ನವದೆಹಲಿ: ಲೋಕಸಭಾ ಚುನಾವಣೆ ಆರಂಭಕ್ಕೆ ಇನ್ನೆರಡು ದಿನಗಳಷ್ಟೇ ಬಾಕಿ ಇದ್ದು ಪ್ರಧಾನಿ ಮೋದಿ ಈನಾಡು ಗ್ರೂಪ್ಗೆ ಸಂದರ್ಶನ ನೀಡಿದ್ದು, ತಮ್ಮ ಪಕ್ಷ, ಚುನಾವಣಾ ಪ್ರಣಾಳಿಕೆಯ ಬಗ್ಗೆ ಮಾತನಾಡಿದ್ದಾರೆ.
ಪ್ರಶ್ನೆ 1: ನಿಮ್ಮ ಸರ್ಕಾರದ ಅತ್ಯಂತ ದೊಡ್ಡ ಸಾಧನೆ ಏನು?
ಉತ್ತರ: ಎಲ್ಲ ವರ್ಗವನ್ನೂ ಸುಧಾರಣೆಗೊಳಿಸುವ ನಿಟ್ಟಿನಲ್ಲಿ ನಾವು ಕೆಲಸ ಮಾಡಿದ್ದೇವೆ. ಈ ವಿಚಾರದಲ್ಲಿ ಯಾವುದೇ ರಾಜಿಯಾಗಿಲ್ಲ. ಸುಧಾರಣೆ, ಸಾಧನೆ ಮತ್ತು ರೂಪಾಂತರ ಧ್ಯೇಯವಾಗಿಟ್ಟುಕೊಂಡಿದ್ದೇವೆ. ಚುನಾವಣೆಯ ವೇಳೆ ಸಾಮಾನ್ಯವಾಗಿ ಸರ್ಕಾರಗಳು ಒಂದೆರಡು ಕ್ಷೇತ್ರಗಳಿಗೆ ಮಾತ್ರ ಒತ್ತು ನೀಡುತ್ತವೆ. ಹಿಂದಿನ ಯುಪಿಎ ಸರ್ಕಾರ ಇದನ್ನೇ ಮಾಡಿತ್ತು.
ದೇಶದ ಜನತೆಯ ಒಳಿತಿಗಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತೇನೆ. ನನ್ನ ಪ್ರಕಾರ, ದೇಶದ ಸುಲಲಿತವಾಗಿ ಮುನ್ನಡೆಯಲು ಎಲ್ಲ ಸಮಸ್ಯೆಗಳನ್ನೂ ನಿರ್ದಿಷ್ಟ ಸಮಯದೊಳಗೆ ಬಗೆಹರಿಸುವ ಅನಿವಾರ್ಯತೆ ಇದೆ.
ಪ್ರಶ್ನೆ 2: ಐದು ವರ್ಷದ ಆಡಳಿತದಲ್ಲಿ ನಿಮಗೆ ತೃಪ್ತಿ ನೀಡಿದ ಸುಧಾರಣೆ ಯಾವುದು?
ಉತ್ತರ: ಬಿಜೆಪಿ ಅಧಿಕಾರಕ್ಕೇರುವ ಮುನ್ನ ದೇಶದ ಜನತೆ ಬರೀ ಹಗರಣ, ಭ್ರಷ್ಟಾಚಾರದ ಸುದ್ದಿಗಳನ್ನೇ ಕೇಳುತ್ತಿದ್ದರು. ಆದರೆ ಸದ್ಯ ಜನತೆಗೆ ಸರ್ಕಾರದ ಮೇಲೆ ವಿಶ್ವಾಸ ಮೂಡಿದೆ. ಈ ಬದಲಾವಣೆ ಹಾಗೂ ನಂಬಿಕೆಯೇ ನನಗೆ ಸಾಕಷ್ಟು ತೃಪ್ತಿನ ನೀಡಿದೆ.
ಪ್ರಶ್ನೆ 3: ಮಹಾಘಟಬಂಧನ್ ಬಗ್ಗೆ ನಿಮ್ಮ ಅಭಿಪ್ರಾಯವೇನು?
