ಉತ್ತಮ ನಟನೆ ಜೊತೆಗೆ ಬುದ್ಧಿವಂತಿಕೆಗೆ ಹೆಸರುವಾಸಿಯಾಗಿರುವ ನಟ ಗುರ್ಮೀತ್ ಚೌಧರಿ ಇದೀಗ ರಸ್ತೆ ಬದಿ ಅಪರಿಚಿತರ ಜೀವ ಉಳಿಸಲು ಮುಂದಾಗಿ ಪ್ರಶಂಸೆಗೆ ಪಾತ್ರರಾಗಿದ್ದಾರೆ. ನಟನ ಮಾನವೀಯತೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ಶ್ಲಾಘನೆ ವ್ಯಕ್ತವಾಗುತ್ತಿದೆ.
ರಸ್ತೆ ಬದಿ ಹೃದಯಾಘಾತಕ್ಕೊಳಗಾದ ಅಪರಿಚಿತ: ಮುಂಬೈನ ಅಂಧೇರಿ ಬಳಿ ಜನನಿಬಿಡ ಪ್ರದೇಶದಲ್ಲಿ ಹೃದಯಾಘಾತಕ್ಕೊಳಗಾಗಿ ಬಳಲುತ್ತಿದ್ದ ವ್ಯಕ್ತಿಯನ್ನು ಬದುಕುಳಿಸುವ ಪ್ರಯತ್ನ ಮಾಡಿದ್ದಾರೆ. ತುರ್ತು ಕಾರ್ಡಿಯೋಪಲ್ಮನರಿ ರೆಸಸಿಟೇಶನ್ (CPR/Cardiopulmonary Resuscitation) ವಿಧಾನ ಬಳಸಿದರು. ಎದೆ ಒತ್ತಿ ಜೀವ ಉಳಿಸಲು ಮುಂದಾದರು. ಖಾಮೋಶಿಯಾನ್ ಸಿನಿಮಾ ನಟನ ಈ ವಿಡಿಯೋ ಆನ್ಲೈನ್ನಲ್ಲಿ ವೈರಲ್ ಆಗಿದ್ದು, ಅನೇಕ ಹೃದಯಗಳನ್ನು ಗೆದ್ದಿದೆ. ಸಮಯಕ್ಕೆ ಸರಿಯಾಗಿ ಸಹಾಯ ಮಾಡಿದ ಹಿನ್ನೆಲೆ ಅಭಿಮಾನಿಗಳು ನಟನನ್ನು ಶ್ಲಾಘಿಸುತ್ತಿದ್ದಾರೆ.
ಸಿಪಿಆರ್ ವಿಧಾನ ಬಳಕೆ: ನಟ ಗುರ್ಮೀತ್ ಚೌಧರಿ, ಅಪರಿಚಿತ ವ್ಯಕ್ತಿಯನ್ನು ರಕ್ಷಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಕಾಣಿಸಿಕೊಂಡಿದ್ದು, ಕ್ಷಣಾರ್ಧದಲ್ಲಿ ಕಾಳ್ಗಿಚ್ಚಿನಂತೆ ವೈರಲ್ ಆಗಿದೆ. ನಟ ತಮ್ಮ ಕೆಲಸಕ್ಕೆ ಹೋಗುತ್ತಿರುವ ವೇಳೆ ರಸ್ತೆಯಲ್ಲಿ ಜನಸಂದಣಿಯನ್ನು ಗಮನಿಸಿದ ನಟನಿಗೆ ವ್ಯಕ್ತಿಯೋರ್ವ ಹೃದಯಾಘಾತದಿಂದ ಬಳಲುತ್ತಿರುವುದು ಗೊತ್ತಾಗಿದೆ. ನಟ ಆ ಕೂಡಲೇ ಸಿಪಿಆರ್ ವಿಧಾನವನ್ನು ಬಳಸಿ ರಕ್ಷಣೆ ಮಾಡುವ ಪ್ರಯತ್ನ ಮಾಡಿದ್ದಾರೆ, ಜೊತೆಗೆ ಪೊಲೀಸ್ ಅಧಿಕಾರಿಗಳಿಗೆ ಈ ಬಗ್ಗೆ ಮಾಹಿತಿ ಕೊಟ್ಟಿದ್ದಾರೆ. ಸ್ಥಳಕ್ಕಾಗಮಿಸಿದ ಅಧಿಕಾರಿಗಳು ಆಂಬ್ಯುಲೆನ್ಸ್ ಮೂಲಕ ಹೃದಯಾಘಾತಕ್ಕೊಳಗಾದ ವ್ಯಕ್ತಿಯನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದರು.
