಾಡಿದೆ. ಜೊತೆಗೆ ಈಗಾಗಲೇ ಚಿತ್ರದ 'ನಾಟು ನಾಟು' ಹಾಡು ವಿಶೇಷ ಮಾನ್ಯತೆ ಪಡೆದಿದೆ. ಇಷ್ಟೆಲ್ಲ ಗೆಲುವು ಕಂಡಿರುವ ಸಿನಿಮಾ ಆಸ್ಕರ್ ಪ್ರಶಸ್ತಿಯ ಮೇಲೆ ಹೆಚ್ಚಿನ ನಿರೀಕ್ಷೆ ಇಟ್ಟುಕೊಂಡಿದೆ.
'ಆರ್ಆರ್ಆರ್' ಸಿನಿಮಾದ 'ನಾಟು ನಾಟು' ಹಾಡು ಆಸ್ಕರ್ ಮೂಲ ಹಾಡು ವಿಭಾಗದಲ್ಲಿ ನಾಮ ನಿರ್ದೇಶನಗೊಂಡಿದೆ. ಈ ಒಂದು ಹಾಡನ್ನು ರಚಿಸಲು ಚಂದ್ರಬೋಸ್ ಅವರು 1 ವರ್ಷ 7 ತಿಂಗಳು ವ್ಯಯಿಸಿದ್ದಾರೆ. ಅವರ ಶ್ರಮ ಮತ್ತು ತಾಳ್ಮೆಗೆ ಶೇ.75 ರಷ್ಟು ಪ್ರತಿಫಲ ಈಗಾಗಲೇ ಸಿಕ್ಕಿದೆ. ಈ ವರ್ಷದ ಜನವರಿಯಲ್ಲಿ 'ನಾಟು ನಾಟು' 'ಅತ್ಯುತ್ತಮ ಮೂಲ ಹಾಡು' ವಿಭಾಗದಲ್ಲಿ 'ಗೋಲ್ಡನ್ ಗ್ಲೋಬ್ ಪ್ರಶಸ್ತಿ'ಯನ್ನು ಗೆದ್ದುಕೊಂಡಿತು. ಬಳಿಕ 28ನೇ 'ಕ್ರಿಟಿಕ್ಸ್ ಚಾಯ್ಸ್ ಅವಾರ್ಡ್ಸ್'ನಲ್ಲಿ 'ಅತ್ಯುತ್ತಮ ಮೂಲ ಹಾಡು' ಮತ್ತು 'ಅತ್ಯುತ್ತಮ ವಿದೇಶಿ ಭಾಷಾ ಚಲನಚಿತ್ರ' ಎಂಬ ಎರಡು ಪ್ರಶಸ್ತಿಗಳನ್ನು ಪಡೆದುಕೊಂಡಿದೆ.
ಇದನ್ನೂ ಓದಿ: 'ಗಂಗೂಬಾಯಿ ಕಥಿಯಾವಾಡಿ'ಗೆ ಒಂದು ವರ್ಷ: ಬನ್ಸಾಲಿಯೊಂದಿಗಿನ ಫೋಟೋ ಹಂಚಿಕೊಂಡ ಆಲಿಯಾ
