ಅಗರ್ತಲಾ: ಅಸ್ಸೋಂ ಗಡಿಯಲ್ಲಿ ಬಿಎಸ್ಎಫ್ ಯೋಧರು ಮತ್ತು ಅಸ್ಸೋಂ ಪೊಲೀಸರು ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ 47 ಕೋಟಿ ರೂಪಾಯಿ ಮೌಲ್ಯದ ಬ್ರೌನ್ ಶುಗರ್ ವಶಪಡಿಸಿಕೊಳ್ಳಲಾಗಿದೆ. ಡ್ರಗ್ಸ್ ಮಿಜೋರಾಂನಿಂದ ಬಂದು ತ್ರಿಪುರಾಗೆ ಹೋಗಲಿತ್ತು.
ಮಾದಕ ವಸ್ತುಗಳ ವಿರುದ್ಧ ಕಾರ್ಯಾಚರಣೆ ನಡೆಸಿದ ಬಿಎಸ್ಎಫ್ ಯೋಧರು, ಅಕ್ರಮವಾಗಿ ಡ್ರಗ್ಸ್ (ಬಹುಶಃ ಬ್ರೌನ್ ಶುಗರ್) ಸಾಗಿಸಲಾಗುತ್ತಿರುವ ಬಗ್ಗೆ ಖಚಿತ ಮಾಹಿತಿಯ ಮೇರೆಗೆ ಅಕ್ಟೋಬರ್ 11 ರಂದು ಮಿಜೋರಾಂ ನಿಂದ ಬಂದು ತ್ರಿಪುರಾ ಕಡೆಗೆ ಹೊರಟಿದ್ದ ಟ್ರಕ್ ಒಂದನ್ನು ಕರೀಮ್ಗಂಜ್ ಬಳಿ ತಡೆದು ತಪಾಸಣೆ ನಡೆಸಿದರು. ಕರೀಮಗಂಜ್ ರೈಲ್ವೆ ಸ್ಟೇಷನ್ ಬಳಿ ಮಧ್ಯರಾತ್ರಿ 1 ಗಂಟೆ ಸುಮಾರಿಗೆ ಸಿಕ್ಕುಬಿದ್ದ AS-11- BC-7975 ನೋಂದಣಿ ಸಂಖ್ಯೆಯ ಟ್ರಕ್ ನಲ್ಲಿ ಹೆರಾಯಿನ್ ತುಂಬಿದ್ದ 764 ಸಾಬೂನು ಬಾಕ್ಸ್ಗಳು ಪತ್ತೆಯಾಗಿವೆ.
ಟ್ರಕ್ ಕ್ಯಾಬಿನ್ ಮೇಲೆ ರಹಸ್ಯವಾಗಿ ಅಡಗಿಸಿ ಇಡಲಾಗಿದ್ದ 9.477 ಕೆಜಿ ತೂಕದ ಹೆರಾಯಿನ್ ಬಾಕ್ಸ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಜಪ್ತಿ ಮಾಡಲಾದ ಮಾದಕ ವಸ್ತುಗಳ ಒಟ್ಟು ಮೌಲ್ಯ 47 ಕೋಟಿ ರೂಪಾಯಿ ಎಂದು ಅಂದಾಜು ಮಾಡಲಾಗಿದೆ ಎಂದು ಬಿಎಸ್ಎಫ್ ಹೇಳಿದೆ. ಟ್ರಕ್ ಚಾಲಕನನ್ನು ಬಂಧಿಸಿ ಹೆಚ್ಚಿನ ವಿಚಾರಣೆಗೆ ಒಳಪಡಿಸಲಾಗಿದೆ.
ಬಂಧಿತ ಟ್ರಕ್ ಚಾಲಕ ಮತ್ತು ವಶಪಡಿಸಿಕೊಂಡ ವಸ್ತುಗಳನ್ನು ಪ್ರಸ್ತುತ ಮುಂದಿನ ಕಾನೂನು ಕ್ರಮಕ್ಕಾಗಿ ಕರೀಂಗಂಜ್ ಪೊಲೀಸರ ವಶದಲ್ಲಿರಿಸಲಾಗಿದೆ.
ಇದನ್ನೂ ಓದಿ: 76 ಲಕ್ಷ ರೂ. ಮೌಲ್ಯದ ಬ್ರೌನ್ ಶುಗರ್ ಸಾಗಾಟಕ್ಕೆ ಯತ್ನ... ಓರ್ವನನ್ನು ಬಂಧಿಸಿದ ಭದ್ರತಾ ಸಿಬ್ಬಂದಿ
