ಈಟಿವಿ ಭಾರತ್​​ ಫಲಶೃತಿ: ಆನ್​ಲೈನ್​​ ಶಿಕ್ಷಣ ವಂಚಿತ ವಿದ್ಯಾರ್ಥಿಗಳ ಮನೆಗೆ ಶಿಕ್ಷಣಾಧಿಕಾರಿ ಭೇಟಿ

ಆನ್​ಲೈನ್​​​ ಶಿಕ್ಷಣ ಪಡೆಯುವ ವ್ಯವಸ್ಥೆ ಇಲ್ಲದೆ ಕಂಗಾಲಾಗಿದ್ದ ಕೋಡಿಂಬಾಳ ಗ್ರಾಮದ ವಿದ್ಯಾರ್ಥಿಗಳ ಕುರಿತು 'ಈಟಿವಿ ಭಾರತ' ವರದಿ ಬಿತ್ತರಿಸಿದ್ದ ಹಿನ್ನೆಲೆ ಪುತ್ತೂರು ತಾಲೂಕು ಶಿಕ್ಷಣಾಧಿಕಾರಿ ಲೋಕೇಶ್​ ವಿದ್ಯಾರ್ಥಿಗಳ ಮನೆಗೆ ಭೇಟಿ ನೀಡಿ ಧೈರ್ಯ ತುಂಬುವ ಕೆಲಸ ಮಾಡಿದರು. ಹಾಗೂ ವರದಿ ಬಿತ್ತರಿಸಿದ 'ಈಟಿವಿ ಭಾರತ​​'ಗೆ ಅಭಿನಂದನೆ ಸಲ್ಲಿಸಿದರು.

ಕಡಬ: ಆನ್​​ಲೈನ್​​ ತರಗತಿಗೆ ಬೇಕಾದ ವ್ಯವಸ್ಥೆಗಳು ಇಲ್ಲದೇ ಕಂಗಾಲಾಗಿದ್ದ ತಾಲೂಕಿನ ಕೋಡಿಂಬಾಳ ಗ್ರಾಮದ ವಿದ್ಯಾರ್ಥಿಗಳ ಮನೆಗೆ ಪುತ್ತೂರು ಕ್ಷೇತ್ರ ಶಿಕ್ಷಣಾಧಿಕಾರಿ ಲೋಕೇಶ್​​ ಅವರು ಭೇಟಿ ನೀಡಿ ವಿದ್ಯಾರ್ಥಿಗಳಿಗೆ ಧೈರ್ಯ ತುಂಬುವುದರ ಜೊತೆ ವರದಿ ಬಿತ್ತರಿಸಿದ 'ಈಟಿವಿ ಭಾರತ​​'ಗೆ ಅಭಿನಂದನೆ ಸಲ್ಲಿಸಿದ್ದಾರೆ.

ದೊಡ್ಡಕೊಪ್ಪದ ವಿದ್ಯಾರ್ಥಿಗಳಾದ ವರುಣ್ ಮತ್ತು ಲಾವಣ್ಯಾ ಮನೆಯಲ್ಲಿ ಆನ್​​ಲೈನ್​​ ಶಿಕ್ಷಣಕ್ಕೆ ಅನುವಾಗುವಂತಹ ಟಿವಿ ಅಥವಾ ಸ್ಮಾರ್ಟ್ ಫೋನ್ ಇರಲಿಲ್ಲ. ಅಲ್ಲದೆ ಬಡತನದಲ್ಲೇ ಜೀವನ ದೂಡುತ್ತಿದ್ದ ಇವರಿಗೆ ಸರಿಯಾದ ಒಂದು ಮನೆಯಾಗಲೀ, ಕನಿಷ್ಠ ಪಕ್ಷ ಒಂದು ಶೌಚಾಲಯ ವ್ಯವಸ್ಥೆಯಾಗಲಿ ಇಲ್ಲ. ಈ ಬಗ್ಗೆ ಎರಡು ದಿನಗಳ ಹಿಂದೆ ಈಟಿವಿ ಭಾರತ ವಿಸ್ತೃತ ವರದಿ ಪ್ರಕಟಿಸಿತ್ತು.