ಉತ್ತರ: ನಾನು ಮೊದಲ ಬಾರಿಗೆ ಪ್ರಧಾನಿ ಹುದ್ದೆ ಏರಿದ್ದೆ. ಕಳೆದ ಐದು ವರ್ಷದಲ್ಲಿ ನನ್ನ ಕೆಲಸಗಳನ್ನು ಜನತೆ ನೋಡಿದ್ದಾರೆ. ಮೂರು ದಶಕಗಳ ಬಳಿಕ ದೇಶದಲ್ಲಿ ಸ್ಥಿರ ಆಡಳಿತ ನಾವು ನೀಡಿದ್ದೇವೆ. ಜನತೆಗೂ ಸಹ ಸದೃಢ ಹಾಗೂ ಸ್ಥಿರ ಸರ್ಕಾರದ ಅಗತ್ಯ ಇದೆ ಎನ್ನುವುದು ಅರಿವಾಗಿದೆ. ಈ ಎಲ್ಲಾ ಕಾರಣಗಳಿಂದ ಮಹಾಘಟಬಂಧನ್ಗೆ ಜನತೆ ಮಣೆ ಹಾಕಲ್ಲ, ಯಾಕೆಂದರೆ ಸದ್ಯ ಒಗ್ಗಟ್ಟಾಗಿರುವವರ ಸಿದ್ಧಾಂತಗಳು ಭಿನ್ನವಾಗಿವೆ.
ಪ್ರಶ್ನೆ 4: ಕೃಷಿ ವಲಯದ ಬಿಕ್ಕಟ್ಟು ಹಾಗೂ ನಿರುದ್ಯೋಗಗಳು ಚುನಾವಣೆಯ ಮೇಲೆ ಪರಿಣಾಮ ಬೀರಲಿದೆಯೇ?
ಉತ್ತರ: ಪ್ರಸ್ತುತ ಕಾಲಘಟ್ಟದಲ್ಲಿ ಜನರನ್ನು ಮೂರ್ಖರನ್ನಾಗಿಸುವುದು ಅಸಾಧ್ಯದ ಮಾತು. ಇದು ಮಾಹಿತಿ ಯುಗ, ಎಲ್ಲವೂ ಕ್ಷಣಮಾತ್ರದಲ್ಲಿ ಪಡೆದುಕೊಳ್ಳಬಹುದು. ಹಿಂದಿನ ಕಾಲದಂತೆ ರಾಜಕಾರಣಿಗಳು ಜನತೆಯನ್ನು ಮೂರ್ಖರನ್ನಾಗಿಸುತ್ತಿದ್ದರು, ಆದರೆ ಅದು ಈಗ ಸಾಧ್ಯವಿಲ್ಲ. ಎಲ್ಲ ಮಾಹಿತಿಗಳನ್ನು ಬೆರಳ ತುದಿಯಲ್ಲಿ ಪಡೆಯುವ ಯುಗದಲ್ಲಿ ನಾವಿದ್ದೇವೆ.
ಪ್ರಶ್ನೆ 5: ಕೃಷಿ ವಲಯದ ಸಮಸ್ಯೆಗಳನ್ನು ಯಾವ ರೀತಿ ನಿಭಾಯಿಸುತ್ತೀರಿ ಮತ್ತು ರೈತರ ಹೋರಾಟದ ಬಗ್ಗೆ ಏನು ಹೇಳುತ್ತೀರಿ?
ಉತ್ತರ: ನಾವು ಸ್ವಾಮಿನಾಥನ್ ಆಯೋಗದ ವರದಿಯನ್ನು ಸಂಪೂರ್ಣವಾಗಿ ಅಧ್ಯಯನ ಮಾಡಿದ್ದೇವೆ. ಕೃಷಿ ಉತ್ಪನ್ನಗಳಿಗೆ ಒಂದೂವರೆ ಪಟ್ಟು ಹೆಚ್ಚಿನ ವೆಚ್ಚ ನೀಡಲಿದ್ದೇವೆ. ಈ ಹಿಂದಿನ ಸರ್ಕಾರಗಳಿಗಿಂತ ಹೆಚ್ಚಾಗಿ ರೈತರ ಬೆಳೆಗಳನ್ನು ಖರೀದಿ ಮಾಡುತ್ತಿದ್ಧೇವೆ. ಆಧುನಿಕ ತಂತ್ರಜ್ಞಾನಗಳ ಬಳಕೆಗೆ ಹೊಸ ಹೊಸ ಯೋಜನೆ ಜಾರಿಗೊಳಿಸಿದ್ದೇವೆ.
