ಬೆಂಗಳೂರು : ಶಿಕ್ಷಣ ಸಚಿವರ ಮಾತಿಗೂ ಕೇರ್ ಮಾಡದೆ ನಗರದ ವಿಬ್‌ಗಯಾರ್ ಶಾಲೆಯು ವಿದ್ಯಾರ್ಥಿಗಳಿಗೆ ಆನ್ಲೈನ್ ಶಿಕ್ಷಣ ಮುಂದುವರಿಸಿದೆ.
ರಾಜ್ಯದ ಅನುದಾನಿತ-ಅನುದಾನ ರಹಿತ ಸೇರಿ ಯಾವುದೇ ಶಾಲೆಗಳು ಎಲ್ಕೆ‌ಜಿ-ಯುಕೆಜಿ ಹಾಗೂ 5ನೇ ತರಗತಿವರೆಗೆ ಆನ್ಲೈನ್ ಶಿಕ್ಷಣ ನಡೆಸಬಾರದೆಂದು ಸರ್ಕಾರ ಆದೇಶ ಹೊರಡಿಸಲಾಗಿದೆ. ಆದರೂ ವಿಬ್‌ಗಯಾರ್ ಶಾಲೆಯಲ್ಲಿ ಪೋಷಕರಿಗೆ ಆನ್ಲೈನ್ ತರಗತಿ ನಡೆಸಲಾಗುವುದು ಎಂದು ಮೊಬೈಲ್ ಸಂದೇಶ ರವಾನೆ ಮಾಡಿ, ಇಂದು ಬೆಳಗ್ಗೆ ಮಕ್ಕಳಿಗೆ ಆನ್ಲೈನ್ ತರಗತಿ ನಡೆಸಿದೆ. ಇತ್ತ ಎಲ್ಲಾ ಗೊತ್ತಿದ್ದೂ ಶಿಕ್ಷಣ ಇಲಾಖೆ ಮಾತ್ರ ಕಣ್ಣುಮುಚ್ಚಿ ಕುಳಿತಿದೆ.
ಸಚಿವ ಸುರೇಶ್‌ಕುಮಾರ್ ಆನ್ಲೈನ್ ಕ್ಲಾಸ್ ರದ್ದುಪಡಿಸಿರುವ ಬಗ್ಗೆ ಈಗಾಗಲೇ ಮಾಹಿತಿ ನೀಡಿದ್ದಾರೆ. ಆದರೆ, ಸಾರ್ವಜನಿಕ ಶಿಕ್ಷಣ ಇಲಾಖೆ ಆಯುಕ್ತರು ಸುತ್ತೋಲೆ ಹೊರಡಿಸದೆ ಸುಮ್ಮನೆ ಕುಳಿತಿರುವುದು ಚರ್ಚೆಗೆ ಗ್ರಾಸವಾಗಿದೆ. ಇತ್ತ ಶಾಲೆಯ ಮುಖ್ಯಸ್ಥರು ಮಾತ್ರ, ನಮಗೆ ಯಾವುದೇ ಆದೇಶ ಪ್ರತಿ ಬಂದಿಲ್ಲ. ನಾವು ಯಾಕೆ ಆನ್ಲೈನ್ ಕ್ಲಾಸ್ ನಿಲ್ಲಿಸಬೇಕು ಅಂತಿದ್ದಾರೆ. ಹೀಗಾಗಿ ಯಾವುದೇ ಆದೇಶ ಹೊರಡಿಸದೆ ಖಾಸಗಿ ಶಾಲೆಗಳ ಪರ ಅಧಿಕಾರಿಗಳು ಕೆಲಸ ಮಾಡುತ್ತಿದ್ದಾರಾ ಎಂಬ ಆರೋಪವೂ ಕೇಳಿ ಬಂದಿದೆ.