ವರದಿ ಬಿತ್ತರವಾದ ಕ್ಷಣದಿಂದಲೇ ಹಲವಾರು ಜನರು ಇವರ ಸಂಕಷ್ಟಕ್ಕೆ ನೆರವಾಗಲು ಮುಂದೆ ಬಂದಿದ್ದರು. ನೆಲ್ಯಾಡಿ ಸಂತ ಅಲ್ಫೋನ್ಸಾ ಮತ್ತು ಆರ್ಲಸಂತ ಮೇರಿಸ್ ಚರ್ಚ್ ನ ಕಿರಿಯಕುಸುಮ ಮಿಷನ್ ಲೀಗ್ ನ ಮಕ್ಕಳು ಇವರಿಗೆ ಸ್ಮಾರ್ಟ್ ಟಿವಿ, ಡಿಟಿಹೆಚ್ ಸೆಟ್ ನೀಡಿದರೆ ಕಡಬ ಸರಕಾರಿ ಪ್ರೌಢಶಾಲೆಯ ಹಳೆ ವಿದ್ಯಾರ್ಥಿಗಳ ತಂಡವೊಂದು ಸ್ಮಾರ್ಟ್ ಫೋನ್ ನೀಡಿತ್ತು. ಇನ್ನೂ ಉಪ್ಪಿನಂಗಡಿಯ ಸನ್ ಪವರ್ ಸೋಲಾರ್ ನವರು ವಿದ್ಯಾರ್ಥಿಗಳ ಕಲಿಕೆಗೆ ನೆರವಾಗುವ ಎರಡು ಟೇಬಲ್ ಯುಕ್ತ ಕುರ್ಚಿ ಹಾಗೂ ಆರ್ಥಿಕ ನೆರವು ನೀಡಿದರು. ಮಾತ್ರವಲ್ಲದೆ ಹಲವಾರು ಜನರು ಆರ್ಥಿಕ ನೆರವನ್ನು ನೀಡುವ ಬಗ್ಗೆ ತಿಳಿಸಿದ್ದರು.

ಸದ್ಯ ವರದಿ ನೋಡಿದ ಪುತ್ತೂರು ತಾಲೂಕು ಕ್ಷೇತ್ರ ಶಿಕ್ಷಣಾಧಿಕಾರಿ ಲೋಕೇಶ್ 'ಈಟಿವಿ ಭಾರತ'ಗೆ ಕರೆ ಮಾಡಿ ವರುಣ್ ಮನೆಗೆ ಭೇಟಿ ನೀಡುವ ಬಗ್ಗೆ ತಿಳಿಸಿದ್ದರು. ಈ ಹಿನ್ನೆಲೆಯಲ್ಲಿ ಇಂದು ವರುಣ್ ಮನೆಗೆ ಭೇಟಿ ನೀಡಿದ ತಾಲೂಕು ಶಿಕ್ಷಣಾಧಿಕಾರಿಗಳು ವಿದ್ಯಾರ್ಥಿಗಳಿಗೆ ಧೈರ್ಯ ತುಂಬುವ ಕೆಲಸ ಮಾಡಿದರು. ವಿದ್ಯಾರ್ಥಿಗಳಿಗೆ ಹಲವು ವಿಚಾರಗಳ ಬಗ್ಗೆ ಮಾರ್ಗದರ್ಶನ ನೀಡಿದರು. ಈ ಸಮಯದಲ್ಲಿ ವರದಿ ಮಾಡುವ ಮೂಲಕ ವರುಣ್ ಕುಟುಂಬಕ್ಕೆ ನೆರವಾದ ವರದಿಗಾರರಿಗೆ ಹಾಗೂ ಸಹಾಯವಾಗಿ ಬಂದ ವ್ಯಕ್ತಿಗಳಿಗೆ ಅಭಿನಂದನೆ ಸಲ್ಲಿಸಿದರು.

ಈ ಕುಟುಂಬಕ್ಕೆ ತುರ್ತಾಗಿ ಒಂದು ಶೌಚಾಲಯ ಮತ್ತು ಮನೆ ಆಗಬೇಕಿದ್ದು, ಈ ನಿಟ್ಟಿನಲ್ಲೂ ಸಹೃದಯಿ ದಾನಿಗಳ ನೆರವಿನ ಅಗತ್ಯ ಇದೆ. ಜನಪ್ರತಿನಿಧಿಗಳು ಈ ನಿಟ್ಟಿನಲ್ಲಿ ಕಾರ್ಯಪ್ರವೃತ್ತರಾಗಬೇಕಿದೆ.