ಮಂಗಳೂರು: 'ವಂದೇ ಭಾರತ್ ಮಿಷನ್' ಅಡಿಯಲ್ಲಿ ವಿದೇಶದಿಂದ ಏರ್ ಲಿಫ್ಟ್ ಮಾಡಿರುವ ಭಾರತೀಯರ ತಂಡ ಇಂದು ಯುಎಇಯಿಂದ ಮಂಗಳೂರು ತಲುಪಿತು. ತಾಯ್ನಾಡಿನ ನೆಲ ತಲುಪಿದವರ ಪ್ರಯಾಣಿಕರಲ್ಲಿ ಸಂತಸ ತುಂಬಿತ್ತು.
ಯುಎಇ ಕಾಲಮಾನ 5.10ಕ್ಕೆ ಹೊರಟ ಏರ್ ಇಂಡಿಯಾ IX384 ವಿಮಾನದ ಮೂಲಕ ಆಗಮಿಸಿದ ವಿಮಾನ ಭಾರತೀಯ ಕಾಲಮಾನ ರಾತ್ರಿ 10.10ರ ವೇಳೆಗೆ 176 ಭಾರತೀಯರನ್ನು ತಾಯ್ನೆಲಕ್ಕೆ ತಲುಪಿಸಿದೆ. ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಭಾಗದ ಪ್ರಯಾಣಿಕರಿರುವ ಈ ವಿಮಾನದಲ್ಲಿ 95 ಮಂದಿ ಪುರುಷರು, 81 ಮಂದಿ ಮಹಿಳೆಯರು ಆಗಮಿಸಿದ್ದಾರೆ. ಇದರಲ್ಲಿ 38 ಮಂದಿ ಗರ್ಭಿಣಿಯರು, 12 ಮಂದಿ ತುರ್ತು ವೈದ್ಯಕೀಯ ಚಿಕಿತ್ಸೆಯ ಅಗತ್ಯವುಳ್ಳವರು ಇದ್ದರು.
ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬಂದಿಳಿದ ಪ್ರಯಾಣಿಕರಿಗೆ ವೈದ್ಯಕೀಯ ತಪಾಸಣೆ ನಡೆಸಿದ ಬಳಿಕ ಮುನ್ನೆಚ್ಚರಿಕಾ ಕ್ರಮವಾಗಿ ಕ್ವಾರಂಟೈನ್ ಮುದ್ರೆ ಒತ್ತಲಾಯಿತು. ಬಳಿಕ ಪ್ರತ್ಯೇಕ ಐವರು ಅಧಿಕಾರಿಗಳು 10 ಬಸ್ಗಳ ಮೂಲಕ ಕ್ವಾರಂಟೈನ್ ಸ್ಥಳಗಳಿಗೆ ಕರೆ ತಂದಿದ್ದಾರೆ.
ವಿದೇಶದಿಂದ ಆಗಮಿಸಿರುವ ಈ ಪ್ರಯಾಣಿಕರನ್ನು 14 ದಿನಗಳ ಕಾಲ ಸರ್ಕಾರಿ ನಿಯಂತ್ರಣದಲ್ಲಿರುವ ಹೊಟೇಲ್ಗಳಲ್ಲಿ ಅಥವಾ ಹಾಸ್ಟೆಲ್ಗಳಲ್ಲಿ ಕಡ್ಡಾಯ ಕ್ವಾರಂಟೈನ್ಗೆ ಒಳಪಡಿಸಲಾಗುವುದು. ಈ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಕ್ವಾರಂಟೈನ್ ವ್ಯವಸ್ಥೆಗಾಗಿ 17 ಹೊಟೇಲ್ಗಳು ಹಾಗೂ 12 ಹಾಸ್ಟೆಲ್ಗಳನ್ನು ಈಗಾಗಲೇ ವ್ಯವಸ್ಥೆ ಮಾಡಿದೆ.
