ಮೈಸೂರಲ್ಲಿ ಮೊದಲ ಹಂತದ ಗ್ರಾಪಂ ಚುನಾವಣೆಗೆ ಸಿದ್ಧತೆ: ಇಲ್ಲಿದೆ ಕಂಪ್ಲೀಟ್​ ಡೀಟೇಲ್ಸ್

ಗ್ರಾಮ ಸಮರದ ಕಾವು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಲೇ ಇದೆ. ಮೈಸೂರಿನಲ್ಲೂ ಕೂಡ ಅಭ್ಯರ್ಥಿಗಳು ಚುನಾವಣಾ ಪ್ರಚಾರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಮತದಾನಕ್ಕೆ ಜಿಲ್ಲಾಡಳಿತವೂ ಸಕಲ‌ ಸಿದ್ಧತೆಗಳನ್ನು ನಡೆಸಿದೆ.

ಮೈಸೂರು: ಮೊದಲ ಹಂತದಲ್ಲಿ ನಡೆಯಲಿರುವ ಗ್ರಾಮ ಪಂಚಾಯತಿ ಚುನಾವಣೆಯ ಮತದಾನಕ್ಕೆ ಜಿಲ್ಲಾಡಳಿತವೂ ಸಕಲ‌ ಸಿದ್ಧತೆಗಳನ್ನು ನಡೆಸಿದೆ.

ಮೊದಲ ಹಂತದ ಗ್ರಾಮ ಪಂಚಾಯತಿ ಚುನಾವಣೆಗೆ ಜಿಲ್ಲಾಡಳಿತವೂ ಸಕಲ ಸಿದ್ಧತೆ ನಡೆಸಿಕೊಂಡಿದ್ದು, ಡಿಸೆಂಬರ್ 22ರಂದು ಮಂಗಳವಾರ ಬೆಳಗ್ಗೆ 7 ಗಂಟೆಯಿಂದ ಸಂಜೆ 5 ಗಂಟೆಯವರೆಗೂ ಜಿಲ್ಲೆಯ ತಾಲೂಕುಗಳಾದ ಹುಣಸೂರು, ಕೆ.ಆರ್.ನಗರ, ಪಿರಿಯಾಪಟ್ಟಣ, ಹೆಚ್.ಡಿ.ಕೋಟೆ, ಸರಗೂರು ತಾಲೂಕುಗಳ 148 ಗ್ರಾಮ ಪಂಚಾಯತಿಯಲ್ಲಿ ಮತದಾನ ನಡೆಯಲಿದ್ದು, 5 ತಾಲೂಕಿನ 949 ಕ್ಷೇತ್ರಗಳಲ್ಲಿ 2,303 ಸದಸ್ಯರ ಆಯ್ಕೆಗಾಗಿ ಚುನಾವಣಾ ಪ್ರಕ್ರಿಯೆ ನಡೆಯಲಿದೆ. ಈಗಾಗಲೇ 132 ಸದಸ್ಯರು ಅವಿರೋಧವಾಗಿ ಆಯ್ಕೆಯಾಗಿದ್ದು, ಒಟ್ಟು 2,180 ಸದಸ್ಯರ ಆಯ್ಕೆಗಾಗಿ ಮತದಾನ ನಡೆಯುತ್ತದೆ ಎಂದು ಜಿಲ್ಲಾಡಳಿತ ತಿಳಿಸಿದೆ.

ಹೆಚ್ಚುವರಿ ಮತಗಟ್ಟೆಗಳ ಸ್ಥಾಪನೆ:

974 ಮತಗಟ್ಟೆಗಳು ಸೇರಿದಂತೆ 174 ಹೆಚ್ಚುವರಿ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ಈ 1,148 ಮತಗಟ್ಟೆಗಳಲ್ಲಿ ಮೊದಲನೇ ಹಂತದ ಚುನಾವಣೆಯ ಮತದಾನ ನಡೆಯಲಿದೆ. 5,052 ಅಧಿಕಾರಿ, ಸಿಬ್ಬಂದಿಯನ್ನು ಚುನಾವಣಾ ಅಧಿಕಾರಿಗಳನ್ನಾಗಿ ನೇಮಿಸಲಾಗಿದೆ. ಮಸ್ಟರಿಂಗ್ ಕೇಂದ್ರದಿಂದ ಮತದಾನ ಅಧಿಕಾರಿಗಳನ್ನು ಮತಗಟ್ಟೆಗೆ ಕರೆದೊಯ್ಯಲು ಹಾಗೂ ವಾಪಸ್ ಕರೆ ತರಲಿಕ್ಕಾಗಿ ಕೆಎಸ್ಆರ್​ಟಿಸಿಯ 176 ಬಸ್​ಗಳು, 17 ಮಿನಿ ಬಸ್, ಮ್ಯಾಕ್ಸಿ ಕ್ಯಾಬ್ ಹಾಗೂ 7 ಜೀಪ್​ಗಳನ್ನು ನಿಯೋಜಿಸಲಾಗಿದೆ.

ಮತದಾರರ ವಿವರ

ಹುಣಸೂರು: ತಾಲೂಕಿನ 41 ಗ್ರಾಮ ಪಂಚಾಯತಿಗಳಲ್ಲಿ 95,056 ಪುರುಷ ಮತದಾರರು, 93,418 ಮಹಿಳಾ ಮತದಾರರು, ಇತರೆ ಮೂವರು ಮತದಾರರಿದ್ದಾರೆ.

ಕೆ.ಆರ್.ನಗರ: ತಾಲೂಕಿನ 34 ಗ್ರಾಮ ಪಂಚಾಯತಿಗಳಲ್ಲಿ 88,608 ಪುರುಷರು, 88,341ಮಹಿಳಾ ಮತದಾರರು, ಇತರೆ 12 ಮತದಾರರಿದ್ದಾರೆ.

ಹೆಚ್.ಡಿ.ಕೋಟೆ: ತಾಲೂಕಿನ 26 ಗ್ರಾಮ ಪಂಚಾಯತಿಗಳಲ್ಲಿ 65,603 ಪುರುಷರು, 64,229 ಮಹಿಳಾ ಮತದಾರರು, ಇತರೆ ಇಬ್ಬರು ಮತದಾರರಿದ್ದಾರೆ.

ಪಿರಿಯಾಪಟ್ಟಣ: ತಾಲೂಕಿನ 34 ಗ್ರಾಮ‌ ಪಂಚಾಯತಿಗಳಲ್ಲಿ 84,263 ಪುರುಷರು, 82,240 ಮಹಿಳಾ ಮತದಾರರು, ಇತರೆ ಮೂವರು ಮತದಾರರಿದ್ದಾರೆ.

ಸರಗೂರು: ತಾಲೂಕಿನ 13 ಗ್ರಾಮ ಪಂಚಾಯತಿಗಳಲ್ಲಿ 30,482 ಪುರುಷರು, 29,758 ಮಹಿಳಾ ಮತದಾರರು, ಒಬ್ಬರು ಇತರೆ ಮತದಾರರಿದ್ದಾರೆ.

ಈ ಐದು ತಾಲೂಕಿನ 148 ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ 3,68,012 ಪುರುಷ ಮತದಾರರಿದ್ದರೆ, 3,57,987 ಮಹಿಳಾ ಮತದಾರರು, ಇತರೆ 21 ಮತದಾರರಿದ್ದಾರೆ. ಒಟ್ಟು 7,22,019 ಮತದಾರರು ಮತ ಚಲಾಯಿಸುವ ಹಕ್ಕು ಹೊಂದಿದ್ದಾರೆ.

ಇದನ್ನೂ ಓದಿ: ಜೆಡಿಎಸ್-ಕಾಂಗ್ರೆಸ್ ಒಪ್ಪಂದವೇ ಶ್ರೀನಿವಾಸ್ ಸೋಲಿಗೆ ಕಾರಣ : ಶಾಸಕ ಹರ್ಷವರ್ಧನ್​