ಮಂಗಳೂರು (ದಕ್ಷಿಣಕನ್ನಡ): 2020ರ ಎನ್‌ಆರ್‌ಐಎಫ್ ಶ್ರೇಯಾಂಕದಲ್ಲಿ ಸುರತ್ಕಲ್ನ ಎನ್ಐಟಿಕೆ (ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಕರ್ನಾಟಕ) ಅತ್ಯುನ್ನತ ಸಾಧನೆ ಮಾಡಿದ್ದು, ಕಳೆದ ಒಂದು ವರ್ಷದಲ್ಲಿ ಎನ್ಐಟಿಕೆ ಎಲ್ಲಾ ನಿಯತಾಂಕಗಳಲ್ಲಿ ಉತ್ತಮ ಪ್ರದರ್ಶನ ನೀಡಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ 6.05 ಪಾಯಿಂಟ್ಗಳ ಏರಿಕೆಯೊಂದಿಗೆ ಒಟ್ಟಾರೆ ಕಾರ್ಯಕ್ಷಮತೆಯಲ್ಲಿ ಗಮನಾರ್ಹ ಸುಧಾರಣೆ ಸಾಧಿಸಿದೆ ಎಂದು ಎನ್ಐಟಿಕೆ ಪ್ರಕಟಣೆಯಲ್ಲಿ ತಿಳಿಸಿದೆ.
ಎನ್ಐಟಿಕೆಯು ಎಂಜಿನಿಯರಿಂಗ್ ಸಂಸ್ಥೆಗಳ ಶ್ರೇಯಾಂಕದಲ್ಲಿ 13ನೇ ಸ್ಥಾನ ಹಾಗೂ ಈ ವರ್ಷದ ಒಟ್ಟಾರೆ ಶ್ರೇಯಾಂಕದಲ್ಲಿ 33ನೇ ಸ್ಥಾನದಲ್ಲಿದೆ. ಇದಲ್ಲದೆ ಎನ್‌ಐಟಿಗಳ ಸಾಲಿನಲ್ಲಿ ಎನ್ಐಟಿಕೆಯು ಎರಡನೇ ಸ್ಥಾನದಲ್ಲಿದೆ. ದೇಶಾದ್ಯಂತ ಇರುವ 31 ಎನ್‌ಐಟಿಗಳಲ್ಲಿ ಎನ್ಐಟಿಕೆಯು ತನ್ನ ಎಲ್ಲಾ ಎಂಜಿನಿಯರಿಂಗ್ ವಿಭಾಗಗಳನ್ನು (ಯುಜಿ ಕಾರ್ಯಕ್ರಮಗಳು) ಗರಿಷ್ಠ ಆರು ವರ್ಷಗಳವರೆಗೆ ಮಾನ್ಯತೆ ಪಡೆದಿರುವ ಏಕೈಕ ಸಂಸ್ಥೆಯಾಗಿದೆ. ಕಳೆದ ಎರಡು ವರ್ಷಗಳಿಂದ ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಧನಸಹಾಯ ಸಂಸ್ಥೆಗಳಿಂದ ಹಲವಾರು ಪ್ರತಿಷ್ಟಿತ ಮತ್ತು ಹೆಚ್ಚಿನ ಮೌಲ್ಯದ ಸಂಶೋಧನಾ ಅನುದಾನವನ್ನು ಪಡೆಯುವಲ್ಲಿ ಸಂಸ್ಥೆಯ ಅಧ್ಯಾಪಕರು ಯಶಸ್ವಿಯಾಗಿದ್ದಾರೆ.
ಎನ್ಐಟಿಕೆಯು ಪ್ರಕಟವಾದ ಸಂಶೋಧನಾ ಪ್ರಬಂಧಗಳ ಸಂಖ್ಯೆ, ಪೇಟೆಂಟ್ಗಳನ್ನ ಸಲ್ಲಿಸುವುದು, ಪ್ರಕಟಿಸುವುದು ಮತ್ತು ಮಂಜೂರು ಮಾಡುವುದು, ಅಂತಾರಾಷ್ಟೀಯ ನಿಯತಕಾಲಿಕೆಗಳಲ್ಲಿ ಸಂಶೋಧನಾ ಪ್ರಕಟಣೆಗಳ ಗೋಚರತೆ, ಗುಣಮಟ್ಟ, ಪ್ರಭಾವವನ್ನು ಸುಧಾರಿಸಲು ಎಲ್ಲಾ ಹಂತಗಳಲ್ಲಿ ಗಂಭೀರ ಪ್ರಯತ್ನಗಳನ್ನ ಮಾಡಲಾಗುತ್ತಿದೆ.
ಈ ಮೂಲಕ ಉನ್ನತ ಶ್ರೇಣಿಯ ಕೈಗಾರಿಕೆಗಳು ಮತ್ತು ವಿದೇಶಿ ವಿಶ್ವವಿದ್ಯಾಲಯಗಳಲ್ಲಿ ಹೆಚ್ಚಿನ ಮೌಲ್ಯದ ಉದ್ಯೋಗ ಮತ್ತು ಇಂಟರ್ನ್ಶಿಪ್ ಪಡೆಯುವಲ್ಲಿ ಎನ್ಐಟಿಕೆ ವಿದ್ಯಾರ್ಥಿಗಳು ಯಶಸ್ವಿಯಾಗಿದ್ದಾರೆ. ವಿದ್ಯಾರ್ಥಿಗಳ ಈ ಸಾಧನೆಯು ಭಾರತದ ಅತ್ಯುತ್ತಮ ಸಂಸ್ಥೆಗಳ ಶ್ರೇಣಿಯಲ್ಲಿ ನಮ್ಮ ಸ್ಥಾನಕ್ಕೆ ಉತ್ತೇಜನ ನೀಡಿದೆ ಎಂದು ಎನ್ಐಟಿಕೆಯ ಪ್ರಕಟಣೆಯಲ್ಲಿ ತಿಳಿಸಿದೆ.
