ಇಂದಿನಿಂದ ಒಂದು ವಾರ ಕಲಬುರಗಿ ಬಂದ್​​.... ಅಗತ್ಯ ಸೇವೆಗಳಿಗಷ್ಟೇ ರಿಯಾಯಿತಿ

ಪೂರ್ವ ಸಿದ್ಧತೆ ಮಾಡಿಕೊಳ್ಳದೇ ರಾತ್ರೋರಾತ್ರಿ ಕಲಬುರಗಿಯಲ್ಲಿ ಲಾಕ್​​ಡೌನ್ ಆದೇಶ ಹೊರಡಿಸಿರುವುದರಿಂದ ಹಾಗೂ ಆದೇಶದಲ್ಲಿ ಕೇವಲ ದಿನಾಂಕ ಮಾತ್ರ ಉಲ್ಲೇಖಿಸಿ, ಸಮಯ ಉಲ್ಲೇಖಿಸದ ಕಾರಣ ಜನರಲ್ಲಿ ಗೊಂದಲ ಉಂಟಾಗುವಂತೆ ಮಾಡಿದೆ.

ಕಲಬುರಗಿ: ಜಿಲ್ಲೆಯಲ್ಲಿ ದಿನದಿಂದ ದಿನಕ್ಕೆ ಕೊರೊನಾ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆ ಲಾಕ್​​ಡೌನ್ ಘೋಷಣೆ ಮಾಡಲಾಗಿದೆ.

ಕಲಬುರಗಿ ನಗರ ಸೇರಿದಂತೆ ಜಿಲ್ಲೆಯ ವಿವಿಧ ನಗರ - ಸ್ಥಳೀಯ ಸಂಸ್ಥೆಗಳ ವ್ಯಾಪ್ತಿಯಲ್ಲಿ ಜುಲೈ 14 ರಿಂದ 20ರ‌ ವರೆಗೆ ಅಂದರೆ ಇಂದಿನಿಂದ 7 ದಿನಗಳ ಕಾಲ ಲಾಕ್​​ಡೌನ್ ಜಾರಿಗೆ ತರಲಾಗಿದೆ. ಜಿಲ್ಲಾ ಹಾಗೂ ತಾಲೂಕು ಕೇಂದ್ರಗಳಲ್ಲದೇ, ಪಟ್ಟಣ ಪ್ರದೇಶಗಳ ವ್ಯಾಪ್ತಿಯಲ್ಲಿ ಜುಲೈ 20 ರವರೆಗೆ ಲಾಕ್​ಡೌನ್ ಮುಂದುವರೆಸುವಂತೆ ಜಿಲ್ಲಾಧಿಕಾರಿ ಶರತ್ ಬಿ. ಆದೇಶಿಸಿದ್ದಾರೆ.

ಆದರೆ ಲಾಕ್​​​​ಡೌನ್​ಗೆ ಜಿಲ್ಲೆಯಲ್ಲಿ ಇಂದು ಉತ್ತಮ ಪ್ರತಿಕ್ರಿಯೆ ಸಿಕ್ಕಿಲ್ಲ. ಜಿಲ್ಲಾಡಳಿತ ಸಾರಿಗೆ ಬಸ್ ಸಂಚಾರಕ್ಕೆ ವಿನಾಯಿತಿ ನೀಡಿರುವುದರಿಂದ ಆಟೋ, ಬೈಕ್, ಕಾರು ಮತ್ತಿತರ ವಾಹನ ಸಂಚಾರ ಎಂದಿನಂತೆ ಸಾಗಿದೆ. ಅಲ್ಲಲ್ಲಿ ಹೋಟೆಲ್ ಹಾಗೂ ಅಂಗಡಿಗಳನ್ನು ಸಹ ತರೆಯಲಾಗಿದೆ‌. ಪೂರ್ವ ಸಿದ್ಧತೆ ಮಾಡಿಕೊಳ್ಳದೇ ರಾತ್ರೋರಾತ್ರಿ ಲಾಕ್​​ಡೌನ್ ಆದೇಶ ಹೊರಡಿಸಿರುವುದರಿಂದ ಹಾಗೂ ಆದೇಶದಲ್ಲಿ ಕೇವಲ ದಿನಾಂಕ ಮಾತ್ರ ಉಲ್ಲೇಖಿಸಿ, ಸಮಯ ಉಲ್ಲೇಖಿಸದ ಕಾರಣ ಜನರಲ್ಲಿ ಗೊಂದಲ ಉಂಟಾಗಿದೆ.