ರೈತರು ಮಹಾರಾಷ್ಟ್ರ ಹಾಗೂ ತಮಿಳುನಾಡಿನಲ್ಲಿ ಹೋರಾಟ ಮಾಡಿದ್ದು ನಿಜ. ಆದರೆ ಅದು ಹೆಚ್ಚು ಸಮಯ ಉಳಿಯಲಿಲ್ಲ. ವಾಸ್ತವ ಅರಿವಾದಂತೆ ರೈತರು ಹೋರಾಟವನ್ನು ಕೈಬಿಟ್ಟರು.
ಪ್ರಶ್ನೆ 6: ನೋಟ್ಬ್ಯಾನ್ ಒಂದು ಹಗರಣ ಎನ್ನುವ ಆರೋಪಕ್ಕೆ ನಿಮ್ಮ ಪ್ರತಿಕ್ರಿಯೆ ಏನು?
ಉತ್ತರ: ಇಂಧಿರಾ ಗಾಂಧಿ ಕಾಲದಲ್ಲೂ ನೋಟ್ಬ್ಯಾನ್ ವಿಚಾರ ಮುನ್ನೆಲೆಗೆ ಬಂದಿತ್ತು. ಆಗಿನ ವಿತ್ತ ಸಚಿವ ಯಶ್ವಂತ್ ರಾವ್ ನೋಟ್ಬ್ಯಾನ್ ಪ್ರಸ್ತಾವನೆಯನ್ನು ಇಂದಿರಾ ಗಾಂಧಿ ಮುಂದಿಟ್ಟಿದ್ದರು. ರಾಜಕೀಯವಾಗಿ ಇದು ಹಿನ್ನೆಯಾಗಬಹುದು ಎನ್ನುವ ಕಾರಣಕ್ಕೆ ಇಂದಿರಾ ಗಾಂಧಿ ನೋಟ್ಬ್ಯಾನ್ ಮಾಡಲಿಲ್ಲ. ಒಂದು ವೇಳೆ ಮಾಡಿದ್ದರೆ ನಾನು ಈ ನಿರ್ಧಾರಕ್ಕೆ ಬರೋ ಅವಶ್ಯಕತೆ ಇರಲಿಲ್ಲ.
ಪ್ರಶ್ನೆ 7: ಆರ್ಥಿಕ ವಂಚಕ ವಿಜಯ್ ಮಲ್ಯ, ಮೆಹುಲ್ ಚೋಕ್ಸಿ ಹಾಗೂ ನೀರವ್ ಮೋದಿಯನ್ನು ಭಾರತಕ್ಕೆ ಕರೆತರುವಲ್ಲಿ ನಿಮ್ಮ ಸರ್ಕಾರ ವಿಫಲವಾಯಿತೇ?
ಉತ್ತರ: ಈ ವಿಚಾರವನ್ನು ಕಾಂಗ್ರೆಸ್ ಹೇಳಿದರೆ ಕಳೆದ 70 ವರ್ಷದಲ್ಲಿ ಕಾಂಗ್ರೆಸ್ ಸರ್ಕಾರದಲ್ಲಿ ಇಂತಹ ಭ್ರಷ್ಟರು ಎಷ್ಟು ಜನ ಓಡಿಹೋಗಿದ್ದಾರೆ ಎನ್ನುವುದನ್ನು ಮಾಧ್ಯಮಗಳು ಜನತೆಯ ಮುಂದಿಡಬೇಕು. ಅದು ಚರ್ಚೆಗೂ ಬರಬೇಕು. ನಮ್ಮ ಸರ್ಕಾರ ದೀಪಕ್ ತಲ್ವಾರ್, ಕ್ರಿಶ್ಚಿಯನ್ ಮೈಕಲ್ ಹಾಗೂ ರಾಜೀವ್ ಸಕ್ಸೇನಾರನ್ನು ಭಾರತಕ್ಕೆ ಕರೆತಂದಿದೆ. ಭ್ರಷ್ಟರ ವಿರುದ್ಧದ ಹೋರಾಟದಲ್ಲಿ ನಮ್ಮ ನಿಲುವು ಸ್ಪಷ್ಟವಾಗಿದೆ ಮತ್ತು ಇದರಲ್ಲಿ ನಾವು ಗೆಲ್ಲುವ ವಿಶ್ವಾದವಿದೆ.
