ಶಿವಮೊಗ್ಗ: ಉಕ್ರೇನ್ನಲ್ಲಿ ಅಂತಿಮ ವರ್ಷದ ಎಂಬಿಬಿಎಸ್ ವ್ಯಾಸಂಗ ಮಾಡುತ್ತಿದ್ದ ಶಿವಮೊಗ್ಗ ಜಿಲ್ಲೆಯ ಸಾಗರ ಪಟ್ಟಣದ ನಿವಾಸಿ ಮನೀಷಾ ಲೋಬೊ ಸುರಕ್ಷಿತವಾಗಿ ಮನೆ ತಲುಪಿದ್ದಾರೆ.
ಕಳೆದ ಐದು ವರ್ಷಗಳಿಂದ ಉಕ್ರೇನ್ನಲ್ಲಿ ಮನೀಷಾ ವ್ಯಾಸಂಗ ಮಾಡುತ್ತಿದ್ದರು. ಮನೀಷಾ ವಾಸವಾಗಿದ್ದ ಕೀವ್ ಸಿಟಿಯ ಮೇಲೆ ರಷ್ಯಾ ಸೇನೆ ದಾಳಿ ನಡೆಸಿದ ಪರಿಣಾಮ ಭಾರತೀಯ ವಿದ್ಯಾರ್ಥಿಗಳು ಸಂಕಷ್ಟಕ್ಕೆ ಸಿಲುಕಿದ್ದರು. ಇಷ್ಟು ದಿನ ಬಂಕರ್ನಲ್ಲಿ ಆಶ್ರಯ ಪಡೆದಿದ್ದ ಮನೀಷಾ ನೂರಾರು ಕಿ.ಮೀ ದೂರ ಕೆಟ್ಟ ಹವಾಮಾನದಲ್ಲಿಯೂ ಕಾಲ್ನಡಿಗೆಯಲ್ಲಿ ಸಾಗಿ, ರಿಸ್ಕ್ ತೆಗೆದುಕೊಂಡು ಗಡಿ ದಾಟಿ ಭಾರತ ಸರ್ಕಾರದ ಸಹಾಯದಿಂದ ಇದೀಗ ಮರಳಿ ಬಂದಿದ್ದಾರೆ.
ಇದನ್ನೂ ಓದಿ: ಉಕ್ರೇನ್ನಲ್ಲಿ ಮೃತಪಟ್ಟ ನವೀನ್... ಮೂರನೇ ದಿನದ ಕಾರ್ಯ ನೆರವೇರಿಸಿದ ಕುಟುಂಬಸ್ಥರು
ವಿದೇಶಾಂಗ ಇಲಾಖೆ ಹಾಗೂ ಸಂಬಂಧ ಪಟ್ಟ ಏಜೆಂಟರ್ಗಳು ಬಂಕರ್ನಲ್ಲಿಯೇ ಇರಿ ಎಂದು ಹೇಳಿದ್ದರು. ಆದರೆ ಅಲ್ಲೂ ಸಹ ಊಟ, ನೀರಿನ ಸಮಸ್ಯೆ ಉಂಟಾಗಿತ್ತು. ಇದರಿಂದ ಎಲ್ಲರೂ ಜೀವವನ್ನು ಕೈಯಲ್ಲಿಟ್ಟುಕೊಂಡು ಲವ್ಯೂ ಎನ್ನುವ ಸಿಟಿಗೆ ಬಂದು ಅಲ್ಲಿಂದ ಪೊಲ್ಯಾಂಡ್ಗೆ ತಲುಪಿ, ಅಲ್ಲಿನ ಭಾರತೀಯ ಅಧಿಕಾರಿಗಳನ್ನು ಹುಡುಕಿದ್ದೆವು. ಭಾರತ ಸರ್ಕಾರದ ಸಹಾಯದಿಂದ ಪೋಲ್ಯಾಂಡ್ನಿಂದ ದೆಹಲಿಗೆ, ದೆಹಲಿಯಿಂದ ಬೆಂಗಳೂರಿಗೆ ಬರಲು ಸಾಧ್ಯವಾಯಿತು ಎಂದು ಮನೀಷಾ ತಿಳಿಸಿದ್ದಾರೆ. ಮಗಳು ಸುರಕ್ಷಿತವಾಗಿ ಮನೆ ತಲುಪಿದ್ದಕ್ಕೆ ಆಕೆಯ ಪೋಷಕರು ಸಂತಸ ವ್ಯಕ್ತಪಡಿಸಿದ್ದಾರೆ.
