ಚಿಂದ್ವಾರ: ಮಧ್ಯಪ್ರದೇಶ ಸಿಎಂ ಕಮಲ್ನಾಥ್ ಪುತ್ರ ನಕುಲ್ ನಾಥ್ ಚಿಂದ್ವಾರ ಲೋಕಸಭಾ ಕ್ಷೇತ್ರದಿಂದ ಸ್ಪರ್ಧೆ ನಡೆಸುತ್ತಿದ್ದು ಮಂಗಳವಾರ ತಮ್ಮ ನಾಮಪತ್ರ ಸಲ್ಲಿಸಿದ್ದು, ಆಸ್ತಿ ವಿವರ ಬಹಿರಂಗವಾಗಿದೆ.
ನಾಮಪತ್ರ ಸಲ್ಲಿಕೆಯ ವೇಳೆ ನಕುಲ್ ನಾಥ್ ತಮ್ಮ ಆಸ್ತಿ ವಿವರ ಸಲ್ಲಿಸಿದ್ದು ಒಟ್ಟಾರೆ ಆಸ್ತಿ 660.01 ಕೋಟಿ ಎಂದು ಹೇಳಿಕೊಂಡಿದ್ದಾರೆ.
ಅಫಿಡವಿಟ್ನಲ್ಲಿ ಉಲ್ಲೇಖಿಸಿರುವ ನಕುಲ್ ನಾಥ್ ಆಸ್ತಿ ತಂದೆ ಕಮಲ್ನಾಥ್ ಆಸ್ತಿಗಿಂತ ಬರೋಬ್ಬರಿ ಐದು ಪಟ್ಟು ಹೆಚ್ಚಳ ಎನ್ನುವುದು ಗಮನಾರ್ಹ ಸಂಗತಿ. ಕಮಲ್ನಾಥ್ ಆಸ್ತಿ ಕೇವಲ 124 ಕೋಟಿ ಎನ್ನುವುದನ್ನ ಅಫಿಡವಿಟ್ನಲ್ಲಿ ಉಲ್ಲೇಖಿಸಿದ್ದರು.
ಉದ್ಯಮ ರಂಗದಿಂದ ರಾಜಕೀಯ ಅಖಾಡಕ್ಕೆ ಎಂಟ್ರಿ ನೀಡಿರುವ ನಕುಲ್ ನಾಥ್ 615.93 ಕೋಟಿ ಆಸ್ತಿ ಹೊಂದಿದ್ದರೆ ಪತ್ನಿ ಪ್ರಿಯಾ 2.30 ಕೋಟಿ ಆಸ್ತಿಗೆ ಒಡತಿಯಾಗಿದ್ದಾಳೆ. ಇಷ್ಟೆಲ್ಲಾ ಆಸ್ತಿ ಹೊಂದಿದ್ದರೂ ನಕುಲ್ ಹಾಗೂ ಪತ್ನಿ ಪ್ರಿಯಾ ಯಾವುದೇ ಸ್ವಂತ ವಾಹನವನ್ನು ಹೊಂದಿಲ್ಲ ಎನ್ನುವುದು ಅಚ್ಚರಿಯ ವಿಚಾರ.
ನಕುಲ್ ನಾಥ್ ಹಲವಾರು ಉದ್ಯಮಗಳಲ್ಲಿ ತಮ್ಮ ಷೇರುಗಳನ್ನು ಹೊಂದಿದ್ದಾರೆ. ಚಿಂದ್ವಾರ ಜಿಲ್ಲೆಯಲ್ಲಿ ನಕುಲ್ ಹಾಗೂ ಆತನ ಸಹೋದರ ಜಂಟಿಯಾಗಿ 7.82 ಎಕರೆಯ ಭೂಮಿಯನ್ನು ಹೊಂದಿದ್ದಾರೆ ಎನ್ನುವುದೂ ಅಫಿಡವಿಟ್ನಲ್ಲಿ ಇದೆ.
ಮೊದಲ ಬಾರಿಗೆ ಚುನಾವಣೆ ಸ್ಪರ್ಧೆ ಮಾಡುತ್ತಿರುವ ನಕುಲ್ ನಾಥ್, ಅಮೆರಿಕದ ಬೇ ಸ್ಟೇ ಕಾಲೇಜ್ನಿಂದ ವಾಣಿಜ್ಯ ಆಡಳಿತ(ಬ್ಯುಸಿನೆಸ್ ಅಡ್ಮಿನಿಸ್ಟ್ರೇಷನ್)ದಲ್ಲಿ ಪದವಿ ಪಡೆದಿದ್ದಾರೆ. ನಕುಲ್ ನಾಥ್ ವಿರುದ್ಧ ಚಿಂದ್ವಾರ ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ಬುಡಕಟ್ಟು ನಾಯಕ ನಥನ್ ಶಾ ಕಣಕ್ಕಿಳಿದಿದ್ದಾರೆ.
