ಯುವ ರಾಜ್​ಕುಮಾರ್ ಚೊಚ್ಚಲ ಸಿನಿಮಾಗೆ ಸಿಕ್ಕಳು ಕನ್ನಡತಿ

ಯುವ ರಾಜ್​ಕುಮಾರ್ ಚೊಚ್ಚಲ ಸಿನಿಮಾಗೆ ನಾಯಕಿ ಆಯ್ಕೆ ಆಗಿದ್ದು, ಅಧಿಕೃತ ಮಾಹಿತಿ ಚಿತ್ರತಂಡದಿಂದ ಹೊರಬರಬೇಕಿದೆ.

ದೊಡ್ಮನೆ ಕುಡಿ ಯುವ ರಾಜ್​ಕುಮಾರ್ ಚೊಚ್ಚಲ ಸಿನಿಮಾ ಅಪ್​ಡೇಟ್ಸ್​​ಗೆ ಅಭಿಮಾನಿಗಳು ಕಾಯುತ್ತಿದ್ದಾರೆ. ಈಗಾಗಲೇ ಪ್ರೀ ಪ್ರೊಡಕ್ಷನ್ ಕೆಲಸ ಮುಗಿದಿರೋ ಈ ಚಿತ್ರಕ್ಕೆ ನಾಯಕಿಯ ಆಯ್ಕೆ ಪೂರ್ಣಗೊಂಡಿದೆ. ಸಂತಸದ ವಿಷಯ ಅಂದ್ರೆ ಸಂತೋಷ್ ಆನಂದ್ ರಾಮ್ ನುಡಿದಂತೆ ಕನ್ನಡತಿಯನ್ನೇ ಯುವ ರಾಜ್​ಕುಮಾರ್​ ಚೊಚ್ಚಲ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆ ಮಾಡಿದ್ದಾರೆ.

ಯುವ ರಾಜ್​​ಕುಮಾರ್ ಅವರ ಸ್ಯಾಂಡಲ್​​ವುಡ್ ಎಂಟ್ರಿಗೆ ಭರ್ಜರಿ ತಯಾರಿ ನಡೆಯುತ್ತಿದೆ. ದೇಹ ದಂಡಿಸಿ ಪಾತ್ರಕ್ಕೆ ಹೊಂದುವಂತೆ ಯುವ ರಾಜ್​ಕುಮಾರ್​ ರೆಡಿಯಾಗ್ತಿದ್ರೆ, ಇತ್ತ ಯುವನಿಗೆ ಹೊಂದಿಕೆ ಆಗುವ ನಾಯಕಿಯ ಹುಡುಕಾಟದಲ್ಲಿ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಬ್ಯುಸಿಯಾಗಿದ್ರು. ಕನ್ನಡದ ಸ್ಟಾರ್​ ಕಿಡ್ಸ್​​ ಈ ಚಿತ್ರಕ್ಕೆ ನಾಯಕಿಯಾಗಿ ಎಂಟ್ರಿ ಕೊಡ್ತಾರೆ ಅಂತಾ ಹೇಳಲಾಗಿತ್ತು. ಅದ್ರೆ ಅವರು ಯಾರೂ ಕೂಡ ಈ ಚಿತ್ರದ ಪಾತ್ರಕ್ಕೆ ಹೊಂದುವುದಿಲ್ಲ ಅನ್ನೋ ಕಾರಣಕ್ಕೆ ಚಿತ್ರತಂಡ ಸೈಲೆಂಟ್ ಆಗಿತ್ತು.

ಪುನೀತ್​ ಅವರೊಂದಿಗೆ ಯುವ ರಾಜ್​ಕುಮಾರ್

ಅಲ್ಲದೇ ಯುವನಿಗಾಗಿ ಮಲಯಾಳಂನ ಬೆಡಗಿ ಕಲ್ಯಾಣಿ ಪ್ರಿಯದರ್ಶಿನಿಯವರನ್ನು ಚಿತ್ರತಂಡ ಫೈನಲ್ ಮಾಡಿಕೊಂಡಿತ್ತು. ಅದರೆ ಕಲ್ಯಾಣಿ ಪ್ರಿಯದರ್ಶಿನಿ ತಮ್ಮ ಸಿನಿಮಾಗಳಲ್ಲಿ ಬ್ಯುಸಿಯಿದ್ದ ಕಾರಣ ಚಿತ್ರಕ್ಕೆ ಅವರ ಹೆಸರನ್ನು ಕೈ ಬಿಟ್ಟ ಸಂತೋಷ್ ಆನಂದ್ ರಾಮ್ ಕನ್ನಡದ ನಟಿಯನ್ನೇ ತಮ್ಮ ಚಿತ್ರಕ್ಕೆ ನಾಯಕಿಯಾಗಿ ಫೈನಲ್ ಮಾಡಿದ್ದಾರೆ.

