ಬೆಂಗಳೂರು: ಎಲ್ಲೆಡೆ ಆರ್ಭಟವಿಟ್ಟ ಮಾರಕ ರೋಗ ತಡೆಗೆ ಜನತಾ ಕರ್ಫ್ಯೂ ನಂತರ ಸೆಮಿ ಲಾಕ್ಡೌನ್ ಜಾರಿಯಾಯ್ತು. ಇದೀಗ ಹಂತ ಹಂತವಾಗಿ ಅನ್ಲಾಕ್ ಪ್ರಕ್ರಿಯೆಯೂ ಆರಂಭವಾಗಿದೆ. ಕೋವಿಡ್, ಲಾಕ್ಡೌನ್, ಪೊಲೀಸರ ಕಾರ್ಯಾಚರಣೆ ಖದೀಮರ ಕೈ ಚಳಕಕ್ಕೆ ಅಡ್ಡಿಯಾಗಿದೆ. ಹೌದು, ಕಳೆದ ಎರಡು ಮೂರು ತಿಂಗಳಿನಲ್ಲಿ ಕಳ್ಳತನದಂತಹ ಪ್ರಕರಣಗಳು ತೀರಾನೇ ಇಳಿಕೆ ಕಂಡಿದೆ.
ಕಳೆದ ಕೆಲ ದಿನಗಳಿಂದೆ ರಾಜ್ಯ ರಾಜಧಾನಿಯಲ್ಲಿ ಸೋಂಕು ವಿಪರೀತವಾಗಿತ್ತು. ಕೋವಿಡ್ ನಿಯಮಗಳು ಕಟ್ಟುನಿಟ್ಟಾಗಿ ಪಾಲಿಸುತ್ತಾ, ಎಲ್ಲೆಡೆ ಪೊಲೀಸರು ಹದ್ದಿನ ಕಣ್ಣಿಟ್ಟಿದ್ದರು. ಜನರು ಸುಖಾಸುಮ್ಮನೆ ಹೊರಗೆ ಬಾರಲು ಹಿಂದೇಟು ಹಾಕುತ್ತಿದ್ದರು. ಇದೆಲ್ಲವೂ ಕಳ್ಳರ ಕೈ ಕಟ್ಟಿ ಹಾಕಿದ ಹಿನ್ನೆಲೆಯಲ್ಲಿ ಕಳ್ಳತನ ಪ್ರಕರಣಗಳು ತೀರಾ ಇಳಿಕೆಯಾಗಿದ್ದವು. ಆದ್ರೆ ಸೈಬರ್ ಕ್ರೈಂ ಮಾತ್ರ ಎಗ್ಗಿಲ್ಲದೇ ನಡೆಯುತ್ತಿದೆ.
ಹೌದು, ಬೆಂಗಳೂರಿನಲ್ಲಿ ಆಕ್ಸಿಜನ್ ದಂಧೆ, ಬೆಡ್ ಬ್ಲಾಕಿಂಗ್ ದಂಧೆ, ರೆಮ್ಡಿಸಿವಿರ್ ಮಾರಾಟ ಇಂತಹ ಆನ್ಲೈನ್ ವಂಚನೆಯೇ ಹೆಚ್ಚಾಗಿ ನಡೆದಿದ್ದು, ಆರೋಪಿಗಳನ್ನು ಪೊಲೀಸರು ಹೆಡೆಮುರಿಕಟ್ಟಿದ್ದಾರೆ.
ಮೂರು ರಾಜ್ಯಗಳ ಸಂಪರ್ಕ ಕೊಂಡಿಯಾಗಿರುವ ಬೆಳಗಾವಿಯಲ್ಲಿ ಮನೆಗಳ್ಳತನ, ಡಕಾಯಿತಿ ಪ್ರಕರಣಗಳು ಎಗ್ಗಿಲ್ಲದೇ ನಡೆಯುತ್ತವೆ. ಆದ್ರೆ ಕಳೆದ ಎರಡ್ಮೂರು ತಿಂಗಳಿಂದ ಕಳ್ಳರು ಗಪ್ಚುಪ್ ಆಗಿದ್ದಾರೆ. ಕೋವಿಡ್, ಸೆಮಿ ಲಾಕ್ಡೌನ್ ಎಲ್ಲೆಡೆ ಪೊಲೀಸರೇ ಕಾಣ್ಸೋದ್ರಿಂದ ಕಳ್ಳತನಕ್ಕೆ ಅವಕಾಶವಿಲ್ಲದಂತಾಗಿದೆ.
ಕೋವಿಡ್, ಲಾಕ್ಡೌನ್ನಿಂದ ಕಳ್ಳತನ ಪ್ರಕರಣಗಳು ತೀರಾ ಕಡಿಮೆಯಾಗಿದ್ದವು. ಇದೀಗ ಹಂತಹಂತವಾಗಿ ಅನ್ಲಾಕ್ ಪ್ರಕ್ರಿಯೆ ಶುರುವಾಗಿದ್ದು, ಮತ್ತೆ ಬಾಲ ಬಿಚ್ಚುವ ಕಳ್ಳರಿಗೆ ಪೊಲೀಸರು ಬಿಸಿ ಮುಟ್ಟಿಸಬೇಕಿದೆ.