ಪ್ರಶ್ನೆ 8: ರಫೇಲ್ ಡೀಲ್ನಲ್ಲಿ ಆಫ್ಸೆಟ್ ಕೆಲಸಕ್ಕಾಗಿ ರಿಲಯನ್ಸ್ ಕಂಪೆನಿ ಜೊತೆ ಪಾಲುದಾರಿಕೆ ಅವಶ್ಯವಿತ್ತೇ?
ಉತ್ತರ: ನಾವು ಎಲ್ಲ ಕಡೆಗಳಲ್ಲೂ ಕ್ಲೀನ್ಚಿಟ್ ಪಡೆದಿದ್ದೇವೆ. ಸಿಎಜಿ ಹಾಗೂ ಸುಪ್ರೀಂ ಕೋರ್ಟ್ನಲ್ಲಿ ಎಲ್ಲ ಮಾಹಿತಿಯನ್ನೂ ಹೇಳಿದ್ಧೇವೆ ಮತ್ತು ಇಲ್ಲಿ ನಮಗೆ ಕ್ಲೀನ್ಚಿಟ್ ದೊರೆತಿದೆ. ಆದರೂ ಪ್ರತಿಪಕ್ಷಗಳು ಇದರಲ್ಲಿ ರಾಜಕೀಯ ಹುಡುಕುತ್ತಿವೆ.
ಪ್ರಶ್ನೆ 9: ಭಯೋತ್ಪಾದನೆ ನಿರ್ಮೂಲನೆ ಬಗ್ಗೆ ನಿಮ್ಮ ಹೇಳಿಕೆ ಏನು?
ಉತ್ತರ: ಉಗ್ರರನ್ನು ಸಂಪೂರ್ಣವಾಗಿ ನಿರ್ಮೂಲನೆ ಮಾಡುವ ದೃಢ ವಿಶ್ವಾಸ ನಮಗಿದೆ. ಅದಕ್ಕಾಗಿ ಸಮ್ಮ ಸರ್ಕಾರ ಕೆಲಸ ಮಾಡುತ್ತಿದೆ.
ಪ್ರಶ್ನೆ 10: ನ್ಯಾಯ್ ಯೋಜನೆ ಬಗ್ಗೆ ನಿಮ್ಮ ಅಭಿಪ್ರಾಯವೇನು?
ಉತ್ತರ: ನ್ಯಾಯ್ ಯೋಜನೆಯ ಮೂಲಕ ನಾವು ಬಡವರಿಗೆ ಅನ್ಯಾಯ ಮಾಡಿದ್ದೇವೆ ಎನ್ನುವುದನ್ನು ಒಪ್ಪಿಕೊಂಡಿದೆ. ಕಾಂಗ್ರೆಸ್, ರಾಜಸ್ಥಾನ, ಮಹಾರಾಷ್ಟ್ರ ಹಾಗೂ ಛತ್ತೀಸ್ಗಢದ ಯುವ ಸಮೂಹಕ್ಕೆ ನ್ಯಾಯ ನೀಡುತ್ತಾ? ಕರ್ನಾಟಕ, ಮಧ್ಯಪ್ರದೇಶ ಹಾಗೂ ರಾಜಸ್ಥಾನದಲ್ಲಿ ಕೃಷಿ ಸಾಲಮನ್ನಾದ ಭರವಸೆ ನೀಡಿದ್ದರು. ಇನ್ನೂ ಕೃಷಿಕರು ಸಾಲಮನ್ನಾದ ನಿರೀಕ್ಷೆಯಲ್ಲೇ ಇದ್ದಾರೆ. ಎಲ್ಲರೂ ನ್ಯಾಯದ ನಿರೀಕ್ಷೆಯಲ್ಲಿದ್ದಾರೆ.
ಪ್ರಶ್ನೆ 11: ನಿಮ್ಮ ಮುಂದಿನ ಸರ್ಕಾರದ ಪ್ರಮುಖ ಆದ್ಯತೆಗಳೇನು?
ಉತ್ತರ: ದೇಶವನ್ನು ಸುಭದ್ರಗೊಳಿಸಿ ಉತ್ತಮ ಹಂತಕ್ಕೆ ಕೊಂಡೊಯ್ಯುವುದೇ ನನ್ನ ಗುರಿ. ದೇಶದ ಅಭಿವೃದ್ಧಿ ಜೊತೆಗೆ ಜನರ ಹಿತಾಸಕ್ತಿಗಳನ್ನು ಕಾಪಾಡುವ ಕೆಲಸ ಮಾಡಲಿದ್ದೇವೆ.