ಹೌದು, ಅಣ್ಣಾವ್ರ ಮೊಮ್ಮಗನ ಮೊದಲ ಸಿನಿಮಾಗೆ ಕನ್ನಡದ ನಟಿಯನ್ನೇ ಕರೆತರಲು ಹೊಂಬಾಳೆ ಫಿಲ್ಮ್ ಸಂಸ್ಥೆ ಪಣ ತೊಟ್ಟಿತ್ತು. ಮಾಲಾಶ್ರೀ ಮಗಳು, ಸುಧಾರಾಣಿ ಪುತ್ರಿ‌, ಉಪ್ಪಿ ಮಗಳು ಹೀಗೆ ಕೆಲವರನ್ನು ಚಿತ್ರಕ್ಕೆ ಕರೆತರುವ ಯೋಚನೆ ನಡೆದಿತ್ತು. ಆದ್ರೀಗ ಹೊಂಬಾಳೆ ಬಳಗಕ್ಕೆ ಸ್ಯಾಂಡಲ್​​ವುಡ್​ನಲ್ಲಿ ಭರವಸೆ ಮೂಡಿಸಿರೋ ರುಕ್ಮಿಣಿ ವಸಂತ್ ಕಂಡಿದ್ದಾರೆ. ಚಿತ್ರದ ಪಾತ್ರಕ್ಕೆ ರುಕ್ಮಿಣಿ ಹೊಂದುವ ಕಾರಣ ಅವರನ್ನೇ ಚಿತ್ರಕ್ಕೆ ನಾಯಕಿಯಾಗಿ ಫೈನಲ್ ಅನ್ನೋ ಸುದ್ದಿ ಈಟಿವಿ ಭಾರತಕ್ಕೆ‌ ಸಿಕ್ಕಿದೆ. ಆದ್ರೆ ಅಧಿಕೃತ ಮಾಹಿತಿ ಚಿತ್ರತಂಡದಿಂದ ಹೊರಬರಬೇಕಿದೆ.

ಯುವ ರಾಜ್​ಕುಮಾರ್​​ ಸಿನಿಮಾಗೆ ರುಕ್ಮಿಣಿ ವಸಂತ್ ಎಂಟ್ರಿ

ಬೀರ್​​ಬಲ್ ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಬಲಗಾಲಿಟ್ಟು ನಂತರ ಸಪ್ತಸಾಗರದಾಚೆ ಎಲ್ಲೋ, ಬಾನದಾರಿಯಲ್ಲಿ ಚಿತ್ರದಲ್ಲಿ ನಟಿಸಿರುವ ರುಕ್ಮಿಣಿ ವಸಂತ್ ಅವರಿಗೆ ಹೊಂಬಾಳೆ ಫಿಲ್ಮ್ಸ್​​ ಅದೃಷ್ಠದ ಬಾಗಿಲು ತೆರೆದಿದೆ. ಈ ಚಿತ್ರಕ್ಕೆ ಫೈನಲ್ ಆಗಿದ್ದ ಕಲ್ಯಾಣಿ ಪ್ರಿಯದರ್ಶಿನಿ ಅವರ ಸಿನಿಮಾ ಡೇಟ್ ಕ್ಲ್ಯಾಶ್ ಆದ ಕಾರಣ ಆ ಜಾಗಕ್ಕೆ ರುಕ್ಮಿಣಿ ವಸಂತ್​​ ಗ್ರ್ಯಾಂಡ್ ಎಂಟ್ರಿ ಕೊಟ್ಟಿದ್ದಾರೆ. ಈ ಮೂಲಕ ಕನ್ನಡದ ನಟಿಯನ್ನೇ ಯುವನ ಚಿತ್ರಕ್ಕೆ ಕರೆದುಕೊಂಡು ಬರಬೇಕು ಎನ್ನುವ ಸಂತೋಷ್ ಆನಂದ್ ರಾಮ್ ಅವರ ಕನಸು ನನಸಾಗಿದೆ. ಇನ್ನು, ಈ ತಿಂಗಳ ಅಂತ್ಯದೊಳಗೆ ಟೀಸರ್ ಶೂಟಿಂಗ್ ಶುರು ಮಾಡಲಿದೆ ಚಿತ್ರತಂಡ.

ಇದನ್ನೂ ಓದಿ: ಚಿಕ್ಕಪ್ಪನ ಹುಟ್ಟುಹಬ್ಬದಂದು ಸೆಟ್ಟೇರಲಿದೆ ಯುವ ರಾಜ್​ಕುಮಾರ್ ಮೊದಲ ಸಿನಿಮಾ

ದಿವಂಗತ ನಟ ಪುನೀತ್​ ರಾಜ್​ಕುಮಾರ್​ ಅವರಿಗೆಂದು ರೆಡಿ ಆದ ಕಥೆಗೆ ಯುವ ರಾಜ್​ಕುಮಾರ್​​ ನಟಿಸಲಿರುವ ಕಾರಣ ಚಿತ್ರಕ್ಕೆ ಪವರ್ ಫುಲ್ ಟೈಟಲ್ ಫಿಕ್ಸ್ ಮಾಡುವಲ್ಲಿ ಚಿತ್ರತಂಡ ಬ್ಯುಸಿಯಾಗಿದೆ. ಅಪ್ಪು ಹುಟ್ಟು ಹಬ್ಬದಂದು ಅಂದ್ರೆ ಮಾರ್ಚ್ 17ರಂದು ಟೀಸರ್ ಲಾಂಚ್ ಮಾಡಿ, ಅಂದಿನಿಂದಲೇ ಶೂಟಿಂಗ್ ಶುರು ಮಾಡಲು ಸಕಲ ಸಿದ್ಧತೆ ಮಾಡಿಕೊಂಡಿದ್ದಾರೆ.

ಇದನ್ನೂ ಓದಿ: ಫಲಿಸದ ಚಿಕಿತ್ಸೆ - ಅನಾರೋಗ್ಯದಿಂದ ಬಳಲುತ್ತಿದ್ದ ಮಲಯಾಳಂ ನಟಿ ಸುಬಿ ಸುರೇಶ್ ವಿಧಿವಶ