ಎದೆ ಒತ್ತಿ ಜೀವ ಉಳಿಸಲು ಮುಂದಾಗಿದ್ದಷ್ಟೇ ಅಲ್ಲ ಆಸ್ಪತ್ರೆಗೂ ಹೋಗಿ ಎಲ್ಲ ವ್ಯವಸ್ಥೆಗಳನ್ನು ಗಮನಿಸಿದ್ದಾರೆ. ನಟ ತಮ್ಮ ಕೆಲಸದ ಸ್ಥಳಕ್ಕೆ ನಿರ್ಗಮಿಸುವ ಮುನ್ನ ಅಗತ್ಯವಿರುವ ಎಲ್ಲ ವೈದ್ಯಕೀಯ ವ್ಯವಸ್ಥೆ ಇದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ರೋಗಿಯೊಂದಿಗೆ ಆಸ್ಪತ್ರೆಗೂ ತೆರಳಿದರು. ಬಳಿಕ ತಮ್ಮ ಕೆಲಸಕ್ಕೆ ಹೋಗಿದ್ದಾರೆ. ಕೋವಿಡ್ 19 ಉತ್ತುಂಗದಲ್ಲಿದ್ದ ಸಂದರ್ಭ ಅಗತ್ಯವಿರುವವರಿಗೆ ಸಹಾಯ ಹಸ್ತವನ್ನು ಚಾಚಿದ ಅನೇಕ ಕಲಾವಿದರ ಪೈಕಿ ಗುರ್ಮೀತ್ ಚೌಧರಿ ಕೂಡ ಓರ್ವರು ಎಂದುದನ್ನು ನಾವು ಈ ಸಮಯ ನೆನಪಿಸಿಕೊಳ್ಳಬೇಕಾಗುತ್ತದೆ.
ಇದನ್ನೂ ಓದಿ: ಮಹಾದೇವ್ ಬೆಟ್ಟಿಂಗ್ ಆ್ಯಪ್ ಪ್ರಕರಣ; ಕಪಿಲ್ ಶರ್ಮಾ, ಹುಮಾ ಖುರೇಷಿ, ಹೀನಾ ಖಾನ್ಗೆ ಇಡಿ ಸಮನ್ಸ್
ನಟ ಗುರ್ಮೀತ್ ಚೌಧರಿ ಈವರೆಗೆ ಹಲವು ಟಿವಿ ಶೋಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಕೆಲ ಸಿನಿಮಾಗಳನ್ನೂ ಮಾಡಿದ್ದಾರೆ. ರಾಮಾಯಣದಲ್ಲಿ ರಾಮನ ಪಾತ್ರಕ್ಕೆ ಹೆಸರುವಾಸಿಯಾಗಿದ್ದಾರೆ. ಜನಪ್ರಿಯ ಟಿವಿ ಶೋಗಳಾದ ಗೀತ್ - ಹುಯಿ ಸಬ್ಸೆ ಪರಾಯಿ, ಪುನರ್ ವಿವಾಹ: ಜಿಂದಗಿ ಮಿಲೇಗಿ ದೊಬಾರಾ ಜನಪ್ರಿಯ ಧಾರಾವಾಹಿಗಳಲ್ಲಿ ನಾಯಕನಾಗಿ ನಟಿಸಿದ್ದ ಗುರ್ಮೀತ್, ಜಲಕ್ ದಿಖ್ಲಾ ಜಾ 5ರ ವಿಜೇತರಾಗಿ ಹೊರಹೊಮ್ಮಿದ್ದಾರೆ. ಕರಣ್ ದರಾ ಅವರ ನಿರ್ದೇಶನದ ಖಾಮೋಶಿಯಾನ್ ಸಿನಿಮಾ ಮೂಲಕ 2015ರಲ್ಲಿ ಬಾಲಿವುಡ್ಗೆ ಎಂಟ್ರಿ ಕೊಟ್ಟಿದ್ದರು.
ಇದನ್ನೂ ಓದಿ: ಪ್ರಶಾಂತ್ ನೀಲ್, ಜೂ. ಎನ್‌ಟಿಆರ್ ಕಾಂಬಿನೇಶನ್ನ ಸಿನಿಮಾಗೆ ಮುಹೂರ್ತ ನಿಗದಿ
